10.02.2024
德國足球乙組聯賽 第 21 週
Fortuna Düsseldorf - SV Elversberg
Düsseldorf Arena
賽果：1:1 (1:0)
入場人數：31034 （約 500 名作客球迷）
門票：16€
更多相片

上半季我地㨂左放棄兩場波而去西班牙放暑假，第一場就係主場迎戰 Düsseldorf，當時覺得自己好彩唔洗親眼見到隊波點樣比人大炒五蛋，再加上開季之後一直都未能贏波。 今日係嘉年華期間要去到北威州作客，唔知大家會唔會要苦中作樂呢？

係德國最出名會慶祝嘉年華既有緬恩斯同科隆，Düsseldorf 同莎蘭同樣都係會慶祝既地方，所以當賽程一出大家既反應好兩極：嘉年華週末要去北威州係自己攞苦黎辛？ 嘉年華週末可以睇波又可以去北威州慶祝！！！我地就只希望可以路路暢通咁來回就夠。 球迷組織 HF 係賽前帶起變裝活動，叫大家一齊變裝去作客，係球場內好好慶祝一番！ 好多人㨂做球隊吉祥物：黑白色既熊貓～ 組織成員就圍內一齊著運動衫聲勢浩蕩咁入場。 我地就將自己裝扮成… 球迷～

星期六一早我地由法蘭克福出發，車程只需兩個鐘多啲，好好彩一啲塞車都無，仲可以經過利華古遜遙距同沙比係心打個招呼祝福佢收拜仁皮～ 去到場外同主隊既球迷大使溝通下佢地會點樣帶我去影相。 升上德乙之後我地先第一次同球會正式申請 pass 去幫 HF 影下相，程序相對簡單，我地只需要同 SVE 既球迷大使講聲佢地就會幫我地同主場球隊溝通。 大部份球隊既安排都好簡單， 會將個 pass 經我地既職員交到我手，通常都容許我可以係主客看台遊走。 唯一一次麻煩啲既係作客凱莎羅頓只可以係開波後十五分鐘內有人接我到場邊影相，今次既安排同凱莎羅頓差唔多，唔同既係我可以㨂想去邊。 本來佢地話會帶我入草皮邊，但我見由低影上去個角度麻麻地我就話最好可以去主看台嗰邊。 個阿姐就帶我係場內入去場下既停車場，然後經過幾道閘再去搭電梯去到高層看台。

我估佢都唔明我地得幾百人有咩好影，咁都可以企係度影成十幾分鐘，張張相都差唔多樣。。。。 anyway，夠鐘我就叫佢帶我返作客看台。 通常我都係會等到半場先再走，因為怕會錯過啲重要時刻。 估唔到同凱莎羅頓場波一樣，一踏返入作客區未入到看台就聽到對面既球迷慶祝。。。 1：0！ 衝到入看台就只見到對面七彩繽紛既球迷係度慶祝。 明明睇落我地都踢得唔錯點解咁快就失波 T_T 好彩下半場開波後唔夠十分鐘我地就追返和，作客看台上既氣氛都好返左少少。 我地個個都覺得有一分就已經心滿意足，特別係同上半季相比我地今場踢得好好多，唔再係比對方㩒住黎食。

去到完場前我地有個半單刀射左個波入網。。。。 個個開心到以為絕殺可以拎三分。 可惜最後被 VAR 判越位食詐糊。 聽人講個越位只係相差一隻腳板，肉眼唔會睇得出，就連旁證同對方球員都無投訴。 Anyway，正如頭先所講，有一分都已經好夠。 下場先係必定要贏，對住今季只贏過一場波既升班馬絕對唔可以甩碌。

離場後我地去左朋友屋企作客，簡簡單單咁慶祝下新年聚下舊，然後就繼續向比利時出發….