18.05.2024
德國西南地區聯賽 第 34 週
SGV Freiberg - VfR Aalen
Wasenstadion
賽果：3:1 (3:0)
入場人數：360 （50 名作客球迷）
門票： €11
更多相片

德國西南地區聯賽呢幾隻字係過去兩年同我地無咩瓜葛，無咩特別都唔需要提起。 如果唔係訂好哂既法國兩日遊未能成行，我地都未必會考慮去睇呢啲低組別波！！

呢個月唔知行咩衰運，好多安排好既行程都因各種問題而出錯。 月頭因為屋企附近封路搞到去到開波一刻先到場，早兩星期因為壞火車搞到開波前廿分鐘先到紐倫堡既球場，今日原定係會去睇場法甲仲一早買好哂飛，點知早排佢地因為有兩隊波入歐聯同歐霸決賽而無啦啦將最後一個比賽日改去星期日同德乙撞左時間，花左過百歐買飛最後又唔比退錢要硬食。 最後睇睇下就㨂左去睇呢場地區聯賽，睇下係平行時空 SVE 既對手係咩水準。

喺正常情況下，由法蘭克福南下去史特加以北既 Freiberg 只需個半鐘車程。 我地十一點鐘出發，預有個半鐘既時間做 buffer ，開車大約半個鐘後個預計抵達時間一路增加，由本來一點前到達變成差唔多兩點先到。 星期六下午係德甲最後一個比賽日，我地沿路會經過賀芬咸主場，而佢地既對手係拜仁。 仲有兩三隊今日都係要去南部作賽，淨係球迷都已經迫滿公路；再加有兩段路因為交通意外而大塞車。。。 去到尾段我地就搵小路去避公路，最後係開波前十五分鐘係球場附近泊低到架車。

抵達後我地有啲慶幸最後咁準時到達，因為個球場 up dup 得黎附近係完全無地方可以打發時間。 落車後唔洗一百米就到達球場入口，買飛後我即刻去個廁所同買野飲，然後就行去對面後備旁邊曬住太陽睇波，同埋期待見下一塊熟悉既面孔…… SVE 既前領隊 Roland Seitz。

Seitz 早幾年曾經兩次短暫帶領 SVE，第一次我無經歷過，但第二次係 2018 年可以話係黑歷史，每踢完一場都好叫自己做好心理準備季尾可能會降班，嗰陣場場唱歌叫佢返歸同倒數每場波仲有幾多分鐘完場！！！ 不過無呢段黑歷史，我地都未必會有現任領隊帶我地上德乙，就好似如果利華古遜唔係比我地收皮既話佢地都唔會搵到沙比黎執教。。。。

本來我都有啲擔心會認唔到 Seitz ，但當球員進場時離遠見到有個鬍鬚阿伯行過黎，種種回憶即刻重現眼前～ 真係差啲唔記得 pat 鬚係佢既 icon。 佢離開 SVE 之後失業過一排，然後去左今日既對手 Aalen 執教左兩季又比人炒左，後來去左盧森堡既乙組都比人炒，而家又返黎西南地區聯賽帶左 Freiberg 幾年。 呢隊波仲有一個犯眾憎既球員，曾經踢過 SVE 既 Kehl-Gomez。 憎佢既原因係佢轉會去同州球隊都算，轉會後仲會係場上挑釁我地，所以每次見到佢都要叫佢仆街仔 Kehl-Gomez。 今日唔知點解佢身為隊長連後備都無份，係咪提早放假？

今日仲有呢一個球員我地可以望下，就係 Freiberg 既 17 號 Filimon Gerezgiher。開波前主隊黎個簡單咁向季尾離隊既球員道別， Filimon 來季將會加盟德乙球隊 SV Elversberg，連跳兩級，祝佢前程似錦～～ 一開波唔夠兩分鐘佢已經有個助攻造成入球，佢細佬定唔知阿哥好似又入多一球領先， 以地區聯賽既準備睇落係唔錯，係身型有啲單薄唔似係德乙夠唔夠撞。

客隊 Aalen 早幾場已經篤定來季降班落去第五級別，今日仍然有五十人黎作客都算唔錯。 但佢地個個都好安靜咁坐係作客區度睇住自己隊波上半場已經食左三蛋，佢地應該無期望過隊波有機會贏波。半場休息時我地係度諗，SVE 踢地區聯賽嗰陣就算成績差都唔會得三百人咁少，三百個觀眾係莎蘭第五或者第六級別既平均入場人數，淨係計啲球員本身既親友都已經佔百人，再加上好多人都會得閒就去支持下自己鄉下隊，當入場食個包飲杯酒打發下時間都好。 就算話 Freiberg 附近係史特加無理由得嗰三百人入場嘛？

下半場班作客球迷準備左幾塊大字報，要求球隊認真檢討人事問題同改革。 舉完頭兩張之後佢地就係看台入面搵火燒左佢，啲保安好快就衝入去踢熄左啲火。 兩分鐘後佢地又有兩張新既大字報：一張大字報唔夠既話，呢度仲有一張。。。 舉完之後佢地又想再燒，今次佢地圍住個火唔比保安咁易整熄佢，生火成功之後，保安出絕招噴哂成枝滅火筒！ 我地好開心食花生有煙睇～

後來我地開始頂唔順個太陽未完場就向門口方向行去，客隊最後成功入到一球叫做降班前有啲野慶祝下～ 完場後我地去左 Ludwigsburg 睇下城堡同去飲飯。 呢個蚊型城堡佢地竟然收 14€ 入場費，個花園仲要無咩特別，我地先唔會咁蠢比錢佢地種花～ 係閘外都可以離遠見到花園全景！ 回程終於一路暢通，個半鐘內就返到屋企，然後就準備迎戰今季德乙最後一戰！