10.04.2024
英國足球冠軍聯賽 第 42 週
史雲斯 對 史篤城
Swansea Stadium
賽果：3:0 (1:0)
入場人數：14692 （約 600 名作客球迷）
門票：29£
更多相片

今次去英國租左架車其實係為左去一個新地方睇波：威爾斯！ 係 Groundhopper 世界入面威爾斯係被視為一個國家（因為有獨立足總同國家隊），呢個週中賽程剛好遇上史雲斯有主場賽事就正好借呢場波去打卡！

由修咸頓地區出發向西出發，經過 Bristol 同新既威爾斯王子大橋之後，大約兩個鐘之後我地就進入威爾斯既土地，路牌都開始出現威爾斯文同英文翻譯。 當日天氣極差，由出發到離開都係天陰同一直落啲密麻麻既雨。。。 第一站我地先係公路休息站度去個廁所同伸展一下，個便利店有好多威尼斯既手信買，大部份都係同欖球有關… 因為欖球先係威爾斯最受歡迎既體育項目！

第二站就係史雲斯既市中心，當地有個 1£ per hour 既停車場！泊低左架車就先去商場望下，然後就去左酒吧街度食 Nando’s。 如果天氣靚啲既話，我地會行去海旁睇下海景同沙灘。。。最後只可係街邊影幾張遺跡既相，然後急急腳搵地方避雨，好掃興！！！最後仲有超過兩個鐘先開波我地都決定去球場附近泊低架車先。

去到停車場閘口有個阿叔歡迎我地同準備收入場費 （7£），佢地通常只會同司機好機械式咁收錢然後指示你揸去邊，未見過有人會同車內其他乘客打埋招呼。呢個阿叔特登同我 say 埋 hello 然後問我地由邊度黎，我地話德國，佢話佢去過德國幾次，然後又話有套劇集係係德國拍既問我地識唔識，跟住問我地知唔知點行去球場，叫我地一定一定要經行人路過迴旋唔好走捷徑。到我地落車離走停車場時佢明明收緊錢都揮手同我地 byebye~ 好可愛～～～

由於時間尚早，而球場旁邊又有間 Costa，我地就入去買杯暖飲同磨下時間。十五分鐘之後就開始多人到排隊排到出門口，我地坐左差唔多一個鐘就去 fanshop 買紀念品然後就入場～ 由看台望落去草皮只係見到白矇矇一片。。。。 間唔中有陣風既時候仲會有啲雨粉飛過黎！！！

史雲斯既主場係同欖球隊 Ospreys 共用，係場內會見唔兩隊球隊相關既標誌。 隊波最威水就係喺 2008 年成為第一隊踢英超既威爾斯球隊。 近年係英冠打滾都有機會踢升班附加賽，只後都係失手而回未能升班。 我都係除左記得佢地踢過英超之外都無咩特別印象，淨係記得有個來自史雲斯既球員踢過利物浦 － Joe Allen 勾返起一啲好好笑既回憶。 簡單黎講以前好驚無人會想買走佢 xD 早兩年佢返左史雲斯應該係等退休？

史雲斯球場現時既官方名為 Swansea.com Stadium，以前曾經被稱為 Liberty Stadium，自由球場。 我地本來以為 Liberty 係佢地個球場既原名，但原來 Liberty 呢個名係來自 Liberty Development，即係係一個贊助商名，差啲比佢呃左！ 我地決定叫佢做 Swansea Stadium 就算。

今日好可惜睇唔到 Joe Allen ～～ 連後備席都無份～～ 但無名宿在場佢地都可以入到三球波大勝。 場波唔係唔好睇，但場邊有啲更吸引既事。。。 作客區旁邊有一大區係吉左出黎用黎做 buffer 既，但間唔中總會有幾個主場球迷有咁近坐咁近，然後隔空同作客球迷互相挑釁下咁。 我記得早幾日睇新聞話有威爾斯球隊向一名球迷發出入場禁制令，原因係大叫 english bastard 歧視死敵 Tranmere 球迷喎。 係場內如果我無聽錯既話，係作客看台最後既後生人間唔中有係度叫 welsh bastard，同時第一批零丁主場球迷又一直嘗試走近作客區（當中有小學雞），最後有警察入場帶左班主場球迷離場。 班警察仲同啲作客球迷落口工咁。。

下半場又有幾個後生仔想走近作客區，啲保安比左警告左佢地幾次之後最後都係帶佢地離場。 睇手勢佢地係咁指住作客區問「佢地都係度挑釁又唔見你帶佢地走？」班主場球迷都好好彩有球隊入三粒幫佢地出返口氣，令到班史篤城球迷好快就靜哂。 場內球迷真係個個就咁坐係度睇波完全無氣氛，第一次係聯賽賽事見識到圖書館！！！

完場後我地又要係雨中經行人路行返去停車場，然後一口氣揸返去英格蘭。凌晨一點返到去仲有屋企人煲定既靚湯飲可以暖身～～～～星期四去飲茶買餸打下麻雀，星期五一早就出發去機場向漢堡出發！