25.08.2023 法國足球丙組聯賽 第 3 週 Nîmes Olympique - Le Mans FC Stade des Antonins 賽果：1:1 (1:0) 入場人數：1.603 (20 名作客球迷) 門票：10€ 更多相片
期待已久既暑假旅行終於成行出發！ 你知我地去邊旅行都要睇返場波，我地要放暑假就要等其他國波有波踢就要放棄一兩場德乙賽事。 德乙賽程未出之前一直希望可以係八月尾出發，最好就要好可惜咁錯過已經去過又山長水遠既作客波，同埋錯過左都唔會太過可惜既主場波…. 果然個天有回應祈禱，八月尾主場迎戰 Düsseldorf 連住作客早幾個月係德丙先去完既 Osnabrück，再加多個國際賽期，簡直係 perfec池！
德乙賽程係我地六月尾七月頭係挪威時出爐，返到德國我地即刻訂野。 今次我地既目的地係西班牙東南部海邊，係 Valencia 同 Alicante 中間，自駕由德國南下超過 1800 公里既車程～ 講左幾年終於成行！！！ 由法蘭克福出發， 我地由 A5 公路直落到瑞士邊境，由於我地買左今年既瑞士公路票，所以兜少少路穿過瑞士先入法國既收費公路。 第一晚我地㨂左係南法既 Nimes 過夜。㨂 Nimes 既原因係….. 佢星期五有比賽._. 我地完全無諗過會入城觀光，只係為左中途休息順便睇場波咁。呢段路程都已經有超過 900 公里～
我地星期四執五凌晨四點出發，大約兩個鐘後差唔多到瑞士就入多次油先。 係瑞士德語同法語邊境我地有個今年已經去過幾次既休息站，呢度有間麥當勞同 Cooper 超市。 當時先 8 點幾麥當勞都未開（10點先開唔洗做早餐時段？！），間超市都剛剛開門，我地泊低架車入去行個圈，同時又可以用佢免費又乾淨既廁所～ 然後又繼續上路經 Geneva 入法國，過左 Annecy 之後就係公路休息站度去個廁所，希望可以到達目的地先再去廁所，唔洗用南法啲踎廁！ 然後兜過 Grenoble，踏上著名既 N7 公路進入 Provence 地區，經過 Valence, Orange, 開始見到 Marseille 路牌時我地就要向西進法，最後大約係 4 點鐘去到 Nimes。
法國既高速公路絕大部份都係收費既，佢既收費放式好似香港咁用收費亭。上公路時要先拎飛，出公路時就入飛然後比錢，建議準備一張信用卡用黎比錢有效率好多又唔洗同人 Bonjour 溝通。有時轉公路時係要出閘再入閘，即係要比兩次錢… 呢一程我地花左大約 40€，仲要我地仲有超過 200 公里先到西班牙邊境！
係 Nimes 我地㨂左一間最最最最平既酒店過夜，由於我地只係諗住要搵個落腳地沖涼訓覺第二日一早繼續出發，所以只要間酒店睇落企理就得，呢間酒店叫 Hotel F1，係法國既 Accor 酒店集團旗下最 cheap 既連鎖酒店。 我地呢一晚只需 50€，間房係龍床盤連套廁，要提連套廁係因為最平既房間 35€ 係無套廁，要去走廊共用廁所或者浴室，好似住 Hostel 咁。 好多人無睇清楚見平就訂無留意間房既配套所以勁多負評，我地抱住期待又擔心既心情去 check in～ 睇哂啲評論都唔敢有太大期望，總之乾淨就得。
果然無期望就無失望～ 間房真係極細同埋有啲舊，但整體黎講係乾淨既，仲有冷氣～我地出發前另外用個大袋 pack 好哂今晚要用既野，唔洗開 gip，如果要開行李既話就完全唔會有位行… 間酒店係公路旁商業區，區內有好多公路酒店，例如再比多 20 歐可以住 Ibis 最平價既酒店，再比多少少又可以住普通 Ibis 咁～ 又有超市同餐廳， 我地就行去麥當勞食今日第一餐正餐。
食飽之後完全唔想離開，因為出面好 qqqqq 熱，好耐無試過感受過呢種濕熱既天氣，然後心情就越黎越差。我地本來過條橋就到球場，但條路唔係行人路黎望落勁唔安全，所以我地㨂左兜大圈行第二條橋過去。
Nimes 本來係法甲球隊，後來遇上種種問題越踢越差仲連降兩級，而家仲同球迷鬧交搞到就黎散班咁濟。 佢地原先既球場係唔洗過橋既，早兩年佢地決定要翻新球場然後就極速起左一個臨時球場，即係我地今日去既呢個球場。 我地本來都幾期待見下佢地既球迷，係 IG 見到佢地上場作客放左好多煙花，今日返到主場就算唔放煙花都可以睇佢地既點打氣？
入場後發現原來我地買左東看台，有咩問題？ 場波六點半開波，太陽落緊山，成個看台望住個大太陽！！！ 搵到我地個封哂塵既位之後就用紙巾抹乾淨先坐低，過左一陣有人走黎話我地坐左佢地個位。。。。原來我地入錯行。 我地成日笑人唔識對號入座，估唔到今日會發生係自己身上。 坐錯都算，但我地而家用埋最後一張濕紙巾幫人抹乾淨左個位…….. 又唔可以嬲人地點解附近咁多吉坐佢地唔求奇坐就算，係都要坐我地呢兩個位？？只可以嬲自己無睇清楚…. 嬲嬲地都廢事坐自己個位，反正大半個看台都無人坐，我行去最後企係度仲好，咁就解決左要抹位既問題，又可以食風。
等到開波，龍門後既看台仍然係無咩人，企位部份又坐滿哂人完全唔似會留位比球迷組織……. 後來先發現原來主隊既球迷組織被球隊拒絕入場，班球迷之後走去告隊波無權唔比佢地入場， 因為個球場唔係球隊既資產，而係屬於市政府，法庭亦都判球迷勝訴。只可惜我地入場睇左場毫無氣氛既賽事…… Le Mans 有大約廿人黎到作客，但佢地都彌補唔到我既失望。
成個黃昏都好無心情，場波又唔好睇，啲球迷又成日係度 9叫…..球證一吹雞完場我地即刻走人，返去張龍床嘆下冷氣好過。今場波睇左等如無睇，留返將來如果佢地舊球場真係翻新完成之後先再黎講，同埋花啲時候入城睇下個古城。 第二朝我地準備五點起身然後就即刻出發，揸多大約 900 公里去我地既目的地：Benitatxell，展開我地兩星期玩水之旅。