30.03.2024
德國足球乙組聯賽 第 27 週
Eintracht Braunschweig - SV Elversberg
Eintracht-Stadion
賽果：5:0 (2:0)
入場人數：20110 （約 200 名作客球迷）
門票：19,30€
更多相片

期待左好耐既復活節長假期要去中部作客，本來諗住特登落去莎蘭然後搭六個鐘球迷巴士，見球巴士飛每人要成 45€ 就覺得好貴；諗住改搭火車上去點知又遇上整路，車程由本來三個鐘左右變成五個鐘。 最後都係揸車上去即日來回就算。

隊波既近況唔算話特別好，贏一場輸兩場咁，硬係達唔到關鍵護級 40 分。今日作客由季初到而家長期係降班區掙扎既 BTSV 都叫做有少少信心，更何況我地上半季係主場仲輕鬆炒人地三蛋，希望可以好似上場作客 Fürth 咁既表現就心滿意足。

我地係武肺之前黎過 Braunschweig 睇過佢地對凱莎羅頓，當時仲係市內兜左個圈印象都唔錯。係市中心可以搭電車直接到達球場門口，來回勁方便。今日我地就可以免費泊低架車係正作客球迷入口前既停車場！ 入場後就先上看台望幾眼，然後就去買野食。 7,50€ 咖喱腸配薯條咸左少少，加杯啤酒就岩岩好～

係場外見到主場球迷掛左大字報話今日有 choreo 捐款活動；想捐錢比球迷組織除左入錢落錢箱之外，仲可以將有 1€ 按金既膠杯掉入球場場邊，球迷組織就有人定期去執杯。 呢個 idea 其實幾好，唔洗自己去排隊還杯之餘又可以當捐錢，掉入球場又唔洗驚比啲細路執走左。 呢個方法係呢個球場可行係因為場邊有田徑場，看台同草皮相隔一段距離，正常唔會掟到球員影響比賽～ 其他球場通常係要用個上左鎖既垃圾筒比人掉個杯入去。

SVE 仍然受傷兵影響 （我估到季尾都應該唔會好轉，只希望唔好再有人傷，特別係防守球員！！！） 要用怪陣出戰，後備席得個一個老人後防…. 但講真，我地既殘陣都捱左咁多場，唔明點解今場可以咁不堪一擊。。。對方係六分鐘就靠角球頂入，之後有幾次有威脅埋門我地都仲頂得住，上半場都仲好地地，兩方有攻有守咁。 去到完場前補時一分鐘，對方連續兩次角球，最後第二次開出又係同一個方式入波。

失左兩球都未算絕望既，起碼仲有半場休息時間溝通下講下策略。點知下半場我地越踢越差，勁多醫院波又走錯位，唔係有 Kristof 我地應該輸多幾球。 中段禁區手球轉多球十二碼，完場前中場甩波比左機會對方埋門窄位射入，去到真完場前再失多個角球頂入。 今季第三次失五球波。

對方上場主場先對住同埋係降班區掙扎緊既 Rostock 輸波，今日就大炒我地五蛋，應該無人諗過兩隊波今場既水平相差咁遠。 輸比榜首既 Kiel 我地都心甘情願，但對住排名比我地差既球隊都輸得咁慘真心好唔憤氣！！！！！ 失左呢三分我地又失去同直接降班區之間既差距，由本來既八分變到得返五分。 然後個個即刻勁悲觀開始作最懷打算。 你諗下我地上季本來有差唔多廿分既優勢都要玩到最後一場先確定失班，今季九成九又要緊張到最後。。。。