16.03.2024
德國足球乙組聯賽 第 26 週
SV Elversberg - Holstein Kiel
Waldstadion an der Kaiserlinde
賽果：0:2 (0:1)
入場人數：8184 (約 500 作客球迷）
門票：季票
更多相片

眨下眼又一個星期，今仗對手係爭緊直接升班席位既 Kiel，同時仲係今季作客成績最佳既球隊，大家既希望係拎到一分就已經心滿意足。

星期六一早食完早餐就出發去莎蘭，係法蘭克福既天氣預報係陰天間中有陽光，而 Elversberg 就會有驟雨。 我想今年次次返去主場我以為自己可以係場邊曬下太陽，但次次都係濕身而回。 今日同樣行去球場時候就開始落大雨，到底幾時先會好天？？

作客球迷係開波前一個鐘已經到左球場，賽前話預計會有五百人到場，佢地來回距離要成 1500 公里，有三百人黎到都已經要 Respect! 佢地成棚人去左上層既坐位區，視線應該靚好多同埋可以食多啲迴音。去到開波前落暴雨下層既人都係要有咁後企咁後去避雨，係去到下半場終於出太陽既時候先多啲人企返去前面。

由於落雨關係我都無諗住落去場邊，走去主看台既傳媒席就算。傳媒席今日坐到滿哂，好在我早到先仲搵到個位。 事關隊波傷兵多過後備席既人選，我旁邊比借將 Faghir 同 Sahin 坐左，後來仲黎多個 Koffi，仲有另外兩個傷兵要坐其他吉位。 去到呢個時候可以證實自己細個既痴女心已經無左，十年前如果出現呢個情況我一定勁興奮想搵佢地影相又要搭下咀咁 ._.

上半場我地其實踢得算唔錯，機會唔多但後防都守得幾穩令對方都無咩機會。 班作客球迷係前我對面，佢地乘住大風可以就咁棟高啲旗連搖都唔洗搖。 好多球迷因為視線被擋所以雨細左之後走左落去下層既企位看台，令到視覺上好似多左好多人咁～ 去到完半場前幾分鐘，又係因為大意送左個波比對手，間接幫人造就個攻勢入波。

呢兩個星期大家係度討論一兩首新歌，今日半場休息時間係 Block C 大家爭拗完試唱邊首之後就係下半場開波時由前面幾個人帶頭慢慢越唱越大聲。 首歌原名係 Bad Moon Rising，係大約十年前既世界盃由阿根廷球迷唱起，我地潮左十年先突然愛上呢首歌然後改詞大約意思指無論贏輸我地都會陪你出戰（諗諗下全部打氣歌唔係都係咁既意思？xD） 唱左大約十分鐘等大家熟習下先，然後就如常唱下其他歌。 下半場開波無耐對方就入左第二球場，我地完全無還擊之力。 今場波同上場對 Wiesbaden 既感覺唔同，輸波好似係意料之內，只係覺得班球員可以注意力習中多啲。

而我地去到 80 分鐘左右就開始唱新歌，唱到完場啲球員行過黎都無停過，希望佢地聽得明同埋可以比我地既正面之歌感染到唔好太氣餒。 對方球員就超開心同班球迷一齊慶祝，因為佢地距離直接升班又拉近左三分！ Block C 唔知做咩個個好似 hang 左機咁完全停唔到唱新歌，唱到啲球員走哂做埋 cool down 都仲 loop 緊，班作客球迷都企係度睇我地做乜9 輸波都咁興奮，哈哈～～ 唱左十分鐘之後鼓手停鼓之後大家終於冷靜返落黎，然後無啦啦有人又帶起首歌，大家又開始唱多十分鐘好似撞左邪咁 xD 跟住場邊保安問我地做咩停落黎佢仲未聽夠，大家又為左佢唱多幾 round。 咁多年來好似未試過賽後咁樣唱歌慶祝，無諗過今日最後大家係輸波既情況下抱住異常靚心情離場！

下星期係國際賽程無比賽，我地終於可以有一個週末自閉係屋企！ 之後就係復活節會去中部作客，希望班球員可以趁呢兩個星期重整心情然後一齊去搶分護級～～！

最後送張獨家賀治比既背脊比大家 xD