20.10.2023 德國足球乙組聯賽 第 10 週 SV Elversberg - Eintracht Braunschweig Waldstadion an der Kaiserlinde 賽果： 3:0 (2:0) 入場人數：8713 （約 900 名作客球迷） 門票：月票 更多相片
國際賽程期間我地去左英國過左個長週末，返到黎返幾日工好快又到新一個比賽週。今次主場迎戰上季僅僅護級成功既 Braunschweig，佢地今季睇黎仍然一沉不起同史浩克爭包尾位置，我地一定要趁佢病攞佢命！
德足聯早兩星期公布左黎緊幾個比賽週既賽程，計埋今場六場入面得一場係星期六開波，三場星期五同兩場星期日。今日係呢幾場第一場星期五六點半～ 主場出賽既話呢個時間其實唔錯，我地提早一日去左莎蘭過夜，去到星期五四點準時熄電腦，去買個 Döner 食飽就行上去球場等開波。 慘既係黎作客既球迷，應該要請一日假黎山長水遠黎作客，佢地最後有近九百人黎到，以星期五夜波黎講算係好多人！！
今日好多球迷都係收工後先到場，唔似星期六既比賽好多人係未開閘就企係門口等入場。 球場既新換既射燈係球員入場熱身時終於全開，LED 燈係唔同啲，好似拍個掣就即刻著哂，唔似舊式嗰啲燈膽要五至十分鐘先會著得哂咁。 上場波我走去主看台後面影相時比保安趕走，今日我廢事又要同佢拗所以㨂左走落場邊。一開始個保安阿頭走黎問我係咩職位，我以為佢又想趕我走，佢知我係球迷攝影之後就無再理過我，仲好好咁要經過我前面時會避開鏡頭！！
呢幾日大部份時間都落雨，天氣預報原本話四點打後唔會再落雨，點知去到近開波時突然開始落雨，班球員又就黎入場，如果呢個時候我走返上看台既話可能會 miss 左啲重要時刻，好在最後只係落左大約十分鐘雨。 Braunschweig 既正名係 Braunschweiger TSV Eintracht，通常簡稱為 BTSV 或者 Eintracht Braunschweig. 佢地既球迷組織賽前號召大家一齊著「制服」到場：黑色褸配牛仔褲。 通常佢地號召大家著到一式一樣代表佢地有野準備要表演…. 果然佢地掛起哂啲旗之後，係看台中心蓋起一部份球迷比佢地換衫矇面，九成九準備玩煙！
球員入場後，賽會先為最近既以色列加沙衝突默哀之後先吹雞開波。SVE 一如以往著上白衫白褲係主場出戰，而 BTSV 就著代表球隊顏色既藍衫黃褲。兩邊既球迷就各自為自己既球隊唱歌打氣， 開波大約十分鐘後，作客球迷舉起大字報抗議警暴。 然後係看台有啲紅煙慢慢冒起，當時大家應該以為一切都係佢地安排之中。唔知點解佢地好多人突然跳到圍欄上面，有幾個仲跳左左出看台前，當時越黎越多一罐罐既紅煙係看台底彈出黎，看台前啲人就將啲罐係咁踢落草地。當時我既第一反應係，佢地舉完大字報之後係咪有野跌左落看台底搞到有野燒著左？
球證即刻吹停場波，場內既球迷都開始起訌，知你隊波踢得差都唔洗開波十分鐘就想搞到場波隨時被腰斬嘛？有幾個人係咁係看台前面望入看台底，其中一個人叉錯腳由大約三米高既看台跌左落草地，有幾個球員見到即刻衝去睇下佢有無事。 混亂左一輪之後，看台上面既球迷無啦啦衝哂去樓梯，似乎看台後面又有事發生咁。 到底發生緊咩事？？
等到啲煙散得七七八八之後球證示意場波繼續。去到二十分鐘，我地入波領先！！！ 今場波我地好似踢得返德丙盛勢時既進攻足球， BTSV 對住我地完全無符。 過左一陣我地終於收到風對面看台發生緊咩事！ 原來紅煙並唔係 BTSV 球迷準備的…. 而係佢地既死敵漢諾威唔知幾時放左個裝滿紅煙罐既背包係看台底。
同一時間，漢諾威係自己主場比緊賽，佢地既球迷組織係看台上舉起大字報寫住：「魔鏡魔鏡， 呢個國家之內邊個有最強既遙距打火器？」 中間有多一塊布寫住「請按制」…. 一按之後， 係 Kaiserlinde 作客看台底就冒出紅煙，然後就係我地所見到既混亂場面！！ 唔怪之後對面班人個個好慌張咁！ 去到呢個時候，仲未有人出面講解到底漢諾威係點樣遙距控制，有傳聞話有人匿埋係看台底人手放煙然後比人捉到，又有傳聞話作客看台入面有無間道等等。 無論點都好，呢條魔鏡橋真係好正～～～～ 有人話佢地只係抄返上季漢諾威作客 BTSV 被主隊係看台底放藍黃煙搶哂風頭，但今次佢地花錢花時間走到黎鄉下收埋啲煙彈，淨係個計劃都已經要 Respect!
作客看台一片混亂之後靜左一段時間， 球場內都被主場既打氣聲主宰～ 去到近完上半場前我地再入多一球拉開成二比零～ 半場休息時個個係度討論對面啲紅煙，估唔到我地可以親眼見證到咁既趣事。 下半場 SVE 向住 Block C 攻過黎，我開始要小心食波餅。 對面啲球迷好似收拾好心情終於決定繼續為球隊打氣，間唔中仲要放下自己既煙花。去到補時階段由後備上陣既球員射入最後一場埋齋，三比零完場！今日三個入球都係由新加盟既球員搞掂，包括由地區聯賽黎既 Paul Stock，由拜仁借過黎既 Paul Wanner 同埋由 1860 黎既 Joseph Boyamba~ 三個都係今季第一次入波～～
完場後，班作客球迷好快就執哂野走人。班球員走去作客看台諗住等比人鬧，但啲球迷頭也不回咁離場。 啲球員係看台前呆企左一陣先慢慢行返去更衣室，覺得佢地有啲慘。
以往 SVE 通常對住強隊既表現會異常地出色，而對住弱隊就會送分。由領隊上任後，隊波既表現越黎越穩定，對住近況比自己差既球隊少左好多甩碌既情況。 眨下眼我地已經連續六場不敗，係聯賽榜中上遊位置。 如果唔係開季頭兩場輸自己既話，我地呢一刻隨時企係榜首再次震驚全國～～ 不過今季仍然有漫漫長路，呢句由上季講到而家： 希望可以繼續保持水準！