14.05.2023
瑞士足球乙組聯賽 第 33 週
FC Vaduz - FC Aarau
Rheinpark Stadion
賽果： 0:1 (0:0)
入場人數：1658 （300 名作客球迷）
門票： 35CHF
更多相片

列支敦士登，我細細個就聽過呢個名啦～ 呢個名永遠同魚腩掛勾，印象中好似真係未見過佢地贏波。睇完 SVE 作客弗賴堡提早封王升班失敗之後，我地繼續南下去奧地利邊境過夜。

無諗過一個奧地利小鎮 Lustenau 竟然可以有九間中餐廳，黎左歐洲咁耐都未去過食中式自助餐，睇黎係時候要試一次。 一入門口就似係香港飲茶咁勁多人係門口等位，但全部都係本地人！！！ 我地㨂左自助餐連「蒙古燒烤」， 張枱上面多一塊牌，上面有好多個唔同色既迷仔文件夾。

原來㨂包埋燒烤先有呢啲文件夾，係自助餐區有一區係生肉、生海鮮同生菜。 你㨂左自己想食既野之後就將隻夾夾落隻碟度交去「燒烤區」，然後就會有人幫你燒同送去你張台，唔洗企係度等。 坐係度等野食黎既時候望多次塊牌先發現原來啲文件夾唔同色係代表唔同醬汁… 例如紅色夾係燒汁，綠色夾係甜酸汁咁，好在我求其拎左隻夾係燒汁夾…. 如果係甜酸汁的話真係會嘔。 但就算係燒汁都勁咸勁難食，塊肉又比佢燒到乾哂，其他野食又係多汁勁咸咁。 唯一食得落口既係壽司同燒麵 -_- 食左兩碟就已經食唔落，係無左胃口嗰飲飽…. 最後連埋野飲每人要成四十歐，當買個經驗同想警世無論你有幾掛住中餐都唔好係歐洲食中式自助餐！！

好在第二朝既酒店早餐搭救，食飽後就出發去呢個位於阿爾卑斯山山脈既蚊型國家。列支敦士登夾係瑞士同奧地利之間， 如果唔係要去打卡拎多個國家既話應該有生之年都唔會特別考慮要黎旅行。 係瑞士過左萊恩河之後好快就到球場，而球場外就有一個大停車場，係星期日同公眾假期可以免費泊車！

難得黎到魚腩國，無理由只係睇一場波就走人既～ 泊低左架車後，我地就行去 Vaduz 市中心參觀下。 沿路望向四邊都係一座座既山脈好靚！ 列士敦士登同瑞士無咩分別，兩國都係用瑞士法郎，一樣都係講瑞士德文，一樣都係咁貴，所以我地都無預計會係度花任何錢。

行左大約個半鐘個天開始落雨，好在我地已經慢慢行緊返去球場。 售票處位於場外既巴士站，比賽當日係母親節，FC Vaduz 係賽前宣布左今日所有女性免費入場，仲會免費獲得一杯香檳！ 咁樣就慳左 35 CHF! 我地朝早係酒店整左兩份三文治諗住帶入場食， 入場時佢 check 袋時話唔可以帶外來食品，我話但我唔肚餓唔可以即刻食落肚，咁我掉左佢好無？ 佢話咁又唔好咁浪費… 然後就當睇唔到比我帶入場，同時比左張可以換香檳既卷我～

換左杯香檳之後就搵位坐低，呢場只係瑞士乙組聯賽，唔會預有好多人入場。主隊又已經護級成功唔會降班，已經無咩好爭，只係無諗過佢地既球迷組織無人入場，係一個人都無。 客隊帶左三百名球迷入場，今日就變到好似佢地主場咁，仲唱足全場！

Rheinpark 球場可以容納近八千人，係國家隊同 Vaduz 既主場。 雖然 Vaduz 只係踢緊瑞士乙組，但係列支敦士登入面都有個國內既盃賽，贏左仲可以出戰歐洲賽外圍賽。 呢個盃賽就當然係 Vaduz 一隊獨大啦，另外同樣係瑞士聯賽打滾既六隊球隊根本無咩機會可以爭。

客隊最後係完場前無耐射入全場唯一一個入球，我地附近原來都有好多 Aarau 球迷好興奮咁慶祝。 呢三分令佢地進入升班附加賽既希望大增，可能來季會係甲組見到佢地～

完場後，我地拎返架車就揸去 Vaduz 市內去超市。 無錯，超市竟然係星期日都開門！！！ 難得黎到緊係要買返啲手信啦～ 買左幾舊列士敦士登芝士，買啲阿華田小食，買啲當地啤酒～ 滿載而歸返去法蘭克福！