03.12.2023 德國足球乙組聯賽 第 15 週 Hertha BSC - SV Elversberg Olympiastadion Berlin 賽果：5:1 (2:1) 入場人數：33097 （約 600 名作客球迷） 門票： 15€ 更多相片
仲記得上季係最後一場贏波封王之後，看台上既球迷一齊叫：Berlin, Berlin, wir fahren nach Berlin! 有邊個會諗到我地呢隊鄉下隊會有一日可以作客柏林奧林匹克運動場？ 當七月賽程一出，我地唔理三七廿一，訂完去漢諾威之後就已經訂左去柏林既火車同四晚酒店，無論最後我地星期五六定日先踢都無所謂，反而柏林一定唔會悶親我地！
我地一早睇中左柏林附近既東北地區聯賽，最後諗住 Babelsberg 定 BFC Dynamo 兩隊二㨂一㨂左從來未睇過既 Babelsberg 同時又可以重臨 Postdam 搵下年輕時既回憶。 點知，冬天無啦啦今個星期就開始左。 星期一晚落初雪已經係勁大雪！！！ 去到週中柏林地區足總宣布所有轄下既聯賽賽事都會延期……. 係所有賽事，即刻乜波都無得睇。。。。
本身已經驚火車工會會搞罷工令啲球迷去唔到柏林，而家又要驚場波到底搞唔搞得成？ 好在我地係踢德乙，好在我地去既球場係世界級運動場… 好在個球場有地熱，好在個球場附近配套可以應付冬天，又好在德乙係受德足聯管理唔係柏林足總。 我地懷住不安心情係星期四收工之後就去到法蘭克福南站等 Flixtrain；今次我地每人來回只需二十歐，四個鐘既車程去柏林只係廿歐，堅抵！！！！ 上車之後其實都仲有少少失落，但又覺在好在我地呢幾日係去柏林。 試諗下如果訂左幾晚去鄉下地區最後波又無得睇，去到真心浪費人生寶貴既時間。
大約九點半我地到達柏林，係南站轉車去到酒店～ 今次要㨂返間有大書枱既酒店等我地可以係星期五遙距返工，兩個好乖咁係房內如常工作到入黑（其實只係四點），就出去夜中心行下聖誕市集。 今日既天氣係零下七度，好在無咩風，著衫著厚少少都仲頂得順，然後再飲返杯熱紅酒由入面暖返出黎舒服好多～～
星期六我地本來預左去睇波既時間變左去市內觀光同埋搵地方貼貼紙，向好方面諗超碼唔洗去球場食捱凍兩個幾鐘，但我地決定左要去食 Mustafa’s Gemüse Kebap。 之前好似都有講過， Gemüse Kebap 係柏林獨有，係柏林內唔難搵到，但最好食既真係地原創正宗既 Mustafa （有好多抄佢名既唔好上檔），要食到 Mustafa 就一定要預上最少一個鐘時間去排隊。 三年前係暑假我地第一次去排唔洗一個鐘，有土耳其同事去幾個月去完話要排一個鐘，連佢都話勁好食完全值得排。 今日我地去到見到連龍唔算長，以為一個鐘內應該都得，最後排左差唔多兩個鐘….. 到底我地點解要咁樣折磨自己 xD 不過都係嗰句，好好食！！！！！！！！ 但下次我唔會冬天排隊，寧願去食翻版既過下條癮就算。 夜晚就同其他人係酒吧會合，大家係酒吧熱下身之後第二日就係球場前相聚。
我地係 Alexanderplatz 轉乘 S-Bahn 去球場，落車後行幾歲就到作客球迷既入口。SVE 既球迷大使係門口同比左個工具證我等我可以係球場周圍去影相，仲有一張可以免費換野飲既卷！！佢仲話哈化柏林既球迷大使會想帶我行個 tour ，但當時佢要照顧自己啲球迷先轉頭先過黎。 咁我地無理佢就一大班人入左場先。
仲記得五年前第一次黎睇波既時候見到個球場覺得勁震撼，今日就唔知係咪凍到個腦轉唔到所以完全無感覺，入閘後迎接我地既係一陣超濃列既廁所臭味，係一個咁空曠既地方完全唔知陣味係邊度傳出黎！ 行到去作客區入看台時由西看台望去成個球場又忍唔住係心中嘩左一聲，我地去德乙球隊身份黎到德國首都作客….!!! 呢個球場唯一唔好處就係有田徑賽道，令到看台同草皮之間相隔好遠。 如果我地企到最底既話幾乎連禁區都睇唔到，所以最後㨂左企係看台正中間。
係德國落雪既話通常都會係路面灑工業鹽去溶雪，不過係柏林今年開始禁鹽，成個城市周圍好多地面結冰搞到危機四伏。 係球場同樣佢地唔可以用鹽，只可以灑泥石去防滑。 但係行條看台之間既路全部都仲有一層薄冰係地面，行樓梯嗰陣好恐怖！！ 今日有大約六百名作客球迷到場，莎蘭同柏林相隔七百公里，來回就係千四公里…. 揸車需時大約七個鐘；大部份最少係柏林過一晚，但有人真係玩即日來回勁癲！！
等到仲有大約廿分鐘就開波我就行左去北看台度搵靚位等影相，自己一個係兩邊球迷中間睇上半場。今日最後只有三萬幾人入場，一來對手（即係我地）唔吸引，二來天寒地凍有邊個會想入球場？ 只係覺得咁大個球場除左東看台之外睇落空空如也有啲可惜，三萬幾人其實都唔係少啦以乙組黎講，只係球場太大！ 係咁既天氣都肯入場既都應該係死忠，個個都帶住條頸巾係賽前高舉一齊唱會歌大叫 HaHoHe，仲有東看台既頸巾陣依然有個氣勢係度。
由於輸得咁慘烈，賽後我完全唔想睇返場波既精華，亦都無去追究場波既細節…. 一開波唔夠五分鐘，我地就已經有一個機會送左個波入網，忍唔住係主場區度拍左兩下手。 點知又有 VAR 吹返轉頭，後來見主客球迷都話呢個波係應該計入。 好啦，先甜後苦之後對手轉個頭就入波，又係清波清得唔好送左個攻勢比人。 好在我地好返靠一個遠射追和…. 唔夠十分鐘後又比主隊入波領先。
上半場我地踢得比柏林好好多，係差啲運同埋把握力，對方入到波都係因為我地防守太差先有機可乘。 去到半場時我對腳板已經凍到無哂感覺，行返去作客區既時後仲有啲痛 T_T 第一時間走入廁所取下暖先再出去用張卷想換一杯熱紅酒黎飲，點知佢話唔可以用黎換酒精飲品， 咁咪比錢買囉。 後來睇返張卷寫住可以用黎換啤酒，心諗唔比換熱酒咁我都要換返杯啤酒！ 個阿姐又話唔可以換酒精飲品，我話呢度寫明可以換啤酒架喎，無話無酒精啤酒，係啤酒, Bier!!! 佢就走去問佢阿姐，最後佢話上頭話唔可以換酒精飲品，第一次有人睇條款黎拗 ._. 然後勁唔憤氣咁隊杯啤酒比我，hello??? 其實我都唔係好想飲啤酒 sosad 就係為左啖氣搞到自己要係－3 度飲凍飲…
下半場既時間唔知點解過得勁快，我地班球員個個好似唔想踢呢場波咁勁多甩碌同失誤。 賽前已經有幾個球員病左未能隨隊，後備席有兩個龍門，無啦啦勁缺人要排個怪陣。 奇就奇怪上半場都好地地，下半場就一盤散沙咁！ 主隊係過去幾場失哂勢，今日終於搵到機會瘋狂入波，一口氣入多三球大炒我地五比一。 去到最後十五分鐘成個作客區都靜哂落黎，只係想場波快啲完可以搵個地方暖返身！！！
完場後，大家等班球員黎到作客看台前鼓勵佢地。大家都話寧願咁樣慘敗一場都好過連續幾場飲恨輸波，一盤冰水倒頭淋落黎會醒得快啲！ 成個球場唔洗三個字就已經清空哂，我地都拿拿聲離場，搭 S-Bahn 去到 Charlottenburg 搵間 cafe 飲件蛋糕飲杯熱朱古力回氣，然後去行聖誕市集，食埋飯就返酒店休息。
第二朝一早我地就要搭火車返法蘭克福，然後又係新一個星期既開始～ 下個週末就係今年最後一場主場波，希望可以以三分黎做個總結，大家開開心心咁過年～
（希望下季再黎柏林的話可以係夏天或者冬天）