12.08.2023 德國足總盃 第 1 圈 SV Elversberg - 1. FSV Mainz 05 Waldstadion an der Kaiserlinde 賽果：0:1 (0:0) 入場人數： 8561 （2100 名作客球迷） 門票：11€ 更多相片
一年一度既足總盃黎到八月終於又開波啦！ 我地今年既對手同兩年前一樣遇上德甲既緬恩斯，上次因為受武肺既規限唔係所有球迷都可以入場，今次算係可以正式齊齊整整咁覆桌。
咁多年來我地係足總盃既表現都係雖敗猶榮，踢得好好但對手始終都係高幾班經驗老到。 上年我地係首圈踢利華古遜出局令佢地出現信心危機（唔係我地既話佢邊會搵到 Xabi 黎執教，應該要多謝我地囉！！），然後全季又一直都有好表現，黎到今年抽中表現一般既緬恩斯，好多人都睇好我地再次晉級。
我地就只係平常心去睇呢場波，比較期待係球場臨時擴建工程完成後第一次入場。 為左迎接德甲球隊同黎緊德乙作客球迷既來臨， Elversberg 同埋附近既幾條村呢幾個月來一齊緊密咁商討點樣合作既應付人流同車量，制定比賽日既交通安排。 由於 Elversberg 地方細又無火車站，市政府要呼籲大家盡量使用當地安排既穿梭巴士來往球場。 係莎蘭幾乎個個都係自己揸車，好多人係可能細過返學先有搭過巴士，而家要佢地搭車去睇波個個都打哂問號，有唔少人上網請教點樣可以搭車去穿梭巴士站 ._. 我地就好好彩有屋企人唔洗擔心泊車問題，仲可以考慮下出租車位賺返杯啤酒錢 😛
賽前既天氣預報一直都話比賽前後都會落大雨，令到更多人想趁落雨前提早入場…. 我地都被迫要兩個半鐘前就起行係球場外排隊睇開門。 好好彩天公造美，最後個天係灰左啲，但一滿雨都無落過～ 好順便咁入場，反正今場之後我地要一個月後先會再返黎主場，可以留多少少時間係球場都好。
原先既作客看台現時改建一分為二，左邊係企位，右邊係座位。 將來個看台會搬到去原先既 A2 看台，即係而家吉左嗰一部份。 黎緊會先興建作客看台，然後先慢慢將其他擴建。 Block C 右邊而家同樣起左個臨時看台，下半部份為座位，而上半就做企位。 球員更衣室本來係看台底，而家搬左去球場後面既公共假草。
緬恩斯既球迷同樣好早就入左場，佢地離莎蘭只有大約 100 公里，只需一個鐘多啲既車程就可以黎到。 恭喜佢地成為臨時作客看台既頭二千位用家～ 後來我地發現點解明明個工程係七月頭已經搞掂得七七八八都唔想 Rostock 做第一隊黎作客。 原來作客看台上既座位唔係普通既球場座位，而家將一般既膠櫈鑽係看台上，班癲佬一齊可以好輕鬆咁拆櫈，令到個看台開放唔夠兩個鐘就收皮～～ 今日班作客球迷個個著上紅色或白色既衫黎到，左邊既企位看台視覺上都幾震撼。佢地係球員入場時放出紅煙為球隊打氣，推高場內氣氛！
SVE 係德丙既成績吸引左好多球迷，人數多左，而會穿上同球會相關既物品亦都多左好多！同時會著上其他球隊既物品亦都少左好多。 通常對住呢啲大啲既球隊都會有好多客隊或者中立球迷入場，唔知係因為只係緬恩斯既關係，定係真係我地球迷多左令到作客球迷無咁容易買到主場波飛， 真係好少作客球迷！ 呢件絕對係好事黎既～～ 史浩克同漢堡既球迷個個都話要令 Kaiserlinde 好似賀芬咸咁被反客為主，但睇黎應該無咩機會發生！
企係主看台除左睇波睇得清楚啲之後，令我更多有得著既係可以清楚聽到哂兩邊球迷既打氣聲。 作客球迷帶住二千人到場，佢地既聲勢其實係強過我地仍然建立緊既兩三百真會唱足全場既看台。但係我見到既係 Block C 真係進步左好多， 首先我地今日有朋友到場助陣，然後就係多左好多後生仔越黎越落力，係核心球迷附近亦都越黎越多人會一陣舉手拍手。 係 Block C 入面係完全聽唔到作客看台既打氣聲，但我企係主看台就可以話返比佢地聽其實班作客球迷都幾 impressive，我地仍然有待進步～～～
上半場雙方互有攻守，但今日反而睇得出我地係差一兩班，慢慢有種不祥預感。 下半場 Block C 舉起大字報為其中一名剛被驗出患癌既兄弟打氣，希望佢早日康復！ 換邊後我地越踢越後，長期被對手禁住黎攻，唔係有 Kristof 上哂身救左幾個必入球的話，今場應該會被大炒。 去左尾段球證無啦啦判左個十二碼比對方，明明第一下佢勁肯定咁指住個波示意比賽繼續，兩秒之後先吹返轉頭？？ 睇波重播明明中哂個波都可以吹罰十二碼！！！
去到最後階段我地有幾時埋門機會，又係係重要一刻中柱唔入補射又唔中龍…. 雖然唔甘心，但又唔知點解反而鬆左一口氣，幾驚我地要踢左一個追和然後又要 chur 多半個鐘踢加時。 黎緊星期五場波重要好多，寧願今場出局然後贏下一場。我地對住緬恩斯又係輸一球十二碼而出局～
完場後，球迷們仍然為球員報以掌聲，睇得出今次雖然係抵輸，但仍然係雖敗猶榮。 今季踢左三場波仍然未贏到，但大家既態度仍然正面，下一場再黎過！！