27.01.2024 德國足球乙組聯賽 第 19 週 FC Hansa Rostock - SV Elversberg Ostseestadion 賽果：2:1 (0:1) 入場人數： 24000 （45 名作客球迷） 門票：20€ 更多相片
唉，都唔知點樣開始講今個比賽週好。 見到個對方個名就即刻回想起季初係補時階段射失十二碼然後反輸，仲來未試過睇波可以反高潮到咁；以為咁既悲慘經歷係人生中只會出現一次咩？ 唔係喎，再黎過都算，然後仲要係對住同一隊波再 loop 過。。。。
賽程出左之後我地睇左唔同方法點樣去位於波羅的海既 Rostock（btw 德國人叫波羅的海做 Ostsee，直譯即係東海）；即日來回有點太 chur 身子老了頂唔順，要睇下係邊度過夜會好啲？ 揸車既話以法蘭克福做起點就差唔多 650km，無塞車既話預六個鐘單程；搭火車就可以經漢堡或者柏林再轉車上去。最後我地㨂左星期五搭火車出發去柏林然後第二朝再搭火車上去，回程就經柏林凌晨可以返到法蘭克福。 揸車既話經漢堡會快啲，但搭火車的話兩邊差唔多時間，但柏林來回 Rostock 既火車班次密啲，有咩事都仲有一兩班車可以趕去。
就係比賽前一個週末，火車司機公會宣布第三波罷工，一連六日由星期三到星期一。 早排罷工對我地都無咩影響，最多留係屋企，去機場可以搭 Uber 慳啲時間。 但今個星期我地算係完美計劃左一個作客之旅咁樣比佢地搞亂哂！ 早兩年我地去奧地利旅行時同樣遇上罷工，嗰陣要係慕尼黑轉車就算罷工每個鐘都仲有一班車去法蘭克福，只係架車滿到爆要同人爭位咁。 諗住柏林來回都應該會係咁… 我地就打算會照搭火車去柏林，但會係柏林租車來回 Rostock。
罷工消息一出我地就即刻上網搵車租，當時仲租到 60€ 一日都可以接受，算係暫時解決左去 Rostock 既問題，起碼可以睇到場波先，只係回程可能會遲一兩個鐘。第二日火車公司就出左緊急班次，我地發現柏林去法蘭克福既班次全部取消哂….. 即係我地得返最後一個方法，就係揸車。 但係我地又訂左係柏林既酒店無得退款，就算經柏林上東海遠好多都唯有要去柏林一轉。 就係咁，我地星期五四點收工就即刻出發，連埋中途食飯休息預大約十點到達。
點知出師不利，未上公路就已經塞到返出黎；我地為左避開塞車就要兜入法蘭克福經小路去下一個公路入口；好好彩呢個成個週末唯一一段塞車，最後我地十點半左右去到柏林北車站 Gesundbrunnen 附近過左一晚夜。 Gesundbrunnen 地區有好多土耳其人聚居，第二朝我地去左土耳其早餐店度食早餐，芝麻麵包 Simit 好好食～～ 係呢度唔夠十二個鐘我地又再出發上路，唔係見到 d 地鐵同車站標誌真心唔知自己原來係柏林。 兩個鐘後就到達 Rostock，跟住球隊指示去到位於球場門口既作客球迷停車場。
德國既車牌頭幾個字係車牌註冊既地區，啲警察睇我地車牌就知道我地係作客球迷。 同作客 Magdeburg 一樣佢地好關心作客球迷既人生安全，我地人又少所以佢地要好好分隔開我地。 首先佢地指示我地點樣經過佢地之後去到度作客區門口，然後有個保安黎問： 你地係咪黎睇波架？ 心諗乜野廢問題黎，唔通我黎到球場閘口係想睇歌劇？ 開閘之後又有另一班警察問我地係咪作客球迷，然後又指示我地應該點樣泊架車。 去到停車位又有另一個警察叫我地調頭泊車咁樣走佬快啲 😀
咁就黎到淨係係電視前見過既東海球場 Ostseestadion，第一眼見到既就係四大碌球場射燈。入閘後係作客看區迎接我地既係無限 Rostock 貼紙同 graffiti: Hansa Rostock FCKH Suptras Scheiss Gäste Gäste jagen Super Hansa Hansa Rostock FCH Suptras Scheiss Gäste Gäste jagen Super Hansa Hansa Rostock FCH Suptras Scheiss Gäste Gäste jagen Super Hansa 去到邊都淨係見到呢堆野，當中要提下既係 Scheiss Gäste 同 Gäste jagen。 季初都有提過 Rostock 班球迷係癲佬，賽後要同佢地一齊搭車好不安， 今日黎到佢地地頭踩場同樣都好不安，因為佢地出哂名唔歡迎任何外來人仕！ 啲人有時講笑咁話 Rostock 應該係最多德國人既地區。 係作客區內唔知佢地係咪每個星期都會入去巡一次場然後會清哂上手作客球迷留下既貼紙，總之係區內你只會見到同 FCH 相關既「裝飾」 。聽講男廁仲係一陣天拿水味全部都係新鮮噴上去。 佢地既目的就係要話你知：呢度係 Rostock 主場，佢地最憎作客球迷，所以周圍都係 Scheiss Gäste （dllm 作客球迷） 同埋會追擊作客球迷。 好彩我地只係鄉下仔，唔值得比佢地正眼望我地一下。 我既心願只係可以平安回家就好 xD
作客看台只有四十人到場，有唔少球迷本來都係計劃左個週末火車之旅，因為罷工而被迫取消。 如果罷工行動早啲宣布既話，球隊可能仲可以安排球迷巴士（但要凌晨就出發）。 不過無論有無罷工都好都唔會有好多人山長水遠黎到唔歡迎外人既球場作客。 仲要冬天去東海又係挑戰人體極限！！ 我地到柏林嗰陣夜晚氣溫七度覺得好舒服，去到 Rostock 同樣係氣溫七度但凍到手腳冰冷，然後我終於可以同佢地解釋點解香港濕凍世一！！！
開波前後場內氣氛好平靜，大家一齊係開波後十二分鐘繼續靜企／靜座。 十二分鐘完結後，主看台就隨即開始唱歌，唱出其中一首我好中意既 dem Morgengrauen entgegen…. 同時又一次震撼來自鄉下既球迷。 Ostseestadion 係其中一個最多球迷衝突既球場，因為主客區係位於同一個看台。 我地好彩無咩威脅佢地唔會理， 但對住其他大球隊班主場球迷好容易可以射野去作客區… 歇冬前史浩克球迷先（唔知點樣運左個鎚仔入去）鑿穿左看台邊既玻璃牆然後走去主場區撩交打。 今日我地同樣企係同一個看台下，成正哂佢地既回音，大聲到連自己把聲都聽唔到，所以我地決定慳返啖氣專心睇波算。係龍門既另一邊有另一個打氣看台，聽講佢地同大台既意見不合所以自成一角各自各打氣，不過有時候佢地仍然會合作帶球場內氣氛，始終佢地既主旨都係：場內不帶政治，唯一既政治就只有 Hansa Rostock。
完半場前我地靠隊長 Schnellbacher 頭鎚入波領先，後來大部份時間都係由我地主導。 對方而家係降班區掙扎緊，我地踢得比佢地好絕對合理；問題係我地自己都唔係踢得特別好，浪費左好多埋門機會去拉開比數，最後比人追和。 呢個時候我都無諗太多，一來唔覺得我地會好似季初咁犯同一樣既錯，二來我地只欠一兩個機會，應該仲有時間可以搵到呢個機會。 點知原來最後我地唔係輸自己，而係輸球證。
拿，我都唔係好想睇返場精華，以下係綜合各方球迷既留言：有一下對方跣腳我地既球員 Faghir 拎到個波可以單刀起腳，點知球證係對方訓低後即刻吹罰，後來仲請 Faghir 食左張黃牌話佢吹罰左都仲起腳。 個個都問一來睇唔出雙方球員有咩接觸，二來就算球證睇唔清都應該等成個攻勢完左先再借 VAR 去判，唔應該即刻吹停。去到補時階段唔知做乜我地禁區一場混亂之後球證吹左十二碼仲比左張紅牌， 對方再次係補時階段絕殺我地反勝。 原來紅牌係吹手球，但人地話呢下我地球員跌低左唔係蓄意犯手球唔應該判十二碼。。。。 唉唉唉！！！ 真係好唔憤氣，連對方都話唔知點解可以贏到呢場波。 但講真如果我地踢得好啲就唔洗執著係呢兩個問題判決之下。。。。
球證吹雞完場後我地好快執野離開呢個傷心地，留返比人地慶祝。 離場時啲警察好友善咁黎問我地係會直接離開定會留係 Rostock？ 真心想知如果我地會留低既話佢地會點， 但我淨係想返屋企自閉咋！！我地有警車開路帶我地上去公路， 我地就經漢堡返去法蘭克福，七個鐘後返到屋企～ 係呢段路程由唔憤氣變到接受，其中一個最能夠釋懷到既原因係：過去咁多年係地區聯賽我地既實力一直都係最好嗰幾隊，好自然覺得贏波係正常事，而每季既目標都係要贏波贏冠軍去爭升班。 上季係一季奇蹟，今季係咁多年來第一次了解現實，我地既目標真係唔會再係升班，而係護級，輸波先係正常事。 目標係要有 40 分護級，而家我地有 25 分，要達成目標就要努力下！！！
btw 我衷心祝福 Kiel 升班同 Rostock 降班，唔想再山長水遠去北部呀！！！