05.08.2023
德國足球乙組聯賽 第 2 週
SV Elversberg - FC Hansa Rostock
Ludwigsparkstadion
賽果：1:2 (0:0)
入場人數：8371（約 1500 名作客球迷）
門票：季票
更多相片
開季之後既時候過得好快，今個星期返到莎蘭「主場」出戰，不過第一場主場我地要借用州首都 Saarbrücken 既 Ludwigspark 球場作賽，即刻令人諗返起 2013 年第一次升班上德乙既時候，第一場主場比賽係同一個球場對同一隊波…. 當時雖然射入德乙第一球，但最後仍然係輸波收場。
想當年，第一場乙組主場比賽總共有約一千三百名球名入場。 係呀，只經計埋山長水遠黎作客嗰 500 名作 Rostock 球迷， 主場球迷只有六七百人入場…. 十年後，淨係計售出既季票都已經有超過 3000 千張！ 證名呢十年過去，雖然我地仍然比人笑無球迷，但個 fanbase 其實係慢慢咁增長緊！
我地平時都係揸車去莎蘭睇波，今日我地㨂左搭火車南下，善用下早幾個日推出全國通用既 49€ 用票同慳下油錢～ 由法蘭克福既總車站有直通車去 Saarbrücken，沿路會經過好多本地旅遊熱點，車程大約三個鐘。 我地七點鐘由屋企出發，然後買麥當勞早餐上車食，最後大約十一點半到站。
我地拎出大約二十個鐘前先收到既季票卡入場…. SVE 由鄉下隊突然變成要有規模同要跟規矩既球隊，再加上突然多左好多人對隊波有興趣，啲人想買波飛、想買季票、想買波衫、想知呢樣想知嗰樣，令到球隊突然不知所措。 七月頭開始發售季票，去到七月尾去埋漢諾威都仲未有聲氣…. 最後佢地突然宣布已經寄出，應該會係呢場波前幾日收到… 收唔到就要賽前去場外既帶齊資料去補辦今場波既波飛。 我地等到星期五收左工去睇信箱終於見到兩封信即刻鬆一口氣。
今日係我地一年內第三次黎到 Ludwigspark，上季黎到作客聯賽同盃賽決賽… 賽前我地既球迷組織有同 FCS 既球迷組織溝通好，會盡量控制自己啲人唔好亂搞事。 同前季盃賽決賽一樣我地會聚集係東看台既旁邊，唔會企係中間叫做示意 Respect，因為中間既位置係屬於 FCS 球迷既。 今季我多左一個職責，就係有球迷工作證可以係主場場內周圍走去幫球迷組織影靚相！我會努力的～～
我係東看台企左一陣，去到開波前就去左主看台度搵個靚位可以睇哂兩邊看台。 Hansa 既球迷開波前一直都好安靜，唔會有人自己發起唱歌，只會等到 Capo 發出指令先會總動員一齊出聲， 呢種規律得東德/東歐先會出現！ 之前網上有流傳過佢地主場看台既傳單，講明入得佢地既看台就一定要有頸巾，唔可以玩電話同影相，女人唔可以企頭三行，同埋唔可以講政治，唯一政治係 Hansa Rostock。
開波後兩方球迷就各自為自己球隊打氣，坐係主看台既我個感覺好似去左去 groundhopping 咁睇緊一場好有氣氛既比賽！ 上半場我地先食個越位詐糊，好正面咁期待下半場既來臨。 下半場我去左另一邊既看台，第一次以呢個角度係呢個球場睇波～ 換看台後我比較接近作客看台，發現完全呢邊看台係食哂作客看台既聲，相比下主場球迷好似無哂聲咁，間唔中先會聽到幾句。
下半場我地再次靠角球開出接應破網領先！！ 全場我地既表現一直都處於上風，有唔少有威脅既機會，睇黎我地可以獲得德乙第一勝！！ 去到九十分鐘我地仲搏到十二碼，客隊球員係咁投訴，最後 VAR 話球證判斷正確。 Rochelt 操刀比龍門撲出….. 然後 Faghir 補腳破網入門！！！ 啲球員又衝去球證度投訴，最後又係靠 VAR 話入球唔算… 龍門開波。 後來睇返先知原來 Faghir 隻腳早左一步踏入禁區，唉，點解又犯呢個錯。 上季 Koffi 做左同一樣既野但好彩球證睇唔到同無 VAR. 呢啲低級錯誤。。。。
咁算啦，都仲有一球係手又已經超過九十分鐘應該就黎完場。 點知對方開始上身，係混亂中追返一球。 我地每次失波都係衰自己，無啦啦黎個醫院波送個控球權比人反擊…. 呢度又花左唔知幾多時間係 VAR 睇入球合唔合法。 ok, 一分都唯有收貨啦。 然後我地重新開波，又甩波送左個波比人，同一個球員係禁區邊起腳穿過 Kristof 臂下絕殺反勝。 第一球波係 90+10，第二球波係 90+13， 估唔到呢種反高潮會出現係我地眼前。。。。
完場後主場球迷個個都好安靜，完全唔知比咩反應好，悲憤交雜…. 我地踢左全場好波仲要領先，點解個十二碼射唔入？ 點解球證會吹返轉頭？ 點解可以比人連入兩球？？？？ 今季踢左兩場波，我地都係領先比人追返轉頭，希望失左呢四球波可以用黎今季既學費，學識我地可能可以保持水準挑戰德乙，但對方既水準同樣高德丙一級….
我地好快就離場趕去搭火車， 本身遇左班作客球迷會搭同一班車回程… 只係估唔到警察封左個月台唔比我地上去，就連扮遊客佢都唔比，話上班好多球迷好危險。 後來我地搵左方法上去，成功趕搭火車，同班作客球迷一齊去 Mannheim。 意外地佢地個個都好安靜，只係普通傾下計，我地又可以八卦下佢地講咩。 由 Saarbrücken 去 Mannheim 要大約個半鐘車程，佢地去到 Mannheim 仲要轉多幾轉車總共仲要十個鐘先返到屋企 ._.
返到法蘭克福後相約由香港黎到既朋友一齊食飯，係武肺之後第一次有朋友到訪好開心！！！ 食飽肚之後心情終於都好返啲。 訓個覺到第二日寫呢篇野既時候，其實都幾慶幸今場只係第二場波就可以睇到邊度要有進步，例如去到九十分鐘領先一球，射失十二碼都唔緊要，但呢啲時候就唔好再諗住玩進攻足球，而係要保守啲 keep 個控球權守到完場；例如射十二碼唔好急住衝入去，我地今季有 VAR 無得偷雞…. 上季我地都係第二場輸波以為玩完，我地呢場輸得心唔服口唔服，但整體黎講大家既表現亦仍係唔錯。
今季目標真心只求護級，輸波就一定既～ 最緊要球迷同球員既態度仍然係正面，咁樣我地先可以一齊下場重新出發！ 下場我地將會挑戰德甲球隊緬恩斯，兩年前我地輸十二碼出局，今季我地要覆桌！！！