04.02.2024 德國足球乙組聯賽 第 20 週 SV Elversberg - 1. FC Kaiserslautern Waldstadion an der Kaiserlinde 賽果：2:1 (1:1) 入場人數： 11150 （約 4000 名作客球迷） 門票：季票 更多相片
連續幾場不勝之後通常都會唔係好期待下一場波，好擔心弱小心靈會繼續受傷害。今個星期返工超忙，忙到個腦實哂完全運作唔到，我知唯一可以打救我既只有令我可以忘記場外一切既足球，令我一直都好想星期日快啲來臨，無論贏輸和都好，我既訴求就係要睇波！
賽前兩日傳出消息今場波執法球證係深受德國球迷愛戴既艾迪堅 Deniz Aytekin!!! 我知德足聯既球證係德甲乙都要吹，只係無諗過會派艾迪堅黎鄉下地方～～ 個個都好開心話我地終於可以係場公平公正咁踢返場波！！ 特別係上場比個 on9 球證亂咁吹搞到我地失分而回 >_> 球證係球迷永遠既敵人，但艾迪堅係少數可以保持執法水準同埋係一個可以溝通既球證，佢係啲訪問會都會話自己同球迷亦敵亦友。總之大家都好期待見到呢位球證界既明星！去到開波前大約一個鐘之右，佢終於現身自己一個係球場跑左三個圈，看台上既球迷都向佢鼓掌，佢笑住比手勢示意「低調啲低調啲」～
今日將會係臨時作客看台既最後一場，用埋今場就會拆御然後就會開始擴建工程。 上場主場對漢諾威係主場台對面已經出現左一個吉既新看台，係賽前臨急起既臨時 Block B 既翻新版。新既 Block B 同樣只係臨時看台，但一部份會係餘季會被劃分為作客看台。 係賽前幾日先成功獲得德足聯批准可以賣飛，十五分鐘內呢三千張主客門票迅速售罄，意味住入場人數將會再次破紀錄！！ 其實球隊都好醒，趕到係呢場地區大戰開哂四面看台～～
上半季作客時都有提過下，凱莎羅頓位於莎蘭邊境，名正言順成為州內最受歡迎既球隊。係西南地區聯賽我地多次遇上佢地既二隊要去上山作客，又或者好多莎蘭人第一次出城睇波都係上山去世界盃球場睇過波見下世面。今日終於到佢地人生第一次要黎到鄉下地方作客～～ 當然過去都曾經邀請過佢地黎踢友誼賽，但今次係兩隊波係聯賽第一次係度碰面！ 慶幸既係，呢兩年 SVE 既球迷增長左唔少，C1 看台已經唔會再見到著住其他球隊衣物既人出現，我地總算唔洗比人反客為主！！我地估好多來自莎蘭既凱莎羅頓既球迷都好開心終於可以有人隊來自自己鄉下既球隊可以支持下，賽前後既氣氛都算平和，只係人地始終都係唔係好甘心要同我地同一個 Level 比賽～最重要係：佢地排名係我地之下，係降班區附近掙扎緊！！
但佢地岩岩先贏左兩場波，大炒史浩克同係足總盃踢哈化柏林出區晉身四強，士氣高昂。 對住我地已經跨年連續五場不勝…. 個個都睇好佢地可以繼續贏波。 我就咁睇，呢兩波只有兩個結果：一係佢地贏，一係佢地輸 xD
好啦，講完廢話。 賽前我地有對方既球迷報料，佢地開波前會有個旗海 choreo 同埋準備左兩箱檸檬比賽期間用。 我係主看台終於搵到一個唔會比人趕既位，就係傳媒席，仲可以好清楚無人頭擋住兩邊龍門後既看台！！！作客球迷係看台前掛起紅底白字既大字報：向投資者說不。 今個星期各地球迷無再係頭十二分鐘靜默，而係改變策略向球場掟網球中斷進行中既比賽。早一日既哈化柏林作客就令場波暫定左差唔多半個鐘，佢地等啲保安每次執完一個波先再掟下一個玩足三十分鐘，最後要領隊同球員去求佢地先肯停。 今日 d Lautre 就準備左同樣係黃綠色既物體黎掟，配合一張大字報：德足聯既投資者計劃令我地好憤怒呀！ 佢地玩食字將同樣係 sauer 既憤努同酸一齊用，向球場掟檸檬！ 貪食既艾迪堅即刻走左去執一個黎食 😀
係佢地掟檸檬前既十分鐘，我地其實靠來自拜仁既 18 歲借將 Paul Wanner 建功領先，佢右腳接應來自左路既傳波然後用左腳勁射破網，完全係可以踢拜仁既質素！！！後來多得檸檬之亂搞到補時補到八分鐘，係完半場前對手黎個禁區外靚射追和。。。。 我即刻回頭望 Block C，看台內完全無人慶祝。 我以為會有卧底忍唔住會露出真身！！ 心諗，唔通又係劇本，係咪真係要 copy 上半季既賽果？
下半場隊波向我地呢邊攻，開波後十分鐘對方犯手球送左個十二碼比我地再次領先。 其餘時間只可以用唱歌黎發洩大家緊張既心情，Block C 越唱越大聲，見到主看台同 B 區都有唔少人加入埋一齊拍手跳下咁。 去到九十分鐘宣布補時又有成六分鐘，大家即刻勁驚。。。。 領先一球先最危險！！！啲攻勢又全部係哂對面唔知發生緊咩事。 捱左六分鐘之後，艾迪堅終於吹雞完場，此時個個飛杯慶祝，大家一身都係啤酒～～ 贏波，我地贏西南地區傳統勁旅凱莎羅頓！！！ 係人地 124 年球隊歷史第一次作客 Elversberg，第一次對 Elversberg 輸波；係超過 30 年來第一次有莎蘭球隊對住凱莎羅頓贏波。係凱莎羅頓呀！！！
完場後班球員好快就黎到看台前同球迷一齊慶祝～ 賽後好多人都係我地踢左場好波完全值得呢三分，對方輸左呢場波之後係聯賽榜排係尾四，同直接降班席位只有一份差距。 我地就由第 12 位升返上第 9 位，離護級之路只差 12 分！