11.02.2024
比利時職業足球聯賽 第 25 週
KV Mechelen - KRC Genk
Stadion Achter de Kazerne
賽果：1:1 (1:1)
入場人數：13567 （ 800 名作客球迷）
門票：28€
更多相片

去得德國西部我地通常都會㨂去荷蘭或者比利時睇多一場波，今次就㨂去完 Düsseldorf 之後就去布魯賽爾以北既一個小鎮 Mechelen。星期六晚係朋友屋企食完飯之後就出發，大約兩個半鐘既車程就到達市中心既酒店。

間酒店既早餐有好多比利時既特色食物～～ 一入餐廳就見到好多好吸睛既 pastry，唔知係咩餡都每樣拎左一舊先，搽麵包既又有當地名物 Lotus Biscoff 醬（我屋企長期有一罐週末會食）同純朱古力醬。 最唔少得既一定係窩夫機！！！ 跟住指示花大約兩三花鐘就可以自製新鮮熱辣既比利時窩夫！話說尋晚朋友煮左勁多野食我地為左今日會有好天氣所以夾硬食哂，果然原本天氣預告係話今日會落雨，而我地最後係望住多雲間中有藍天既風景食早餐！

Check out 之前我地先去超市買手信，去到比利時我地通常都會買啲啤酒返去，例如 Chimay 係平德國差唔多兩倍、德國普通超市又無 hoegaarden，仲有果酒 Lambic 係當地只係普通飲品又係平一大截。係比利時仲可以買到 Sensations 薯片，同埋好好味既牛油蛋糕！！ 買夠就捧返去放係架車度，留低架車係酒店我地就出去市中心半日遊。

三點左右就由酒吧出發行去球場，路程大約 20 分鐘。 入場後去 fan shop 買左條頸巾就去搵自己個位。 今場波被主隊列為 A 級賽事會有購票限制，而限制就係購票戶口必須係 2021 年之前註冊先可以買飛。 我地早幾年已經想去睇一場波而買左個戶口，但當時係要有購票歷史先可以買飛去唔成，估唔到今日佢地降低左要求令我地可以買到飛～～ 我地㨂左作客看台旁邊既看台，28€ 已經係可以望到哂主客看台最平既波飛。。。經歷過威尼斯球場嗰碌柱之後，今次我地都好小心咁㨂位。 坐太低會比龍門擋住睇唔到波，坐高啲又會比柱擋住視線，最後㨂左中間最後嗰行，雖然都係比碌柱分開左個作客看台，但條柱右邊既作客球迷無咩點參與打氣，睇唔到都唔會蝕。

Mechelen 既打氣球迷分成兩部份，一部份就係行 Ultras 路線位於龍面龍門後面；另一部份就於位主看台對面中線旁邊。 唔知佢地係氣勢弱定係點，成場波除左一兩下有威脅既攻勢之後都聽唔到佢地既打氣聲。 簡單黎講就好似英國咁。 另一個原因就可能因為我地坐得近作客球迷，佢地 90 分鐘不斷打氣可能蓋過左主場打氣聲既。 但係再一次係比利時覺得失望…. 兩部波一隊睇過佢地作客，另一隊睇過主場，當時既印象都算唔錯，點解今場會令我地回想上年 Antwerp 場波？

上半兩雙方各入一球之後其餘時間都係係度拉鋸，相機都再無拎過出黎。唔知係咪因為我入場前飲左兩杯重酒精既啤酒搞到好想訓覺….. 但我地坐正係龍門後面又要打醒精神要避波，係頂唔順既情況之下都係要拎部電話出黎碌兩碌用黎提下神。 完全無諗過被警方列為高風險既賽事最後會悶到咁！！

完場後我地原路行返去酒店，球場相隔幾條街係監獄，個個企係窗邊對住啲球迷係度9叫好好笑，可能呢個係佢地每兩星期最好既娛樂！ 係路上買左包薯條做晚餐，比利時既薯條真係好好食！！！！ 好滿足咁直踩四個鐘返法蘭克福～