29.07.2023 德國足球乙組聯賽 第一週 Hannover 96 - SV Elversberg Niedersachsenstadion 賽果：2:2 (1:2) 入場人數：29,200 （約 200 名作客球迷） 門票：14€ 更多相片
等左兩個月終於等到德乙開波啦！ 同上季一樣我地既開咧戰要去作客，上年對手同樣係升班馬，但今季既對手係德甲乙既常客漢諾威… 對我地黎講將會係一場硬仗，可能係第一場就驗證到到底 SVE 有無能力挑戰德乙？
啲球迷對 SVE 既睇法好兩極，一班就話德丙同德乙既實力差距好大，數返之前德丙冠軍升到上去都無咩好表現；另一班就係話 SVE 唔係普通既升班馬，認為隊波既進攻足球會係德乙再次令人大跌眼鏡。 我地上季季尾雖然差啲臨尾香，但大家對隊波比上季季初更加有信心。 最主要係我地無失去重心球員，最主要既收購都係用黎增強我地既攻擊力。 領隊話過最緊要前面識入多幾球，後面失幾多球波都唔重要，好過以 1:0 完場。
星期五晚我地先坐係電視前睇今季既第一場德乙賽事，首先係要等德乙開場既 trailer 等住見證球隊會徽既出現！ 場波起好睇，睇睇下會突然「醒覺」 ，醒起我地黎緊都會係呢個球場作賽，我地黎緊都會遇上呢兩隊波，我地同佢地踢同一個聯賽！！？！ 然後就越黎越期待第二朝既旅程！
由莎蘭出發既球迷巴士將會係凌晨四點開出，我地就會由法蘭克福搭八點既火車直上去漢諾威。 住係法蘭克福既好處就係交通四通八達，唯一壞處只係呢幾年都唔會有廉航要硬食貴價機票。 今次我地㨂左搭 Flixtrain，唯一原因：平！ 每人來回只需 32€～ Deutsche Bahn 就算有 bahncard 都做唔到呢個價。 要留意既係如果你黎歐洲旅遊買左 Railpass 或者經 DB 買任搭既火車飛係唔包 Flixtrain，因為 Flix 係獨立營運既公司， 同樣如果因為任何原因搭唔到 Flixtrain 係唔可以轉搭 DB 營運既火車，佢只可能幫你安排下一班火車（通常佢一日得一兩班），或者改搭 Flixbus。
我地心情好興奮咁去到法蘭克福西站上車，對號入座坐低之後，有一班粉紅色既女仔上車…… 即刻好想喊。 係外國好興婚前既告別單身派對，係德國就通常就啲男女會各自各同朋友去玩幾日，又唔知點解我地成日都係火車上遇到粉紅色人 （就連之前係挪威都遇到）。 佢地無視旁人，係車廂入面播音樂傾計飲酒，我地又好好彩咁坐係佢地中間….. 嗚 呢一刻覺得早知比多啲錢搭 DB 火車起碼可以㨂靜音車廂。
搭左三個鐘車之後終於到達目的地，Hannover! 早幾年我地係冬天黎過睇波，但我完全無哂印象，淨係記得我地要搭地鐵係 Waterloo 車站落車然後行去球場。 今日我地就要搭多兩個站去到球場既另一邊行去作客區。 係車上有小朋友見到我地身上有個起迷你既 SVE logo 指住同佢爸講「呢度有作客球迷呀！！」我反而驚訝以為啲細路已經知道 SVE logo 係咩樣！！ 行去球場既路上又偷聽下啲主場球迷傾計，有啲係度爭拗 Elversberg 係邊，有人話係柏林，有人話係南部，有人話係法國邊境然後講解下歷史咁。
去到球場外，做完安檢就要爬樓梯去到球場上層，以作客球迷身份進入世界盃球場！ Niedersachsenstadion 既作客看台係好多球迷都盛讚視覺一流，唔似弗賴堡舊主場個垃圾看台。 果然係呢個看台我地可以係角球旗後飽覽全場，完全無野可以投訴！ 球場可以容納 49000 人，可惜今日對住升班馬只賣左六成左右。
球迷組織以看台既上半層做據點，等大家可以企得集中啲同埋唔洗行幾十級樓梯上上落落去買野飲野食。 我就大部份時間企開左想感受下德乙既氣氛，同埋影下班球迷幫大家做下紀錄。 今日有兩架球迷巴士到場，另加自己揸車球場既球迷總共有二百人。 好多人恥笑我地上到德乙都係得小貓三四隻，但我地覺得有二百人肯比幾十歐搭巴士，甚至比更多錢黎到過夜已經覺得好感動。
入場後大家傾計傾左大約個半鐘，講下對今季既期望，黎多次直接升班就應該無咩可能，希望可以繼續踢出好波然後係乙組站穩陣腳～～ 傾下傾下就終於等到球員入場，我地今季既德乙旅程終於正式展開！！！頭十分鐘主隊好主動咁搶攻，睇到大家都好緊張，好在我地都慢慢適應個節奏開始踢得出本來既水準，而呢個水準似乎能夠應戰乙組既水平！ 第 22 分鐘，我地靠角球開出接應篤入破網，德乙第一個入球呀！！！！！！
我即刻衝返上去同大家慶祝呢個歷史時刻～～ 後來班友玩裸上身我就逃離去返搵個有新鮮空氣既位置繼續睇波 xD 去到近 40 分鐘，我地憑對方交失波即刻轉身反擊射入第二球，我地領先漢諾威兩球！！！！！我想講入第二球波呢位球員得 20 歲，係由史特加借黎一年既丹麥小國腳，佢對腳勁有力有多次機會既轟炸個龍門， 呢腳都係靠佢既勁射連對方龍門都擋唔住而入波。 睇黎我地可以忘記 Woltemade 然後封 Faghir 做新球王。
去到 40 分鐘，我地即刻上演左史上第一場德乙，第一兩球德乙入球…. 然後三分鐘後仲有第一個 VAR 同第一個十二碼。 但呢個十二碼係判比主隊既…. 比佢地係完上半場前追返一球。 呢一球無損我地既信心， 因為隊波真係踢得唔錯，應該可以繼續入波。 可惜係下半場開波大約十分鐘後，比對方係右路傳中入波 T_T 我地都開始擔心會唔會捱唔住… 雙方後來都互有攻勢，但我真心覺得我地踢得好好多～～ 有多少少少少運既話應該可以入多幾球波！！
等到球證吹雞完場，作客看台上既球迷個個都舉手慶祝球隊獲得德乙第一分，睇得出就算領先兩球被追和大家都對隊波既表現完全收貨，好開心咁以掌聲為走到看台前既球員鼓勵佢地繼續努力～
離場後我地就搭地鐵返去火車站，去麥當勞食啲野就搭火車返法蘭克福。 返到屋企仲可以今日德乙尾場 Düsseldorf 對 Hertha，又突然醒覺… 呢兩隊波都係我地今季既對手！ 係德乙我只有三個球場未去過，但就算大部份球隊都已經睇波，今季以作客球迷身份入場同睇波真心完全係另一種感受，有一種鄉下仔出城既感覺。 「原來呢個球場既作客區係咁既樣」 「原來人地成日講呢個作客區點點點係真既」… anyway， 下場我地會係莎蘭迎戰 Rostock，希望可能取得歷史德乙首勝！