20.05.2023
德國足球丙組聯賽 第 37 週
SV Elversberg - SV Wehen Wiesbaden
Waldstadion an der Kaiserlinde
賽果： 1:1 (0:0)
入場人數：7253 （772 名作客球迷）
門票： 10€
更多相片

上星期作客弗賴堡輸波而回，我估班球員只係想等到係主場先升班同所有球迷一齊慶祝！剩返最後三場只要贏其中一場就篤定升班，主動權係我地手上。

Kaiserlinde 因為球場擴建工程，今季一直都只係開放三邊看台，C1, 主看台同作客看台，客隊多球迷黎既話就會開埋作客看台旁邊既小看台。 當最後一場主場賽事既門票開售後，好多人都即刻搶購希望可以入場見證歷史一刻。 今場波既對手本來就無咩球迷用唔著 A2 看台，當球隊宣布額外開放 A2 看台之後，幾百張門票再一次係幾個鐘內就賣哂。 之後仲有好多人係 Facebook 度想收飛，甚至有人賣黃牛飛… 到底啲人係邊度彈出黎？？ 😀

球場今日特登早啲開門用黎疏通人流，好多人都係開波前兩個鐘就企係度等開門。 我地帶住兩老都提早入場等佢地可以霸到欄杆位可以挨下～ 啲球員都未入場熱身個看台就已經超過半滿，大家都帶住期待又不安既心情去迎接呢場波….

黎到季尾我地既表演開始不穩，好似自從班球員被認為有力爭升班之後就開始有壓力放唔開黎踢咁。 今日黎作客既雖然唔係咩大球會，但對方始於有出戰德乙既經驗，今季又一直係升班區域緊貼係我地後面，要贏佢地唔係一件易事。

愈近開波我就愈緊張，心跳愈黎愈快連野都唔想講，想快啲開波但又好驚又一次失望，同時又唔想再等落去… 一直眼望住作客看台既紅衫人慢慢蒲頭，然後我地既主看台亦都慢慢企滿，企左兩個鐘之後兩隊波既球員終於係球證既帶領下入場，然後就開波！

企係看台上既我地唯一可以幫到手既就係唱歌打氣，我將我擔憂同希望都借把口釋放出黎，心情反而慢慢平伏返少少。 班球員今日主動好多，甩左波會即刻力追。過去兩個月佢地真係離哂魂咁一係唔追一係龜速追波… 大約 20 分鐘我地送到個波入網，可惜係越位詐糊！！！ 上半場後段既控球權大部份時間都係我地腳下，後來對方後衛仲食直紅離場，大家深信只要 keep 到呢個 momentum 既話應該可以係下半場入到波。

作客球迷今日竟然帶左超過七百人球場， 仲要個個都著哂紅衫睇落氣勢唔錯。 佢地仲係比賽期間無間斷咁打氣，下半場開波時仲放紅煙，睇黎佢地心情好靚。

果然係下半場開波後幾分鐘，我地憑角球開出頂入開齋！！！！！！ 呢個時候我只希望快啲完場，一直睇住個時間…. 仲有半個鐘，仲有廿分鐘…. 然後去到仲有大約十分鐘，領先一球最危險….. 可唔可以快啲入多球？？ 睇住佢地有幾次落到底線入禁區都係差最後一腳，然後 Rochelt 有個單刀機會中楣都係拉唔開。 大家又開始緊張，無啦啦係度討論一完場就要破閘而出衝入球場，然後要收返哂啲旗之類，個個分哂心，C1 看台甚至有短時間係靜哂落黎。 我開始有種莫名既不安感…… 81 分鐘對手追和。 我真心認為就係佢地無啦啦分心先搞到破攻囉！！！

不過…. 其實我地和波有一分都已經可以幾乎篤定直接升班。如果只得一分我地最後一場失分的話，Dresden 贏哂就可以爬頭，我地只要望住同州「死敵」 Saarbrücken，佢地贏埋餘下兩場只會同我地同分，而我地得失球差領先 15 球，數字上如果佢地可以兩場內入 18 球波就可以爬頭。 如果佢地真係做得到的話就抵佢地升班啦！

最後嗰八分鐘我緊握拳頭，我要求唔多…. 唔好再失波就得。 終於等到九十分鐘， 球證竟然補時五分鐘？？？完全唔知點樣計返黎囉！ 班球員都可以放慢腳步，盡量保持控球權。 呢個時候有啲球迷係度噓班球員。 睇黎佢地唔知和波就可以升班？？ 最後最後……..球證終於吹雞完場！！！！！！！ 有部份人即刻踢閘衝出去，主看台好多人連手都無拍唔知發生緊咩事。 而我就周圍捉住人問係咪真係和波都可以升班？？？？ 個感覺好唔真實….

見到班球員都互相擁抱慶祝，可惜我地未篤定升班，球隊唔可以光明正大咁慶祝住。 但佢地都借最後一場主場黎多謝所有人今季既付出，係球場中心搭台播歌同宣布贊助商送出免費啤酒，然後叫大家一齊走落球場開 party～ 個 party 最後到入黑先完…..

！！！！ 係我地寫呢篇後記時，Saarbrücken 竟然作客賽程 2:2!!!!!!!!!! 多謝佢地送分幫助我地升班！！！！！！！！！！！！！ 雖然知道佢地只有同數上仲可以同我地爭直接升班席位，但自己總會不自覺諗佢地可能真係兩場大炒人地呢… 點知佢地自爆。。。。。。 上年我地先岩岩升上德丙，黎緊我地真係升班上德乙，然後去柏林奧運球場作客？？！！ Ok. 我收捨下心情先，留返下場今季最後一場先再討心聲（希望幫球員而家可以放鬆心情踢返上半季水準，贏波做冠軍～～）