13.01.2024
聖馬利諾足球錦標賽 第 15 週
SS Pennarossa - AC Libertas
Stadio di Acquaviva
賽果：1:4 (0:3)
入場人數：60
門票：免費
更多相片

上年同公司請定一月幾呢日既假，本來係諗住去多哈睇亞洲盃，後來因為各種不穩定因素遲遲都唔敢訂任何野… 把心一橫放棄算，改去一直都好想去既威尼斯，唔洗一半既價錢已經可以食好住好～

威尼斯既主要行程留返下場波先再講，我地成個行程總共係五日四夜，其中一個計劃左自駕去聖馬利諾睇場波，可以去一個新國家打卡！ 由法蘭克福飛去威尼斯機場只需一個鐘左右，係機場有程種交通工具可以去到威尼斯既主島。 我地間酒店位於火車站附近，個位置係最近可以由陸路入島既車站，唔洗拉住個行李或者要搭水上巴士先可以到達～～

無論你㨂搭直通車定普通巴士由機場去主島都係 8€ 單程 15€ 來回，搭水上的士好似要 30€ 一個人。去到島入面要搭水上巴士單程要差唔多 10€，日票就 25€。 我地留左一日買日票去遊船河，第一日先係威尼斯去睇哂啲重要景點先，第二日就一早返去機票拎車。

係威尼斯車站都有租車公司，但因為一月係全年唯一 off-peak season，島入好多舖頭都休息～ 咁我地唯有係機場租車。 雖然要買多一張來回車飛，但機場既車款多好多同最重要：平好多！ 我地用 12€ 經 Italy Car Rent 租左架 Fiat，本來係想要 500 但最後比左架得 60hp 左右既 Panda xD 但 12€ 真係唔想投訴啲咩～ 拎車嗰陣佢問我地會唔會揸出意大利境外，本來我地唔諗住話佢知會去聖馬利諾，後來都係好乖咁問佢聖馬利諾算唔算境外，佢話算，可以比多 14€ 既跨境費，咁就出事包險會包埋～

有睇開波既你應該都知聖馬利諾係另一個魚腩國，係一個獨立既國家，位於佛羅倫斯以東，威尼斯以南既一個山上。我地由威尼斯出發㨂左大約三個鐘車，意大利人揸車係完全唔會理路牌… 例如有道路維條有限速 60 佢地仍然會以全速飛過，後來我地跟左限速一兩次都無再跟，因為個個都飛緊既時候反而我地揸得慢先最危險。

我地入到聖馬利諾既境內之後就要將架車推到盡去山頂既舊城，目的係為左可以唔洗自己行咁多斜路！ 最後成功係七號停車場搵到位，好快可以去到山頂城堡飽覽一邊既山景，另一邊十公里以外就係海岸線。到底以前既人點解會㨂係山頂起樓？？ 當日雖然得兩度但多得個大太陽一直幫我地暖下身，加上一啲風都無，好舒服！！！影夠相就搵左間餐廳食晏，㨂左份好簡單既肉醬闊條麵～ 個肉醬無咩特別，好食在 al dante 既闊條麵！！

食飽就落山去球場睇波，係球場邊有地方可以免費泊車，行幾步上斜就可以去到望住太陽落山既看台。 冬天既太陽真係好舒服，吸收下維他命 D 同埋心情真係會好好多。 開波時得大約十個人係度，慢慢愈黎愈多人到場，最後有六十人左右，一齊見證到五個入球～～ 識意大利文既話（即係所有人除左我地）仲可以聽到即場旁述～～ 聖馬利諾既人口大約三萬，但佢地既足球體系同以前香港聯賽一樣有啲似。 地方細細有自己既國家隊同有自己既聯賽（仲要有成十六隊），啲球隊無自己既主場，每場都會係唔同地方出賽，而係同一個球場會有時會雙料娛樂～

好在呢場係早場係太陽落山後好快就完場，第二場波既球員同球迷（或者係家屬）已經黎到等開波。 我地就去到邊境入多次油先，聖馬利諾係非歐盟免稅地區，啲油價平好多仲有職員幫你入油～ 然後係揸返三個鐘車去機場還車，再搭巴士返去威尼斯。 返到去差唔多九點但我地仲未食飯，去左酒店附間一間 cafe 度買左件三文治同日開心果甜品，係咁 e 醫下肚訓個覺第二朝早餐食多啲～～