25.11.2023
德國足球乙組聯賽 第 14 週
SV Elversberg - SC Paderborn
Waldstadion an der Kaiserlinde
賽果：4:1 (1:1)
入場人數： 8126 （約 200 名作客球迷）
門票：季票
更多相片

對上一次星期六睇波已經要數返去九月，黎到今日已經慢慢入冬，夜晚朝早開始會結霜同埋要出動睇波專用既冬天衣物！ 今日天氣預報話會有雨有風，但陣中會出太陽，氣溫大約兩度左右，諗住未落第一場落都著 full gear 住挑戰下自己。

星期六一早食完早餐去埋廁所就要行去球場，地區聯賽年代我地通常開波前一個鐘左右先同其他人會面，今季大家都好有興致咁朝早十點就聚埋一齊飲啤酒，今日終於開始有熱紅酒飲！！！ 不過我仲未能夠完全入鄉隨俗，食完早餐就去飲酒真心頂唔順，連豬扒包或者燒腸我都食唔落口。

入場後要等看台慢慢企滿人先無咁食風，大家一齊做企鵝！ 我係開波前半個鐘行去主看台既小食區入面取下暖先，然後係看台後面行黎行去八卦下。 去到開波前大約十分鐘班核心作客球迷先開始入場，佢地好快就係看台前掛起幾塊組織旗幟，班球迷好合群咁個個企係看台中心，就咁估計應該有大約 200 人。

Paderborn 唔算係啲咩大球隊，大概係因為地理位置關係，同埋隊波本來就無咩值得一提既歷史，近年主要都係係德乙丙打滾。最重要時歷史應該就係 2015 年第一次升上德甲，做升降機連降兩級之後就連升兩級係武肺期間上返德甲，不過同樣再次包尾落返乙組。 SCP 同 SVE 兩隊今日並唔係第一次對戰，以前仲有西部地區聯賽既時候兩隊已經碰面過幾次。 SCP 係社交媒體問自己球迷有無好期待兩隊波第一次碰面既時後比班球迷問係邊個新仔唔做資料搜集就出個咁既 post!!?

對我黎講就係第一次睇 SCP～ 不過係賽前完全無任何感覺，無贏既感覺亦都無輸既預感，超級平常心咁去迎接呢場波…. 開波後班作客球迷竟然係旗下面換裝，代表佢地即將會放煙！！！ 幾分鐘後看台上果然冒出濃厚既藍白煙，有陣強風將啲煙由對面龍門直吹過黎 Block C，好似一塊霧牆咁攻過黎，聞到陣煙花味即刻醒神哂！！

呢陣煙好似都點醒左佢地既球員咁，係 22 分鐘先入波開紀錄。 賽前我地有三分之差排係佢地前面，今季我地除左頭幾場波差啲運之後，對住排名比我地低既球隊都仲有啲戰鬥力，唔通今日又要甩碌？ 我地同自己講要對自己有信心，幾個人係咁話我地無論點都會贏波既，講下講下就真係追返一球！！！！ 我企係底線望住個波慢流尾袋，個路線我以為係唔會入，最後竟然中柱入左！！～～

半場時我走返入 Block C 既企鵝群中取暖，下半場開波唔夠五分鐘我地再入多球反超前！！今日對方㨂先背住我地黎攻，搞到下半場啲入波全部係對面…. 之後我地再入多兩球波我都睇唔到個波幾時入網，淨係靠其他球迷同見到球員慶祝先慢半拍慶祝埋一份 😀 估唔到我地可以由落後一球連入四球波反勝，踢散哂對方既對策，班作客球迷本來係下半場開波前都仲好興奮再次放煙，去到最後嗰廿分鐘佢地都無咩心情再打氣，去到補時階段就已經執野準備走人。

今日對住無咩吸引力既 Paderborn 最後都有超過八千人入場真係有啲估唔到， 啲球迷仲好積極參與打氣。 近完場時有部份人自己成功帶起一齊叫場邊兩個看台既球迷企起身，佢地又真係肯企！！ 然後到我地唱大家近期最愛既打氣歌，坐係接近對面底線既球迷竟然都有一齊拍手！！！？？ 一開始有人話嘩，主看台啲人竟然附和拍手，呢隊唔係我認識既 SVE…. 然後見到看台尾都有人拍，大家都笑住話到底發生緊咩事？ 😀

完場後班球員黎到看台前一齊搭膊頭唱歌慶祝之後，大家一齊大叫 Berlin, Berlin, wir fahren nach Berlin! 呢句通常係入到足總盃決賽先會唱，但我地的而且確下個星期日會去到柏林既奧林匹克運動場作客。omgomogmomg 雖然我已經去過，但一諗到下星期我地會去作客就即刻起哂雞皮。