18.08.2023 德國足球乙組聯賽 第 3 週 1. FC Kaiserslautern - SV Elversberg Fritz-Walter-Stadion 賽果：3:2 (1:0) 入場人數： 42,621（1800 名作客球迷） 門票：17€ （企位） 更多相片
七月開季踢左三場到而家都未嘗一勝，今個星期黎到德乙第三週既賽事我地要到鄰州作客，對手係極受莎蘭人歡迎既凱莎羅頓！
凱莎羅頓係德國西南地區班霸，雖然近年只係德乙丙組徘徊，但隊波當年既風光史令到佢地今時今日即使唔再光風都仍然有一大班死忠球迷追隨。 SVE 同 FCK 係歷史上無咩瓜葛，最接近既只係我地同 FCK 二隊一齊踢過西南地區聯賽，所以就算今次係鄰州對戰都無咩火藥味。
自五月中 SVE 篤定升班後，即刻有人搵返一條 FCK 球迷訪問，當時係德乙丙附加賽最後 FCK 成功升上德乙，如果佢地升班失敗就會係丙組遇上 SVE。 呢個來自莎蘭既球迷當時勁激動咁同個記者講，「我阿爺過生前話過遲早 FCK 會遇上 SVE，但我同佢打賭：（用莎蘭話講）呢世都唔會！今日我帶左我阿爺黎（一條頸鏈），我再同佢講：呢世都唔會！！」 就係咁，條片比人搵左出黎恥笑佢，SVE 爬到上黎同 FCK 同一個聯賽～ 而球隊搵到呢個球迷出黎再做多次訪問，佢自己都覺得好好笑，雖然佢支持 FCK 但身為村民佢都好開心見到 SVE 有今日既成績。
對 SVE 球迷黎講，能夠上山作客可以話係一個光榮，今次仲要唔係上山係一個吉既球迷對二隊，而係真真正正去呢個世界盃球場對凱莎羅頓！！！ 賽前企位看台門票售罄，最後總共賣出近 1800 張飛。 我地今年再一次破作客紀錄， 1800 個球迷一齊去作客….
呢場波雖然放左係星期五夜晚六點半上演，但對莎蘭人黎講係一個唔錯既時間，因為兩地相距只有 60 公里。 我地就三點準時收工南下去作客，大約五點係市內泊低架車然後就行上山。 之前幾時黎到我地都係黎食花生所以可以泊係市外既 P+R 停車場再轉搭穿梭巴，今日就唔同啲要自己行上山，個感覺得啲似行上大球場咁～
上次黎作客區已經係 2016 年既事，大約七年後我地重回舊地，乜都無變，變既係多左好 q 多人！！！！ 入場要排隊，買野食又要排隊，到底呢隊波發生咩事，點解無啦啦咁多人～～～ 最後開波前半個鐘先成功踏足看台，又係勁多人要左攝右攝。
球迷組織係賽前同主隊申請 pass 比我落場影相，但主隊話唔會批私人名義既記者證。後來佢地拗左好耐，最後人地肯妥協，肯放我係開波前五分鐘至開波後十五分鐘落場邊影相，條件係只可以影作客球迷唔可以影場波。 等到開波前十分鐘去到看台前個閘同個工作人員講，佢話佢無收到柯打可以放人喎，然後搵第二個人黎傾，佢話唔可以開作客看台前面道閘，我要行返出去係緊急通道入去。 當時得返幾分鐘，我就衝返出去球場外面去緊急通道叫個工作人員開門，佢又話無收到柯打可以比我入去 ._. 好在佢肯走入球場問然後放我入去。
就係咁我終於成功踩下大名鼎鼎既 Betzenberg 草皮邊，仲偷影左兩張西看台連球員既相 xD 然後就係呢十五分鐘瘋狂影相同拍片，同時全身哂雞皮。 無諗過我地等到呢一日可以係度同 FCK 既西看台對唱，而陪同球隊一齊出戰既唔係得幾十或者一兩百人，而係差唔多有二千人！！！ 當中唔係得球迷組織核心球迷會舉手拍手唱歌，而家大半個看台都有一齊參與！！
十五分鐘後，工作人員帶返我出球場，然後我地奔返入去看台。 呢個時候主隊入波開齋…. 當時我忙緊攝落去睇唔到球波發生咩事。 淨係知球證吹返轉頭話要睇 VAR， 又做乜9？？？ 然後佢推翻個入球， 雖然憎 VAR 但都要慶祝下死過返生既，點知球證係轉吹十二碼。 原來呢球波係越位詐糊，但越位前我地有球員係禁區犯手球…. 真心超級on9，最後我地都係守唔住個十二碼而上半場落後一球。
下半場一開波我地極速搵到個機會追和，我地成功係山上面入波，對住凱莎羅頓入波呀！！！！個看台越黎越焗、越黎越臭、越黎越濕…. 越唱越激動。十幾分鐘後，我地再入多球波反超前！！！！！！呢一刻啤酒滿大飛，大家瘋狂慶祝，我地領先凱莎羅頓！！！只可惜呢個美好時刻只係維持左五分幾鐘就被對方追和，呢一球幫主隊燃點返團火，佢地啲球迷開始更加落力為球隊打氣，而我地就越黎越緊張。最後人地入多球迷再次領先，作客看台係最後嗰十分鐘大部份時間都靜左落黎，唔明點解三場波都領先然後失分？？ 今日賽前兩隊波都未贏過， FCK 要保住班霸面子就一定要搶分，最後佢地成功做到，超過四萬人係完場一刻同時慶祝！
而我地既球員係球證吹雞後即刻攤係地下，佢地一定都極之唔憤氣點解又要再輸波！ 但老實講，我地今日真心踢左場好波，比左好多壓力對方，又唔少埋門攻勢。 對方係要出盡奶力先贏到呢三分！！ 我地輸既係經驗，呢樣唔係兩三場波就可以儲到。我地起碼仲踢得出領隊想要既進攻足球，起碼識得入波，只係前面入埋唔夠後面失～ 唯一真係要執下既係中場好似無人識派牌，好多時後兩邊有空位都無人比波，唔知轉會窗完之前仲會唔會增兵呢？
今日雖然再一次反高潮咁失分，但賽後大家對今季都仍然抱住樂觀既態度～ 黎緊兩場波我地會去旅行，我估隊波應該都係會趁我地不在場時贏波令我地 dum 心～ 我地係九月中主場迎戰漢堡時再見！