27.05.2023 德國足球丙組聯賽 第 38 週 FC Ingolstadt - SV Elversberg Audi Sportpark 賽果：1:2 (0:1) 入場人數： 4991 （約 300 名作客球迷） 門票： 14€ 更多相片
上星期確定左直接升班，黎到今季最後一場波就得返一個目標：贏冠軍！ 其他隊踢成點都唔關我地事，只要我地贏波就有冠軍，清楚簡單！
話就話今場波無咩壓力，但大家始終都想要一個完美結局，我地成個星期都好緊張咁期待呢場波。星期六一早六點都未夠就醒左，然後早過預期出發南下去 Ingolstadt。 最近天氣開始晴朗，三個半鐘既車程全程都係萬里無雲咁～
有留意開德甲既應該都有聽過 Ingolstadt 呢個名，早幾年佢地踢過兩季德甲。但 Ingolstadt 出名既唔係隊波，而係汽車品牌 Audi 既總部同工廠。係公路上面越接近 Ingolstadt 就越見得多同 Audi 相關既路牌，而其中一個就係球隊主場 Audi Sportpark。
呢隊波通常自稱 FC Ingolstadt 04，一睇以為佢好似史浩克 Schalke 04 咁係成立於 1904 年。 咁你就錯啦，呢隊波係成立於 2004 年，係 Audi 話人地 VW 有隊波， 我地都應該要有隊波，最後成為一隊可以掩人耳目既 00 後球隊。 係現今既足球世界，好多時有錢就可以買到榮耀，Audi 都係透過收購同合拼當地本來既細球隊而組成 FCI 係第四級聯賽出發，然後用大約十年時間升到上德甲。
Audi Sportpark 容納人數係 15200 人，岩岩好符合德甲最低要求。 而 Kaiserlinde 黎緊既球場擴建計劃將會能夠容納 15500 人，今日可以入場黎個 preview 感受下擴建工程完全後既球場大約會係咩樣。 我地係球場外泊低架車之後，就行去作客區買飛。 大約二百米既路程上遇上唔少同樣提早到達既 SVE 球迷～ 去到門口仲見到有架球迷巴士泊左係度，而個車牌係來自 Augsburg?? 一開始以為只係有架普通巴士，但佢地車頭掛左 SVE 頸巾，然後車外班人著哂 SVE 波衫咁係度飲啤酒吹水，有啲人仲著巴伐利亞既傳統服裝，佢話佢地真係來自巴伐利亞。 個個好驚訝我地岩岩先踢出個名堂，洗唔洗咁快就有州外球迷？？ 原來佢地係來自 SVE 球員 Manuel Feil 既母會 FC Reutern （位於 Augsburg 鄉郊）既親友黎支持 Reutern 之光～ 後來 google 下發現佢地早兩年仲特登去到 Elversberg 支持佢，果然係兄弟情深，好浪漫！！
入到場後就先影下吉既四方球場，想像唔到 SVE 既主場將來會有咁既 size…. 然後就去買野食同野飲。 巴伐利亞菜可能好出名…. 但佢地既球場食物真係超級難食，聞下都想嘔！！！ 上次作客 1860 時已經頂唔順，淨係買舊 Brezel 黎食算，但佢地既 Brezel 又咸又乾，食左幾啖就食唔落，其他選擇就係烚腸同烚類似午餐肉咁既物體。 每次有人企係旁邊食我都以為人地係度嘔緊胃氣 XX((((( 呢個球場既野食完全一樣… 好彩我唔肚餓唔洗夾頭食， 淨係買左杯啤酒黎飲就算。
球迷巴士係路上塞車，最後係開波前大約半個鐘先到達。 今日只有三架巴士出發，因為星期一係公眾假期，啲旅遊巴公司一早就被旅行團預訂哂，第三架巴士都係賽前幾日先攝到出黎～ 好在佢地最後都趕及係開波前入場同做好準備。 今日係德丙既最後一個比賽週，所有賽事同時間進行， 個個都開哂 notification 黎報其他賽事既情況，最主要係想知邊隊同我地一齊直接升班，另外要知我地同州「大佬」有咩結局～～
係球員入場前，賽會放左丙組獎盃係球員通道前… 係弗賴堡亦都同時有一個，到底冠軍誰屬？？ 開波後幾分鐘我地極速入波領先！！ 由後場放個長傳比今季助攻王 Rochelt，佢左腳了左個波落黎之後右腳挑入，成個動作流暢到！！！ 果然係拜仁既青訓…. 我估好多球探已經想向佢入手！！！領先後我地有幾次埋門機會但把握唔到，其餘時間好似比主隊禁住黎攻咁。 我地估劇本應該係比人追和完場…..
FCI 跌到落黎丙組之後既入場人數得返大約三千人左右，球迷組織亦都唔多人，我地無咩機會聽到佢地既打氣聲。 下半場開波後不久果然比主隊追和，又係後場失誤而送機會比人。 下半季真係好多球波都係因為自己蝦碌唔專心所以失波，唔通我地同冠軍無緣？ 三分鐘我地又有個後場長傳上去，同樣係 Rochelt 接應然後傳比德丙最佳球員得主 Woltemade， 當我見到佢拎波後我就知佢會入到波！！！！！
淨返大半個鐘，我淨係希望班球員可以醒定唔好犯錯…… 快啲完場。 望住個鐘一直倒數，直到球證終於吹雞完場。 德丙升班馬成為德丙冠軍！！！！！！！！ 呢場波完場時，其他賽事都同樣已經完場或者接近完場。 呢一刻， 同我地一齊直接升班既係 Wiesbaden，踢附加賽既係大佬 Saarbrücken。 係我地衝哂上圍欄上慶祝時，係人群中突然傳來消息，Saarbrücken 爭升班失敗，就連附加賽資格都無埋！！！！！！ 哈哈哈哈，事關另一場波 Osnabrück 係補時四分鐘同六分鐘連入兩隊反勝反超前，就連 Wiesbaden 既直升席位都搶走埋！ 當時 Wiesbaden 場波完場後佢地以為自己篤定升班已經衝哂落場慶祝…. 無諗過球場開咪宣布 Osna 既賽果最後得返附加賽資格。 有咩開心過自己做冠軍升班，然後日日唱衰你又睇唔起你既球隊升班失敗～～～？
另外想提既就係巴伐利亞既保安，我地一直都知成個地區啲保安都 on99。 早幾年去慕尼黑踢附加賽時，佢地真係拎尺黎席我地啲旗同旗杆，然後話長左幾 cm 要我地改短？？ 今日係 Ingolstadt 佢地好擔心我地會衝落場，係下半場已經慢慢越派越多人企係看台前守住門口。 到近完場時有 SVE 球隊職員企係看台前，啲保安過黎叫佢地走，連想影低球迷慶祝一刻都唔比。 後來班球員捧完盃想走黎看台前同球迷握手都比班保安趕走？ hello?????
我地既 2022-2023 德丙之旅以升班馬做開始，以冠軍做總結。 我地由第十個比賽週開始一直企係榜首到完場，去到呢一刻都仲係覺得難以置信。 今季一開始只求護級成功，由頭場大炒 Essen、足總盃技術性擊倒踢利華古遜出局、大炒呢隊大炒嗰隊，2022 年作客不敗、成為最佳升班馬…. 去到今年改變目標爭升班，連續幾場不勝、失分失望、開始懷疑到底係咪真係會升班到，最後由領先 17 分去到最後兩場先有定論。
呢啲故事通常只可以係新聞上睇到然後羡慕人地，又或者只會係打機先出現…. 但而家我地竟然有份參與呢個歷史性時刻！好老套咁講句，要多謝命運令我遇上一個來自 Elversberg 既鄉下仔然後成為佢地既一分子。就算話我已經睇左好多年足球，以前大部份時間都係係電視機前面睇，係電視機前睇足咁多場利物浦既賽事見證隊波贏歐聯以為自己經歷好多。黎到德國同一大班鄉下仔一齊睇幾年地區聯賽，一齊搭巴士飲熱啤酒，一齊來回搭八個鐘車睇隊波踢屎波，一齊經歷升班失敗，一齊經歷賽季低潮，一齊衝去看台前鬧球員鬧領隊，一齊經歷武肺要爬牆睇波，一齊衝落球場慶祝… 呢啲種種係電視機前感受唔到；就算間唔中去現場睇一兩場波都感受唔到。
下年我地繼續一齊出戰德國各地，去柏林，去史浩克，又或者會去漢堡兩次。之前一直煩惱緊到底幾時先去到德國北部，下季有 SVE 帶我地去波羅的海！！！！！！
但係呢，聯賽完左姐，但仲有莎蘭盃決賽要踢架。 今年莎蘭盃決賽係 SVE 對 FCS，咁德甲乙同德丙頭四名就直入足總盃首圈既， FCS 雖然排第五錯過左升班，但由於弗賴堡二隊唔踢得足總盃，個席位就送左比 FCS，即係原本用黎決定邊隊會代表莎蘭晉身足總盃既決賽已經變得無意義，但又要跟球例完成先可以搞決定第三名既賽事 （即係下季會有三隊莎蘭球隊出戰足總盃！） 我估 FCS 應該完全唔會想踢呢場波睇住我地係佢地面前慶祝～～～