06.04.2024
德國足球乙組聯賽 第 28 週
SV Elversberg - 1. FC Magdeburg
Waldstadion an der Kaiserlinde
賽果： 0：0
入場人數： 8864 （約 1200 名作客球迷）
門票：季票
更多相片

黎到四月德乙賽事踢一場少一場，慢慢開始擔心會唔會係倒數緊我地係德乙既時間… 一直以為我地會贏一場輸一場可以間唔中執到一兩分護級，點知而家五場得三分，就連對住榜尾既球隊都輸得勁慘烈，到底最後護級之路會有幾緊湊？我地已經係主場連輸兩場仲要一球波都入唔到，今日迎戰又係連續四場無入過波既 FCM, 我地已經唔敢期望太多，三分係必須的，但我地又做唔做到呢？

今個週末又吹南風～天氣突然變暖最高溫有成 25 度，個個都即刻好興奮咁著 t shirt 入場。上年呢個時候我地去瑞士睇波係無啦啦落大雪，一年後差唔多日子係春天既感覺～ 但呢陣風帶埋撒哈拉沙漠既沙黎令到空氣質素變到好差！

由於今場既對手係以氣勢黎講我比較偏愛既 Magdeburg，我一早就決定左會全場係留係傳媒席正面感受客隊既打氣氣勢。 仲記得去作客時大家比對方既咆哮嚇親，今日我都好希望佢地可以比場內既普通球迷見識一下。 班核心球迷去到開波前十分鐘先到場，真心想知點解次次睇佢地作客都無次準時？？？佢地今日仲號召黎作客既球迷一齊慶祝 1974 年成為歐洲賽冠軍既 50 週年紀念，一齊著印有 74 號既藍白色風褸黎莎蘭。佢地入場後就趕快係看台前掛起橫額， 唔同既係，佢係作客時係唔會帶任何旗幟，全場只用自己把口同隻手黎為球隊打氣！ Magdeburg 有咩咁特別？ 以東德球隊黎講其實只係正正常常既一隊波，而東德大球隊既「正常」係指有種波蘭風格，全個看台都會參與打氣。

客隊無論主場定作客都會係上下半場開波後一齊高舉隻臂一齊咆哮 FUSSBALL CLUB MAGDEBURG！ 我見佢地一舉手就即刻拎起部電話想拍低做個紀錄，可惜兩次既氣勢只係麻麻，完全唔會比佢嚇親囉。 本來我仲好擔心佢地對正主看台會好容易蓋過 Block C 既打氣聲、但好老實講兩邊既聲勢都差唔多！上半場睇睇下波留意到對面個看台有啲唔同左，原來有兩個矇面人係後面噴 Graffiti～ 三個大字 FCM，加 ACAB 同球迷組織既簽名。 佢地同 Rostock 出左名中意周圍搞事，估唔到今日終於比我地現場見證到場內 graffiti 既誕生 xD

講返場波，受到過去兩場波影響我地都唔敢對自己太有信心，同時又覺得對方已經連輸四場無理由我地贏唔到。 好可惜對方就算踢得差都唔代表我地會踢得好。 睇落班球員好似落力左，但技術上唔知點解好似降左呢咁仲係好多失誤睇到勁激氣！！！ 如果唔係有 Kristof 救左幾個必入球我地今日又會比人大炒囉。

最後 0-0 完場，可以話係一個合理既賽果。 對上一次 0-0 應該要數返去 2022 年 9 月德丙作客 Meppen，諗起當日又係又熱又焗抖唔到氣咁。 睇黎我地隊波太凍唔識踢波之餘太熱都唔識踢勁玻璃！！ 完場後雙方有好幾個球員都即刻攤係草皮上面好似踢完決賽咁，睇得出大家都出盡左力想搶分。

咁樣完場大家反而唔知比咩反應好，雙方球員意外地平靜，等到球員去到看台前就好簡單拍下手9叫幾下就完事。一分好過零分，每一分對護級都好重要！我地下場重回漢堡作客榜首既聖保利，大家已經預左輸波而回，平常心面對。