14.04.2024
德國足球乙組聯賽 第 29 週
FC St. Pauli - SV Elversberg
Millerntor-Stadion
賽果：3:4 (1:0)
入場人數： 29546 （約 1000 名作客球迷）
門票：14€
更多相片
成日聽人講聖保利主場既波飛好難買，所以一直都無特別諗過要去；最後竟然會可以以作客球迷身份去踩場！ 而呢個球場係我最後唯一一個未去過既德乙球場，睇埋今場波我終於第一次去哂一個聯賽既所有球場！！唔知會唔會係第一個香港人去過哂所以德乙球場呢？ xD
SVE 向主隊只係要左半個作客看台，拎左大約一千張飛；睇返之前作客啲大球迷都係得千五人左右到時；早兩個月作客漢堡都係得幾百人，今次個個諗住都係差唔多人會買飛。 當球隊宣布開賣作客波飛後，幾個鐘後就已經得返少量坐位飛同特惠企位門票。 我地本來都諗住放工先買飛，好在晏晝心血來潮想望下啲飛賣成點先發現就快賣哂！ 係球迷谷問係咪個個一早買哂飛所以先去得咁快， 點知個個都話未買飛！！ 我地最後買到兩張特惠票同兩張坐位飛，過多一陣啲人話已經賣哂。
主隊門票開售之後一個鐘內已經全部售罄，我地估可能有好多主場球迷知我地人少同埋一黎就係公開售票所以好多人㨂買作客飛入場， 所以我地即刻同球隊聯絡睇下佢地有無應對辦法。最後再同聖保利溝通下之後再 r 到多幾十張飛返黎然後由球迷組織分比球迷谷內未買到飛既人。 好可惜好多人都要失望而回…. 最慘係好多人好似我地咁一早訂左酒店，最後只可以去一個無波睇既旅行。
SVE 後來向大家解釋佢地睇返過去作客人數都無諗過會咁多人會買飛，所以無諗過要安排會員或者季票持有人優先既政策，但會向今次出現既問題學習，下次唔會一黎就公開售票等忠實球迷可以有應有既機會買飛先。 SVE 球迷對球隊既回應好滿意，第一次踢德乙唔會即刻乜都識，唯有下次改善！
今次四月既漢堡之旅我地一月就已經安排好一連串既行程～ 賽前既一個星期我地會先飛去英國探屋企人，然後會同屋企人一齊飛去漢堡玩兩日再落法蘭克福，最後佢地可以由法蘭克福飛返英國～ 倫敦南部既 Gatwick 機場有 Easyjet 可以飛去漢堡，每人只需 35 歐，機程一個鐘多啲～ 然後我地可以一齊搭火車玩住啤牌落去法蘭克福時候就無咁難捱。只係班機七點半起飛，我地四點就要出門口！ 星期五十分之漫長，星期六又有全日係漢堡觀光，終於去到星期日比賽日！
聖保利既球場 Millerntor 位於漢保既聖保利區，普通球迷通常係 St Pauli 站落車，而作客球迷就可以係 Feldstrasse 落車，出站後轉左行幾步就係作客球迷專用入口。 呢度既地標防左係 Millerntor 球場之後仲有一座經歷過二戰既超巨大既防空塔， 入場時大家都可以近距離望到座野回想一下歷史。 由於我地堅怕好多主場球迷買作客飛入場，所以搵人企係門口睇水，如果有人敢著聖保利有關既衣物入場既話會踢佢地走。 估唔到大部份人真係黎入場支持 SVE!
主場球迷今日準備左一個大型 choreo，紀念上星期剛離世既球迷組織核心成員。 呢位成員叫 Kiste，佢係上星期跟隨聖保利南下去 Karlsruhe 作客途中突然昏迷入院，當時大家未知 Kiste 入院後既情況，決定放棄係場內帶領打氣去為朋友集氣。 今日返到沒有 Kiste 既主場，開波前球迷先為佢默哀，然後係看台拉起黑布，前面掛起噴滿唔同 “Kiste” 既 Graffiti 既火車。我地都為左準備左一張簡單既大字報願佢安息： RIP Kiste。
係一片寂靜之下，場內播起 Hells Bells 既鐘聲，個感覺同平時係電視聽開既完全唔同。作客看台側邊既聖保利球迷噴發彩色既彩紙，球員就由對面角落慢慢行入場。SVE 史上第一場作客 Millerntor 既比賽開幕～ 上半場我企係作客看台前影相，望返上去的確係唔少人有拍手打下拍子咁，同埋聲勢都唔算太弱， 大部份時間我都唔係好聽到主場既打氣聲 ._.v 除非佢地全個球場一齊大叫 ST PAULI 或者啲簡單 Schalala 歌，其他帶有歌詞既都唔係好聽得出。 上半場我地有幾前個有威脅既埋門，把握得好啲可能一早領先兩三球。 最後比對方（又係）借角球入波領先。
唉，半場先失一球都唔算太慘既。 聖保利由開季至今都企係直接升班既位置，主場仲未輸過波再加埋我地已經連續三場無入過波，我地都唔敢有太大期望，執到一分都好滿足。 失左一球之後只希望唔好再輸得咁慘。。。。
下半場我走左上看台既最頂，旁邊有人飲到醉哂企都企唔穩既阿叔係咁講野，又話佢廿年前已經黎過又呢樣又嗰樣勁煩！！！ 呢個時候我地係右路突襲追返一球，我可以借慶祝之中既一片混亂閃去其他地方避開個阿叔。 哈哈～～ Neubauer 季初入左第一球之後話係佢人生第一個職業入球，黎到今日已經入左三個波！！十五分鐘後對方又入返球領先，無諗過我地一分鐘後由後備入黎既 Boyamba 再為我地追和！！十分鐘後再由拜仁借將 Wanner 既左腳勁射帶領我地反超前！！！！ 趁大家仲慶祝緊既時候我即刻狂奔返落去下面影下相留下珍貴既畫面～
落到去唔夠兩分鐘我地再有一個反擊，我企嗰個位望唔到底線，只係靠大家既反應去估發生緊咩事：JAAAA，我地竟然係今季未係主場輸過波既聖保利身上入到四球波！！ 當時仲有七分鐘完場，雖然我地係度慶祝緊，但內心一直總有一份不安…. 果然主隊係 93 分鐘又追返一球。 最後嗰五分鐘食住救心咁期望完場，終於比我地等到球證吹雞一刻，我地作客反勝聖保利拎到超重要既三分！！！！！！！
過去六場比賽我地只係贏過一場波，亦都只係喺贏波嗰場入過波。邊個會諗到我地竟然作客聖保利可以入到四球波反勝？ 今場波我地終於踢得返 SVE 式既進攻足球～～有好多球迷話最後嗰球係可以列入教科書既反擊例子！
呢一場波大家講左幾日都仲講緊，有少少唔抵得利華古遜係同一日創造歷史提早贏得德甲冠軍比佢地搶哂所有風頭。 見係沙比我先 gur d，都係嗰句，唔係兩年前比我地係足總盃第一圈收佢地皮重挫佢地自信心都未必會有沙比黎執教幫隊波改頭換面！ 不敗稱王真係好癲。。。
完場後我地返去酒店拎行李就去火車站等車返去法蘭克福。 由於修路關係，本來大約四個鐘既車程變成五個鐘，中間仲撞到動物所以再遲多半個鐘，最後差唔多要六個鐘先返到屋企。 好在我地齊腳可以鋤住 dee 捱過漫長既車程….
星期五我地重回主場迎戰史浩克，佢地既球迷已經開始腳震！ 😀