18.11.2023 曼徹斯特星期六聯賽 第 11 週 Konger FC - Hewlett FC Parrswood Sports Centre 賽果： 1:3 (1:2) 入場人數： 約 50 人 門票：免費 更多相片
呢幾年去睇低組別聯賽好少會特登寫一篇野黎做個紀錄，今次去到曼城睇最低組別既聯賽既主角係屬於香港人既 Konger FC，點都要寫返少少。
雖然細個睇開英超，對成個聯賽既球隊同球員都十分熟悉，但從來都無花過時間去了解英國聯賽既系統，但再數落去啲英冠都仲 ok，但英甲英乙 non-league 呢啲就真係完全唔識。Sunday League 都有聽過下，淨係知好多肥佬去踢下波咁。後來開始周圍睇波之後就同 Groundhoppers 學左好多野， 例如好多人既目標係 Do the 92，要走遍英格蘭頭四個聯賽既 92 個球場。 除左呢 92 都仍然係對其他無咩認識….
今次決定左去曼市之後就開始搵下乜野係 Manchester Saturday Morning Football League？ 係網上面既資料唔多，亦都無咩相關紀錄，只係係一份 2014 年既場刊介紹呢個聯賽係 1989 年由 Manchester Education FL 同 Christian Fellowship FL 合併而成，當時有分甲組同乙組，係個乙組聯賽榜上見到 Konger 今場波既對手 Hewlett FC，估唔到原來人地係聯賽老屎忽！
係 Google 上 search Konger FC，第一個結果就係來自 fulltime.thefa.com ，入面有哂 Konger 既賽程同註冊球員，仲有少少數據，例如球員上陣次數、紅黃牌、入球數字等等。 我地開始諗住去曼市既時候係呢個網站度睇賽程，當時只係編排到去十月尾。 嗰陣我唔知係自己唔識用定點，睇左個足總網睇左好多次都搵唔到估唔到到底十一月仲有無比賽，又無過去賽季既資料可以睇！ 於是就係個網度周圍睇下睇下會唔會搵到啲 hints，原來 Full Time 係一個由 FA 提供既聯賽管理系統，所有成功係地區足總註冊既聯賽都可以係呢個系統上面註冊同管理自己既聯賽、球隊、球員同相關數據。 如果我無理解錯既話， Konger 暫時仲未係英格蘭足總既會員，唔係其他媒體所講「獲英國足總接納」，「獲曼市足總接納」應該先正確，始於個聯賽係受地區足總管理。 但點都好，可以踏出第一步成立一隊波去，有系統咁參與地區聯賽由零開始已經係一件好難得既事，足總盃資格賽或者升班上 EFL 都要末來入到 Pyramid 先再講都未遲。
係德國，呢類外國人球隊並唔新鮮，呢度有好多移民黎德國既人自組球隊，例如係唔同城市都有土耳其、克羅地亞、希臘等等既球隊。我地好中意去睇呢啲球隊比賽，場上好多野睇（成日鬧交甚至會出手），更重要既係佢地賣既野食好好食！ 強烈建議 Konger 都可以係場邊賣下小食！
我地搵其他球隊既 Facebook/Twitter 睇下佢地上年十一月有無比賽，最後都唔等到賽程出我地都就訂左去曼市既機票。 㨂呢個星期去英國又係因為國際賽程，係德國無波睇所以又去英國探下親。 我同兩老講諗住去英國睇 Konger，佢地即刻話睇新聞知道呢隊波想去支持下，然後決定由南部四個鐘車帶埋麻雀上黎～ 天氣唔好都可以留係屋主面打下麻雀過日子 xD
星期五晚我地差唔多十一點先落機，曼機場好細，過關同行李都極速搞掂。 今次又有家長車黎接送，呢個機場係無地方可以免費接機，一律 6£ 30 分鐘…. 係 Birmingham 係個 long term parking 有個地方仔可以 30 分鐘免費用黎做 drop off/pick up，但曼市就得免費 drop off. 網上有人話 Radisson 可以免費 pick up，但係咁夜我地都廢事搞咁多野… 去到 Airbnb 沖個涼就訓覺。
第二朝八點起身，食完早餐就出門口～ 好好彩本來話今日會落雨同大風，我地著到勁厚又準備十足咁咁去出發。 揸車去到 Parrs Wood 有個免費既停車場，我地係最近出口個位泊低，落車後見到附近有兩架貼住 Konger FC 既貼紙就知無搵錯地方～ Parrs Wood High School 有幾個草場，Konger 既主場係河既另一邊。由停車場出面望住大路向左行，過左河之後有條路仔可以係河邊行落去草地，如果唔想行泥地就可以行前多少少有個閘可以攝入去。 離遠已經見到一班黃衫人係度熱身就知去岩地方。 我地去既呢一日之前落左幾日大雨，成塊草地同泥地無咩分別，行到成腳都係泥 ._.
我地勁醒咁帶左兩張露營椅去坐，但原來香港人個個都好醒，我地唔係唯一一個有私家座位既觀眾 😀 黃衫既 Konger 對住紅衫既 Hewlett， 由草地變泥地對戰。 Konger 一開波就搵到機會入波，不過好快就比對方追和同反超前，之後我地仲食左張紅牌踢少一個。 個場地狀況其實真係好差，有幾下見到啲球員大字碼咁跣腳好驚會扯親，但班球員個個都好認真咁應戰。 同對方相比， Konger 多好多球員之間既溝通同會提下場咁。仲有裝備都充足過對方好多， Konger 係場邊有戰術板又有張床用黎比球員訓低做按摩，仲 set 左部機做網上直播！ ！對方連波衫號碼都重覆（有兩個15 號，兩個16 號等等）唔知想點！ 下半場比對方入多一粒，我地就有兩個單刀機會把握唔到。 但係係場邊個個繼續拍手叫好波，會叫下唔緊要再黎過～
今場波可能係唯一一場場邊無人鬧既比賽，講緊既係我睇過既咁多場波，唔係淨係德國波。仲有有時覺得自己離開左香港咁多年已經好似一個局外人咁。雖然今日只係黎睇一場業餘比賽，但呢場比賽比到我返左香港既感覺， 聽到場內外都係講中文，唔知點解有一種莫名既感動。 黎睇波既有啲就兩三十歲到睇落似退左休既情侶／夫妻、有帶住小朋友黎既年輕家庭、又有已經帶住牛高馬大既 uncle auntie 等等。 黎得睇呢場波既香港人大家都係想睇到一個希望， 支持下大家既將來。
完場後，場邊個個為班球員鼓掌，叫佢地下場繼續加油！！ 啲球員個個成身泥咁走，附近又無更衣室，佢地會唔會就咁上車返屋企？？ 我地返到去停車場後花左十分鐘清理對鞋乾淨返啲先敢上返車 ._. 然後就去左食拉麵同西多～ 食飽兩老就去搵朋友飲茶，我地去 Stockport 睇下一場波….