09.04.2024
英國足球冠軍聯賽 第 42 週
修咸頓 對 高雲地利
St Mary's Stadium
賽果：2:1 (2:0)
入場人數：28564 （2031 名作客球迷）
門票：26,50£
更多相片

過完復活節之後既比賽週我地又要去漢堡作客，二月試過搭飛機來回的確係慳好多時間，咁岩今次英國有週中賽事，我地可以用盡啲假期就決定先飛去英國去幾日旅行，然後由英國飛去漢堡！

兩老搬左去英國南部無直航機可以由法蘭克福直達，最近都要搭去 Heathrow 再加大約一個鐘車程。 今次行程睇左唔同安排之後最後我地決定飛去 Gatwick 然後租幾日車自駕，租車平好多！ 然後由 Gatwick 有 EasyJet 可以搭廉航去漢堡～ 唯一既挑戰就係只可以戴放得落座位底下既行李。

星期一朝早由法蘭克福出發去機場，搭上只有 50 個座位既迷你飛機，諗住成班機都係二二咁排我地一定有窗口位就好開心，點知我地可以唔好彩到被編去右邊最尾嗰行，成班機得呢個位無窗口囉！！！ 落機之後要由 North Terminal 去 South Terminal，見仲有少少時間就先去 M&S 同 Pret 買早餐同飲杯咖啡先再去拎車。 我地經 Avis 訂左最平既五門車仔只需大約 40 歐一日，最後拎到架 Nissan Juke 就出發。

頭兩日都無咩行程，場波係星期二晚先踢。 星期二朝早去超市同啲 business parks 行下街就返去打牌，然後去左 Southampton 一間由香港人開既日本餐廳食飯，叫六本木！ 叫左一碟壽司拼盤（啲魚生好新鮮！）同每人一碟飯或者拉麵同野飲，總共都係九十鎊左右（現金／過數有九折～） 食飽之後就搭家長車去到球場附近既油站。

今次無帶埋兩老去睇波，因為佢地已經去過兩次無哂興趣 xD 我地經過作客球迷入口之後就去到球場正門，咁岩見到有 When the Saints go marching in 既現場表演！係 Club store 入面買埋手信就去位於球場另一邊既閘口出發。St Mary’s 位於海旁既工業區，要去買新鮮海產我地都會去球隊附近既魚店買餸！早兩星期有球場旁邊既塑膠貨場火燭令到主場賽事要改期，今日我地仍然見到災後，完全可以想像到點解場波要延後。

入閘後我地好快就埋位，英國球場既好處係啲座位全部都好乾淨！！！呢度仲要有咁多海鷗都無雀屎～～ 仲有塊草皮勁靚，同某隊德丙球隊既大農場相比真係差十幾 Level!! 今日兩隊波都爭緊分要升班，修咸頓既形勢比客隊好啲，而高雲地利係週中竟然帶到 2000 名球迷南下作客，主隊既波飛差唔多賣哂，好少可我地身旁兩邊都會坐滿人～ 等到開波前再次有 When the Saints go marching in 既現場表演，開波後間唔中都會有人帶起呢首歌黎唱。

呢場波出奇地好睇，節奏明快有上有落，真係要兩班球員都真係肯出力去爭分先可以咁緊湊！ 主場靠個十二碼領先，係完半場前再入多一球。 落後既作客球迷仍然間唔中會出聲打下氣（係英國黎講算係少見），下半場追返一粒再帶返起場內既氣氛，最後總共有三個入球完場～ 失去呢三分，高雲地利既績分同附加賽距離被拉開，相反修咸頓就有機會試下搶直接升班！