14.01.2024 意大利足球乙組聯賽 第 20 週 Venezia FC - UC Sampdoria Stadio Pierluigi Penzo 賽果：5:3 (2:1) 入場人數：9030 （約 2000 名作客球迷） 門票：31,50€ 更多相片
威尼斯一直都係我覺得人生其中一個必到既城市，但同時又知道佢極受遊客歡迎長期人山人海。年尾本來預左舊錢去多哈最後去唔成就碌下機票睇下去邊度抵玩，發現原來威尼斯全年唯一既遊客低峰期係一月，酒店仲比其他月份平一大截！加上意大利係其中一個少數冬天有比賽既國家，無啦啦夾哂天時地利人和就訂左五日四夜威尼斯。唯一壞處就係冬天會凍，但我呢，就唔怕凍既～
威尼斯係秋冬天好多時會水浸，我地只係祈求佢唔好落雨就得。好好彩最後我地撞中歐洲吹東北風，即係天氣會好乾爽同埋會好好天！！！ 到埗既第一日我地見天氣咁好就去哂主島最重要嗰兩個景點望下先，由火車站開始有條大街可以行，每個角落都會有個路牌指向最近嗰個景點既方向，第一個就係 Rialto 橋。 係威尼斯既大運河只有四條橋可以比人過去另一邊，Rialto 就係第一條。影左幾張相同係橋上面曬左陣太陽就繼續去下一個景點： Piazza San Marco。
係呢度見到好多 cafe 門口寫住 Spritz takeaway 3€ 咁，啲餐廳入面好多人飲一杯杯橙紅色既野飲，到我地下午茶時間我都叫左杯 Spritz 黎解下渴～ 原來 Spritz 既發源地就係威尼斯！！！ 係歐洲 Aperol Spritz 好普遍，但我從來都無係餐廳叫過，硬係覺得要比 8€ 我會想飲啲特別啲既野飲，例如餐廳自己既特飲咁。 係呢度通常有三種 Spritz 可以比你㨂，最受歡迎既係配 Aperol 甜甜地好易入口，最正宗既係 Select 澀啲同埋有陣草根味；唔中意甜又怕澀既就可以㨂 Campari； 如果你就咁叫 Spritz 就通常會自動配 Aperol 比你。 就係咁我餐餐都睇心情叫唔同既 Spritz 黎飲，重點係呢度一杯坐低飲通常只係 4-5€ 左右！好多餐廳仲有套餐，例如 Pizza + Spritz = 7€, 3種小食 + Spritz = 10€ 咁，好正～～～
第二日去左聖馬利諾好快就過左一日，去到星期日就係重點，朝早我地去左河既另一邊散步，然後去大學橋嗰面搵地方食午餐就慢慢向球場方向行過去，預計時間要 45 分鐘左右。 我地要搵去聖馬可廣場方向然後沿住岸邊向東行到尾就係球場。 一朝早已經見到唔少主客球迷各自著住同自己隊波相關既衣物係島上行黎行去， 我想講意大利人著衫真係好睇好多～～ 威尼斯多得有美國人睇中教佢地點樣做 marketing 將球隊周邊商品大改造，連 fan shop 都變到好次名店點勁簡潔；你行過唔留意既話只會以為間舖頭係一間普通衫舖咁。
係路上我地好好彩見到作客球迷去球場！！！有咩咁特別？ 就係黎威尼斯作客既球迷全部都會有專船係火車站直送佢地去球場！！ 係球場有個作客球迷專用既碼頭迎接佢地！ 我地聽到海上面傳黎唱歌既聲音，回頭一望就見到幾架企滿哂人既水上巴士，仲有多枝超巨型既旗幟係船上飄揚，真心大開眼戒覺得好震撼！ 岸上有啲作客球迷同船上既人係度對唱，從來未見過咁既場景！
行到去個島既最東部穿過一個住宅區就見到開左射燈既球場，我地要過橋先可以去到閘口入場。 由於我地怕住落雨或者會大風，特登買貴飛坐有上蓋既主看台，但個問題係呢個看台係最前面有幾碌柱擋住視線。 入到場見到自己個位比碌柱加 cam man 完美擋住左望向作客看台既方向即刻心情變到好差！！ 主隊最近又因為狀態大勇令到啲波飛好好賣… 我地唔敢亂咁調位。 等到開左波啲人坐定哂我地就行去其他地方睇下有咩位可以換，最吸引我地既就係看台最正中間既 VIP 位； 見無實 q 就膽粗粗就咁行入去坐，同時又有另外兩個一睇就唔係 vip 既走黎一齊坐，調位成功！
客隊森多利亞今季由意甲降班落黎，當我地開始諗去威尼斯睇呢場波既時後森多利亞係排緊係榜尾，黎到今場暫時脫離左降班區。 黎到今場對住有機會爭升班既威尼斯～ 雖然睇榜聯積分好似兩隊波既實力有啲差距，但黎到意大利我地都唔預會有好多入球睇，兩球都比盡。 威尼斯開波唔夠十五分鐘就先入一球，呢個時候我望到場波有個人好嬲咁指揮作客球員，覺得呢個人超熟口面，係一個我一定識既人。 原來係派路！ 有啲球員係認得個樣但唔知個名，有啲球員係識個名但唔知咩樣 😀 我對意大利球員既認識主要來自以前同利物浦比過賽既同埋世界盃睇過幾場咁。 但諗多幾諗我當時覺得佢係 Sirius Black 而不是派路…….
正當我地諗住咁快入左第一球場波應該玩完既時候，派路隊波就追返一球，然後又輸左球十二碼；完半場前仲踢少個。 上半場竟然有三個入球！！！ 半場時間啲保安走哂出黎企係下面唔比無手帶既人通過 @_@ 本來諗住去廁所既我已經唔諗離開，驚走左就入唔返黎。。。 我地旁邊係記者區有啲枱仔係座位前面既， 突然人走黎 check 坐係前面既人係咪有記者證，無既一律趕走；然後我地又係度驚會唔會走黎查我地有無手帶？ 點知佢地又完全無理過喎，下半場一開波啲保安又消失哂，到底係咩玩法？？
原來下半場先係戲肉既開始，主隊將比數拉開到 3：1 之後，踢少個既森多利亞竟然連入兩球追返和！會唔會佢地食住個勢可以反超前？ 完全無諗過呢場波可以有六個入球，但原來入球仲未完。 森多利亞最後都係要重返現實，踢少個就係踢少過，去到尾段開始比主隊睇到空位入多兩球成功保住三分。呢場波實在太完美～ 可以係雙方既打氣聲之下見證到八個入球。
完場後就原路返去島中心搵地方食飯飲我既 Spritz～ 終於可以係我人生必做既事剔走威尼斯！