19.04.2024
德國足球乙組聯賽 第 30 週
SV Elversberg - FC Schalke 04
Waldstadion an der Kaiserlinde
賽果：1:1 (1:0)
入場人數： 9502 （2000 名作客球迷）
門票：季票
更多相片
五個月前我地到史浩克作客，係六萬人眼前贏得三分，呢份激動心情好多人講到而家都仲講緊。今日終於輪到我地係主場迎戰呢隊身經百戰既傳統勁旅，要佢地黎到鄉下地方屈就係一個地盤黎同我地爭三分護級。
史浩克由開季到而家都係聯賽榜下游掙扎緊，我地既情況都唔係好得去邊，最大問題係表現唔夠穩定。SVE 今季既主場戰績係倒數第三，而史浩克既作客成績係包尾，今場睇落係廢鬥廢，就算對方今季既成績點差都好我地都唔可以輕視，更何況人地始終都係堂堂 FC Schalke 04 – 淨係撻個名出黎既氣勢都已經夠做啦！！
今個比賽週我地被安排係星期五晚出賽，日子係四月十九號 – 19.04 – 正正係史浩克既創會年份～ 我地星期四晚就已經先去莎蘭過夜，第二朝 wfh 到四點幾就收工然後就係雨中行去球場。 同十一月一樣落足整日大雨，但我今日無論如何都要落場準備影相，因為球隊準備左一個小驚喜，同埋球迷組織 HF 準備左一個 choreo！
呢場波既波飛未去到公開售票階段就已經賣哂，有好多人係網上仲話願意出價高原價十幾廿倍去買黃牛。聽講史浩克嗰邊有超過一萬五千名球名申請買作客飛，萬五人？？？我地成條村加埋都無咁多人囉。。。。我地作客區最多都係只可容納二千人，好多人憎死我地呢個蚊型球場搞到佢地跟唔到去作客。 xD 最後係 Block B 有少部份作客球迷混到入場，有人亦嘗試著住藍白衣物入到 Block C。 呢兩日 SVE 既球迷文化逐漸成熟，大家開始保護 Block C 去成為主場球迷專有既基地。 今日係門口踢走左幾個來自莎蘭既作客球迷，我地比兩個選擇佢：一係除衫掉入垃圾桶先可以入場，一係就唔好入場。
開波前半個鐘，HF 係 Block C 開始分派黑色同銀色既旗仔，我就走到去球場既另一邊希望可以捕捉到幾張靚相。 係 Choreo 上演之前，球隊先送出個小驚喜： 佢地搵左當地既樂團黎現場表現 Steigerlied – 礦工之歌。 話說我地到史浩克作客既時候同樣係星期五晚，當時佢地一如以往係賽前播起礦工之歌，同時關哂場內既射燈，只有球迷舉起電話既閃光燈造成一個好似係礦工場既感覺。 呢個場面好多有去作客既球迷同樣講到而家都仲講緊，只可惜當時有部份球迷因為塞車遲到未能現場見證呢個震撼場面….
莎蘭同魯爾地區一樣曾經係德國重要既礦工地區，呢度既小朋友返學同樣要學唱礦工之歌。 Elversberg 唔係礦工場，但以前係礦工既居住地，所以都可以話係一條礦工村。 我估 SVE 今日準備呢個表演係睇中兩隊波都係有礦工既歷史關係，又想比球迷感受下係球場內一齊唱 Steigerlied 既氣氛。 樂隊由 Block C 旁邊既球員通道行出球場，史浩克球迷就即刻開始即住唱歌！ 反而我唔係好聽到主場球迷既聲音…. 後來聽返原來因為隊樂隊由一開始係背住 Block C 起行所以佢地根本聽唔到音樂。。。。 而主看台既球迷又未埋位，好可惜咁浪費左呢次表演。
唱完歌之後就到球員入場，Block C 就拉開看台前既大字橫額：Die SVE im Glanz der 2.Liga 意指 SVE 係德乙光芒四射～ 看台內既黑銀旗仔配上閃光彈造成閃閃發光既效果。 今日又係另一歷史，HF 第一次係場內「非法地」放煙火！ 不過點都係有啲唔完美： 今場係就係射燈下既比賽，但慢慢進入夏天去到八點都未天黑。 本來陰天落左一日雨又唔知點解無啦啦變藍天無雲，令到我地準備左既閃光燈睇落完全唔起眼 ._.
企係場邊見到各位史浩克球員企係我眼前，心中有一種莫名既興奮感。 過去幾年少左追史浩克黎睇，已經唔可以好容易 up 得出陣容，但眼前係著住印有 SCHALKE 04 係背面既球員呀！！！仲有可以見到 Terodde 忍唔住影左張相比自己收藏，然後要希望佢唔好上身入波成救世主。 開波唔夠廿分鐘我地靠罰球傳中頂入，又係後衛入波，來自季中加盟既法國球員 Le Joncour~~~ 當時我仲好專心影緊班作客球迷唱一首我地都有既歌，點知無意中影到入球一刻！！
上半場我地踢得好好，如果唔係人地龍門上身救哂啲必入球既話我地應該領先最少三四球囉！！！ 下半場我走返入看台，啲球迷今場波勁有火好多人都有參與打氣，反正我都見識過幾次 UGE 既氣勢，今日我都係做返個主場球迷打下氣享受下好啲！！ 下半場比客隊追返一球，但呢球完全無損大家打氣既心情繼續唱到完場。
補時三分鐘後球證吹雞完場，我地繼續唱 Allez allez allez 直到球員黎到看台前，將和波當贏波咁慶祝。因為得到呢一分我地終於拎到護級既關鍵 40 分！！！！ 有報紙計過數過去十年只有一次係拎到 40 分都仲要踢附加賽，而家係數字上我地仲有可能降班，但黎緊榜尾嗰幾隊仲會各自相遇，正常情況下已經可以話我地護級成功！！！！！！！（係德甲有四十分既話係爭緊歐洲賽席位囉～）
今日咁就又再次完成一個里程碑，小球隊迎戰大球隊… 對方一定喊緊幾年前講緊對皇馬，竟然會有一齊我地可以同史浩克個名放埋一齊！！！ 眨下眼今季只剩返四場，希望佢地會護級成功等我地下年可以再次相遇～～