18.11.2023
英格蘭足球乙組聯賽 第 18 週
Stockport County FC - Colchester United FC
Edgeley Park
賽果：2:0 (1:0)
入場人數：9.664 (263 名作客球迷)
門票：22£
更多相片

我地去英國呢個星期係國際賽期，預左唔會有得睇英超英冠，決定去睇 Konger 之後就即刻睇下附近有無一啲值得走一轉既球隊… 好快就留意到英乙有隊波已經連贏十場，估唔到咁岩比我地食到個 hype 可以去主場食下花生，希望可以見證佢地延續連贏 N 場既佳績。

星期六睇完 Konger 之後去漁村食晏，之後就去 Stockport～ 兩老約左朋友飲茶，佢地搵個順路既地方放低我地之後，我地就穿過啲住宅區行大約半個鐘去到球場。

隊波早幾年因為財困搞到差啲要散班，後來仲開始出現各種問題令到隊波越踢越差仲跌出埋職業聯賽。 直到三年前有本土金主成功收購隊波之後先令隊波慢慢見到曙光，上季上返英乙之後即刻以第四名進入升班附加賽，可惜失敗而回。今季再接再勵去爭取直接升班既資格，唔知會唔會成功呢？

Stockport 位於曼市既東南部，睇 Google Maps 搭火車應該唔洗半個鐘就到達，岩岩係正 M60 個圈既出面。 上到黎著名既工業城市地區，見到啲路牌上既地方名全部都好吸引；就好似係德國去北威州或者去東德咁，好多好吸引既球隊！！！ 佢地要係 49000 同曼城到吸引到球迷絕對唔係一件易事，但亦都唔難吸引到一班來自自己社區既自己人。今場波有超過九千人入場係英乙黎講係一個唔錯既數字！！！

Edgeley Park 係一個四四方方既典型英式球場，位於住宅區中心， 閘口係正路邊，係個閘入面有人手嘟飛然後踩制開閘比你入球場。 一入到去就見到佢地最出名既 Cheadle End。 淨係呢個看台都已經可以坐到五千左右，佔全個球場容納人數既一半。 係看台既最後有一班球迷係開波前已經好興奮咁係度唱歌。我地就坐係主看台既第二行，超近距離可以鬧球證又肯定佢聽得到～ 對面係家庭看台，但最左邊係作客看台，估唔到都有差唔多 300 人黎。 作客看台有人就代表呢邊一定會有一班要企係作客球迷旁邊起哄既人。 睇得出企係 Family Stand 同 Cheadle End 既球迷都係忠實球迷，一班就係啲老屎忽，另一班就係比較年輕既球迷。 另一邊龍門後面就係無蓋看台。

呢場波始終都只係英乙，唔預有咩好波睇，只祈求唔好又入得一球波或者無入球就完場。 上半場開波後見到兩邊都無咩攻勢，比波又唔到位，已經對場波無咩奇望….. 去到完上半場前兩分鐘，終於比主隊係右路搵到機會送個波入網！ 然後係下半場開波後唔夠兩分鐘佢地又再入多一球！！ 笑死，完場前同開波後既兩分鐘入左兩球波，代表有好多人都 miss 哂兩球波。

完場後我地就先返去 Airbnb 打返一圈麻雀休息下先再出去唐人街食飯，終於可以食返啲好味既小炒！！！ 本來睇中左九龍冰室想星期日去食晏，後來有人介紹去遠少少既跑馬地冰室都好食。 星期日全日都落大雨，我地就善用時間去超市入貨，然後去左跑馬地食飯，個沙嗲牛好好食，個乾炒牛河好好食，連自制既五香肉丁都好好食！！！ 可以話係我地暫時係香港以外食過最好食既茶餐廳，好開心！ 下次要再黎過食好野同埋去附近睇多幾場波，慢慢完成 92 之路！