03.06.2023 莎蘭盃決賽 1. FC Saarbrücken - SV Elversberg Ludwigsparkstadion 賽果： 2:3 (2:2) 入場人數： 8305 （約 1000 名作客球迷） 門票：11€ （另加 1€ 手續費） 更多相片
本來作為德丙頭四已經自動獲得晉身來季足總盃首圈既資格，而對手 FCS 雖然排第五，但因為弗賴堡二隊無得參賽所以 FCS 來季都自動有得踢首圈，但始終都要跟返球例進行決賽定出冠軍，另外舉下季軍賽決定邊隊波代表莎蘭出戰足總盃。來季將會係 28 年來首次有三隊莎蘭球隊躋身足總盃，光復莎蘭！
上星期係德丙封王後，兩隊波一齊去左德國人最愛既西班牙小島馬略卡放假，返到黎練左一日波就去到 Saabrücken 出戰莎蘭盃決賽。雖然今年個盃係雞肋，但有邊個會唔想成為冠軍，有邊個 SVE 球迷會唔想隊波再一次衛冕成功，再一次成為雙冠王？
年頭聯賽作客 FCS 時我地有近 1700 名球迷到場支持，今日就大約有近 1000 人到場。 主隊亦都唔係特別多人入場睇呢場決賽。 由於今場係莎蘭盃，主辦單位係地區足總 SFV，而主辦場地一早就定左係 Ludwigspark 舉行，只係咁岩入到決賽既其中一隊係 FCS。 佢地得到 SFV 批準，可以係今季最後一場「主場」賽事中同季尾離隊既球員道別。到賽前為止確定會離隊既有九名球隊，咁多人同時離隊係低組別聯賽好常見，只係今季士氣唔錯既情況下去到最尾先升班失敗，然後又失去多位重心球員，來季能唔能夠保持現有水準將會係一大難題。
而 SVE 暫時亦都有兩名球員確定離隊，Mustafa 來季會留班加盟 Viktoria Köln，為既係有更多既上陣機會；另一個就係來自不萊梅既借將 Woltemade。 好多人認為佢應該留係 SVE 拎多一年德乙既經驗，但佢一直都話只要佢母會有預埋佢一份的話佢一定會返去。
今場波我自己企係看台後方，想靜靜地睇下波，睇下對面看台既打氣咁。 話哂黎緊呢季我地都唔會見到佢地又唔無得踢莎蘭盃，暗地裡同佢地道別一下！我附近好多後生仔一大班朋友黎睇波，亦都有家長係度傾計。 其中一個家長話上星期係佢第一次比個仔自己一個同朋友搭球迷巴士去作客， 本來有啲擔心會有人搞事之類， 但佢返到黎好開心咁又咩事都無發生。 賽後佢係巴士站諗住接個仔返屋企，但個仔話大家會係度等球員巴士返黎然後一齊慶祝唔想走住，後來個個放哂煙花咁慶祝，佢都好開心慶祝埋一份。 好多普通球迷唔係特別中意 FCS，主要係因為佢地覺得班球迷全部都係搞事份子咁，而近年因為 SVE 既掘起佢地間唔中入場睇波先發現原來唔係全部球迷中意搞事，幾中意而家呢種和樂融融既感覺。 不過講真， SVE 球迷其實都有出過事，只係無上到報紙；同埋老實講，我地個規模咁細想搞事都搞唔起。 現時目標係要吸納年輕新血，將球迷文化可以慢慢發展同傳承落去，無論最後行和諧定行搞事路線都好，要有年輕人肯一定癲先可以維持落去～
等到球員入場後，雙方看台都開始唱歌打氣。 我地呢邊開頭都幾好， 我附近既後生仔都有跟住一齊唱，只係唱左大約廿分鐘左右後面就靜左落黎，我都唔好意思長期唱落去。 對方開波七分鐘就入波領先，好在幾分鐘後我地好快就追和洗牌再黎過。 下半場開波無耐我地因為手球而獲得十二碼，由借將 Woltemade 射入反超前，點知六分鐘後又比人追和返。 呢個時後主場既球迷打氣聲超強勁， 係下半場大部份時間我都聽唔到下面唱緊咩，有時仲以為係無人打氣～ 可能要佢地唱左幾輪先慢慢傳到去後面知佢地做緊咩！
FCS 球迷今日睇黎選擇無論隊波踢成點，佢地都會好好享受今季最後一場波。 由開波到完場佢地不停咁打氣，中間大部份時間將看台分開兩邊互相以唔同方式對唱。 以球迷文化黎講，無可否認佢地高我地幾班。
去到九十分鐘都仲係 2：2，代表要進入加時….. 加時開波後三分鐘，我地另一名由緬恩斯黎既借將為我地射入奠定勝局既一球！！！ 佢後備上場之後係咁比人話佢獨食帶波帶到甩腳，估唔到最後成材入波！我估佢季尾都係會返去緬恩斯，只係現時未有消息證實～ 班球員呢個星期掛住現無咩特別操練，去到下半場有一兩個球員抽筋倒地左幾次，可能係為左浪費時間，可能真係抽筋…. 話知佢～ 最後球證吹雞完佢，莎蘭盃冠軍已袋，再一次成為雙冠王！！！！
上季我地係地區聯賽冠軍同莎蘭盃冠軍，今季我地係德丙冠軍同莎蘭盃冠軍！ 完場後班球員即刻走到看台前同球迷一齊慶祝，頒獎後拎埋個盃黎到一齊影相留念同再次慶祝。 佢地上星期係市政府前同球迷一齊慶祝時自己帶唱 Allez allez allez，身為球迷除左見到隊波會開心之外，見到班球員識唱自己既歌更加開心，代表我地唱得夠大聲既同時佢地亦都有聽入耳。
季前完全無諗過今季會有真 bbq 開心大結局，唔知來季會係點呢？ 做升降機？ 好多人話德丙同德乙係兩個唔同世界，但睇下升班附加賽…. Wiesbaden 係首回合大炒早兩年先由德甲降班既 Bielefeld。 直接升班就超級真心覺得無可能，希望我地可以負負碌碌咁護級成功就心滿意足！ Anyway，首先要以雙冠王之名好好咁享受今個暑假，有咩留返七月先再講～～