20.01.2024
德國足球乙組聯賽 第 18 週
SV Elversberg - Hannover 96
Waldstadion an der Kaiserlinde
賽果：2:2 (0:1)
入場人數：8150 （2100 名作客球迷）
門票：季票
更多相片

次循環黎到 2024 年既第三個星期終於開始！ 回想返去七月第一場去作客漢諾威既一切仍然歷歷在目，唔同既係個期待感變左。 踢左半季見過哂咁多個對手，特別今日係主場迎戰已經作客過既球隊，好似已經知道對方底細咁，大約知會發生咩事。

呢兩星期有新一輪寒潮襲德，南部落左幾日大雪之後去到今個週末氣溫急降至零下十度；巴伐利亞州南部有啲地方仲見低至零下廿度！ 由漢諾威落黎既球迷應該覺得好似去左第二個世界咁。 我地由法蘭克福出發時都係天陰陰好大霧，大約十一點去到莎蘭時竟然見到啲陽光，陣霧好似慢慢散緊咁。 然後唔知點解我地仍然想早啲去球場挑戰下自己….

上季新年第一場主場波又係落完大雪要急 call 球迷一大早幫手剷雪，當時只有四千幾人入場，Block C 只係半滿。今日場波係掛紅旗～～ 當時唔可以用德乙同德丙黎比，但入座率係冬天不嬲都係比其他時候低一啲，你捱得凍已經係其次，首先你要能夠由屋企去到球場。好在落雪已經係早幾日既事，啲道路都已經清理得七七八八～ 只係好多人選擇最後一刻先到場。

各地既球迷仍然會係今個比賽週開波後頭十二分鐘以沉默去抗議德足聯既投資者方案；而主場球迷亦借呢 12 分鐘既其中一分鐘去為一名係聖誕節去世既資深球迷 Steffen 默哀。 大家係聖誕節收到消息時都好震驚，Steffen 係其中一個主客比賽都會去齊既球迷，以前我地成日一齊搭球迷巴士去作客，有唔少佢飲到醉哂獨自打氣既好笑場面；間唔中會聽到佢做看台軍師指點球員；恥笑佢 9upper 等等，總之有一齊企過係 Block C 或者作客過既球迷都一定會識佢。 Block C 係看台前掛起佢既畫像然後點起一枝煙火紀念同多謝佢成為大家既一份子；以後佢永遠都會在大家心中一齊繼續同 SVE 出戰！

過去兩個星期仲有兩位係足球界既重要人物離世，一個係碧根鮑華，另一個係 Kay Bernstein。 Kay 唔係一個球員所以應該無香港人識佢。佢係哈化柏林球迷，係其中一個球迷組織既始創會員，曾經係看台 Capo 帶領哈化柏林既球迷走過高低，近年成為哈化既主席，離世時只有 43 歲。 佢係哈化球迷有好重要既地位，係球迷界亦都好出名… 今個比賽週有唔少同佢交過手既球迷組織都有為佢寫大字報紀念佢希望佢安息。

開波八分鐘左右客隊就已經憑第一個埋門機會開齋領先； 嗚…. 我知我地冬天踢得特別差，會唔會新一年第一場又比人大炒？ 隊波真係踢得奇差，係中場轉邊次次都送個波去對方腳下，係後場又成日走甩人比人地有多次埋門機會，如果唔係人地把握唔到又或者有 Kristof 把守到最後一關，我地去到半場應該唔只失一球！！！半場我返到去先見到對面係半場休息時間準備 choreo!! 搞到我要返轉頭落草皮去搵個靚角度去影相 >_> 好好彩個太陽開始曬落 Block C 前既空地，我即刻霸左個太陽位黎企！ 主看台前面既草皮同我前面既禁區見唔到陽光所以一直都有層霜係面，就連看台前既網都結哂霜粗左勁多好影響視線。。。 漢諾威球迷既 choreo 好簡單，看台前掛起佢地其中一首打氣歌既歌詞「只要有我地企係度既一日就會有我地既旗海」；球迷就係看台入揮動黑白綠既旗仔揮左差唔多十分鐘，錯過左佢地點樣連失兩球～～～

無錯，突然間我地連入兩球反超前！！！！！！ 原來我地既組織能力仍然係度，原來我地仲識入波！！ 由零分變三分，我完全收貨喎！SVE 射入第二球波後，係主看台有個人無啦啦放煙。九成九係新年玩剩既煙花諗住可以拎入場玩。 可能佢唔知既係，德國球場內係唔可以放煙的，捉到既話會比人趕出場、比警察拉同埋被罰入場禁制令。 九分鐘後比個九號追返和，我明明望住 Kristof 隻手係會擋到個波，點解最後都係入到網 T_T 呢個九號係開咧戰都係佢追和，今日兩球波都係佢入….. 點解我地成日走甩左佢??? 好啦，其他今場我地真係踢得麻麻地唔值得三分，所以一分都真係 ok。 作客球迷就好唔甘心覺得和得好唔抵。

下場我地要去波羅的海作客，天氣預報話氣溫會回暖一啲希望係真，唔想凍死係東海！！