18.02.2024
德國足球乙組聯賽 第 22 週
SV Elversberg - VfL Osnabrück
Waldstadion an der Kaiserlinde
賽果：3:1 (3:0)
入場人數：8026 （約 500 名作客球迷）
門票： 季票
更多相片

今個週末我地係主場迎戰今季既魚腩！ 佢地同我地一齊升班但命運大不同：開季至今只贏過一場波得十二分。班球迷都已經認命知道自己只係唔小心升班，唔對隊波要求啲咩，只希望佢地每場認真踢就夠。而呢場波對我地黎講係好重要既一場： 要護級就必定要係魚腩身上取得三分！！ 仲記得上半季作客既時候我地身處西班牙海邊勁緊張咁睇文字直播到完場，當時球隊成功取得德乙歷史上首場勝仗～ 黎到賽前我地不斷重提希望可以挫下佢地既士氣…

早兩星期係掛紅旗既主場上贏凱莎羅頓，估唔到今日對住隊無咩吸引力既球隊都仲可以掛紅旗！不過點都要提下原本既臨時作客看台已經約滿拆卸，黎緊 Block C 對面龍門既位置將會開始擴建工程。 Osna 既球迷今日會用新既臨時作客看台，以球隊現時既成績同埋距離都可以有 500 人黎到支持球隊絕對係要 respect！

今日有幾個原因我決定全場波留係記者席，最主要原因係班後生仔既其中一個戰友要返智利，佢地寫左大字報支持佢同等佢返黎希望我可以幫佢地影返張相。 咁個記者席可以直望作客看台又可以清楚見到 Block C，同時又可以認真感受下主看台既氣氛係普通比賽下係點～

Osnabrück 既球迷係看台上掛起好多有代表球隊顏色既紫旗，當中左一大塊黑白橫額寫住反對投資者入侵德足聯！ 佢地隊波係第二輪投票選擇左棄權，可能知道無論最後通過定失敗隊波都無份受益？係過去兩個月，各大球迷組織搵左唔同方法去抗議，由最初既靜默 12 分鐘、向球場掟朱古力，然後向球場分批掟網球令到賽事每幾秒就要停一次，最近就係係看台上舉起印有投資者標靶大旗同埋放搖控車或者搖控飛機落場走圍跑，目的就係要中斷賽事令到德足聯同有份投票既球隊清楚見到：你既決定不代表我。 呢樣亦都係德國足球最可貴既地方，對比其他國家德國足球的確係有啲落後，但起碼班球迷唔洗日日要擔心自己隊波第日會唔會變左第二隻色或者連名都唔同左，唔洗驚隊波會被賣下賣下變左隊中東球隊，唔洗驚來季無啦啦要比近百歐先入到場。

上個星期已經有幾隊波企出黎話要求重新要一個公開既投票，有啲甚至本來投贊成票既球隊都因為班球迷而改變態度，特別要提既係漢諾威。 原本既匿名投票之前，佢球隊會員內部投票係決定左投反對票，點知班主 Martin Kind 偷偷地投左關鍵贊成票，令到本來已經勁憎 Kind 既漢諾票球迷更加憎佢，另外亦矛頭指向德足聯明知 Kind 係違背 50+1 亦即係球迷意願去投呢一票都仍然接納，最後球隊發聲明話佢地唔會承認佢地嗰一票。 去到呢一刻德足聯仍然企硬話唔會重新投票，我地就睇下佢地硬頸得幾耐！係呢幾輪既抗議我最不滿既係電視鏡頭會特登唔影看台上發生既事，明顯係 DFL 落 order 唔可以播比普通觀眾睇，勁黑暗！！！

返黎今場波，班作客球迷準備左堆網球同大字報係場邊抗議，但係開波前被發現佢地剪爛同扯起左看台前既擋波網，搞到班球員遲左十五分鐘先可以開波。 開波幾分鐘後佢地就分左幾次掟網球落場，有好多 SVE 球迷表示不滿。。。 只可以話好多鄉下仔都唔知班作客球迷既用意，好多淨係諗住入場睇波既只認為班球迷係搞事者。 就連我地既球迷組織亦都無明確同其他球迷講下呢兩個月既風波，只係簡單咁靜默抗議過兩次。

有個家長抱住一個熟睡緊既 bb 坐左係我旁邊… 心諗佢係咁既環境下都訓得著算唔算係一個 talent? 過多廿分鐘個小朋友突然醒左然後左望右邊，十秒後我地就先入一球！！ 兩分鐘後又再入多一球，去到完半場前原來班球員想等小朋友起身先入波 ._. 係十分鐘內我地有三個球員各入一球，全部都係來自拜仁青訓 Rochelt 既助攻！ 早幾場仲比人鬧緊佢獨食，呢兩場大家終於睇佢順眼返啲 xD

當我地以為下半場會再入多幾個入球睇既時候， Osna 轉變成全攻模式攻到我地大部份時間都離唔開自己半場。班作客球迷係下半場完全停止打氣廢事浪費自己既氣力… 最後比佢地追返一球之後令我地本來覺得贏硬都開始驚…. 不過呢球波係 Sportschau 睇返精華明明個波已經出左底線，本來就唔應該有呢個角球，無呢個角球就唔會比佢地搵到機會入波！ （又或者可能係呢個 －6 入球救左我地？？） 等到球證吹雞完場先可以鬆返一口氣，今季第一次係主場兩連勝！

下半場我地將會到漢堡作客，比去史浩克同柏林作客更期待，因為我從來未去過漢堡睇波！！！ 唔知我地會唔會成為漢堡剋星呢？？