19.05.2024
德國足球乙組聯賽 第 34 週
SV Elversberg - Karlsruher SC
Waldstadion an der Kaiserlinde
賽果：0:3 (0:0)
入場人數： 9502 （1800 名作客球迷）
門票：季票
更多相片
由七月尾到今個週末原來已經過左三十三個比賽週，今日終於黎到第三十四週，即係今季最後一場比賽。
提早護級成功既好處係唔洗食救心食到尾，見到榜尾嗰幾隊要睇住人地既比數先知自己可唔可以慶祝，我地就心情完全無包袱咁只需要出席餘下賽事。 但大家既心情難免有啲散漫，暗暗地有種仲咁落力打氣做乜既諗法。
今季最後一場波全部都係星期日三點半上演，唔知係咪比大家有種去睇德甲既感覺？ 球迷組織 HF 早兩星期宣布左會係搞賽前巡遊 (Fanmarsch)，叫大家一齊朝早係村中心既市集集合，然後一齊行去球場。 今次將會係 Elversberg 呢條村第一次有 Fanmarsch，又係一個新歷史。
少部份球迷朝早十點半就已經慢慢出現，我地就九點先由法蘭克福出發，大約十一點先去同大家集合。 去到十二點左右都係得一兩百人左右有少少冷清，大家都有啲擔心因為不穩定天氣令到啲人改變主意。。去到十二點半好多人突然出現，最後無啦啦有超過五百人參與！！！大家一開始沿住內街行一路唱歌一路放煙氣氛超好！！！ 我地見過唔少球迷巡遊，今次都係第一次真係參與其中！ 呢次亦都係大家既第一次，當中點都會有啲蝦碌事發生，但整體黎講一定係大成功！！！！ 有啲角度仲可以影到好似無盡既人龍、過千人舉手打氣、全村煙霧離漫、矇頭既個個又好型咁，無諗係現實定係幻覺大家都無諗過會可以係自己條村一齊出現係呢個情景！！
入到球場後大家就各自入場，大家都趁下一場雨來臨之前入場。 過去兩日係西南地區落左一日 X 年一遇既暴雨，而莎蘭地區係其中一個水浸重災區，出動左超過四千名救援人員去救災。 我地身邊都唔少人都為左救災而只可以訓到兩三個鐘。 今日係賽前球迷都有舉起大字報感激各方位既幫忙。
今日我地既對手係同樣來自西南部既 KSC，對佢地黎講今場係其中一個短距離既作客賽事。 大家都好準時入到場，不過賽前就有啲少插曲。。 我地見啲防暴突然飛奔去作客區既入口，仲見到佢地噴埋糊椒！！ 然後就有一大班大衝過入口推進入場。 我地收到既消息係指對面有近三百人買左作客看台側邊既主場飛被拒入場，係德國球場其中一個最常見既情況就係一大班人一齊爆閘入場，係一片混亂情況之下就可以將人或者禁物運到入場。 佢地就係選擇左呢個方法將無飛或者買左主場飛既人迫入場～ 唔怪之後個作客看台明明滿哂都仍然有一大班人企係廣告圍欄後面睇波。賽後佢地既球迷協會指責警察無理噴椒，話當時佢地唔係想爛閘，只係因為突然落大雨班球迷只想盡快入到場避雨。 哦！～ 佢地入場之後好忙咁掛起準備左既 Choreo，係以佢地其中一首打氣歌黎做主題，意指： 我地永遠都係度～ 來自 KA 既 Ultras～
賽前 SVE 安排左時間去歡送季尾離隊既球員，當中包括掛靴既隊長 Kevin Conard 同球王 Kevin Koffi，來自拜仁既借將 Paul Wanner （來季應該會再被借去德甲球隊） 同來季踢歐聯既史特加 Wahid Faghir （同樣季中傷左一段時間）、來自法國既 Hugo Vandermersch，仲有青訓 Sebastian Saftig 、約滿離隊既 Thore Jacobsen，同埋唔知點解季初已經轉左隊去以色列但今日又會返黎黎個正式 Farewell 既 Nico Antonitsch。 仲有一兩位重心球員被其他球隊睇中左，有傳仲會有人離隊… 雖然睇左波咁多年由球員離隊會喊到七彩到後來接受現實學識 they come and go，過去兩季大家一齊奮鬥到有今日既成績係會有啲不捨。 而家唯有希望黎緊會加盟既球員可以同我地一齊行得更遠，甚至成為下一隊海登咸～～
講返場波先，其實都唔係好想講。。。。 上半場五五波，下半場好似已經無心戀戰個個都想快啲放假，啲機會送哂比對方，失完一球又一球。 今日兩位將會掛靴既球員正選上陣，去到下半場被換出既時候受到全場球迷既鼓聲歡送，啲球員將都係後備席前兩行排開歡送佢地，KSC 球員都有係自己位置一齊拍下手咁 respect ～ 對方都有一名前國腳踢埋今場就退休 Lars Stindl，佢係 KSC 青訓出身，後來踢過漢諾威同慕遜加柏，今季返到母會退休。 佢係 KSC 等開角球既時候被換落場。。。 最完美既時刻出現了，入場唔夠廿秒接應角球頂入今場第三球。 佢係對面入波我地一開始唔知邊個頂入，但見到佢地既門將同成班職球員加球迷個個衝埋去慶祝就知呢球好重要。。。。 我地都忍唔住拍手。
最後嗰十分鐘意外地難捱， 我地好想場波快啲完。。。。。 由今朝十一點企到而家差唔多六點鐘，就算賽後有免費啤酒我地都唔想飲 ._. 淨係想返屋企攤下！！ 等到球證吹雞完場，今季終於落幕。
完場後我地係看台前掛起 DANKE 大字報，主要多謝隊長同球王過去多年既付出！ 然後逐個叫名叫啲將會離隊既球員出黎接受最後一次既球迷掌聲，同埋當然唔少得要多謝領隊 Horst Steffen～ 我地想叫佢上黎看台同大家講幾句，但佢怕醜拒絕走左去球員後面～～ 大家就轉移目標去副隊長 Schnellbacher 叫佢頂上～ 佢上台後帶領大家唱 2022 – Allez allez allez，係一片歡樂聲之下為 SVE 第一季既德乙旅程畫上句號～
今季我地以 43 分排第 11，總共失左 63 球波，諗住轉頭今季比人大炒左幾次都真係唔係幾好受！！ 除左要執下後防，仲要執下前面既策略，我地係德丙既快上快落已經唔再用得著。。 今季我地只係對住三隊波主客都拎唔到分： Rostock (已降班，唔係我地送六分就唔洗去到最後一場先降）、紐倫堡同今日既 KSC。 連續兩季以雙冠完季，今季同拜仁一樣乜野都無得贏～ 地區盃賽我地無份踢，因為我地以德乙球隊種子隊直接進入足總盃首圈！ 邊隊細隊抽中我地真係要喊三聲，我地既期望又驚要去老遠作客啲迷你隊。。。。 下個星期就會揭曉！！
來季將會係八月先開波，忙左一季終於可以休息下～
