13.05.2023
德國足球丙組聯賽 第 36 週
SC Freiburg II - SV Elversberg
Dreisamstadion
賽果：2:1 (0:0)
入場人數：3759（750 名作客球迷）
門票： 13€
更多相片

我地既目標由一開始只求護級成功到而家要爭取升班甚至贏冠軍，今季亦都慢慢進入大直路，目標清晰簡單，剩返三場波只需要贏一場波就可以升班 ，今日贏埋仲可以提早封王。 呢個美夢吸引左超過七百名球迷去弗賴堡作客，希望可以現場見證歷史一刻。

上場波由失兩球再反勝大炒令大家都額外興奮，不過對手只係榜尾既升班馬。 去到今個比賽週亦都確定護級無望要做升降機來季跌返落去地區聯賽。 我地今日既對手係一直緊追係後面既弗賴堡青年軍，首回合我地係主場輕取佢地，黎到季尾我地既表演開始不穩，要作客贏波未必咁容易….

不過足球就係無話容易定難，十二月我地都以為唔會咁易贏到佢地，今日可能隊波紅色箭咀向上好快咁搞掂升班呢？ 比賽當日我地預大約三個鐘車程由法蘭克福南下；係莎蘭有七架球迷巴士出發， 佢地會穿過法國啲鄉村地方南下同樣都係預大約三個鐘。

弗賴堡二隊係我地係西南地區聯賽常見既對手，一直都係去佢地既訓練場 Möslestadion 作賽。武肺之前仲睇中左 SVE 去作客既週末同時有一隊主場出賽，當時佢地既賽事好難買飛，咁岩當日既作客球隊係老遠既禾夫斯堡，作客區好多飛剩可以扮作客球迷入場～ 估唔到幾年後可以以真作客球迷身份去返同一個區！

Dreisamstadion 位於住宅區，係比賽日周圍都係封路只准居民出入。 球迷自己揸車到場的話可以泊係大學停車場，日泊只需一歐～ 然後行去球場只需十分鐘。 我地到場時球場先岩岩開門，而球迷巴士亦都剛剛到達， 所以我地都拿拿聲入場先避開人潮。 呢個球場既作客區分上下層，下層係企位，上層係座位。

開始售票時球迷們同意一齊買上層，雖然係貴啲但個視覺靚好多，同埋近個上蓋多啲咁啲迴音都再響啲～ 呢個球場既作客場有最差作客區既美譽，事關下層企位有啲地方根本唔會睇到場波… 而保安方面亦都勁麻煩。 入場時佢地連 m 巾袋都要望下都算，然後要上上層的話，係地下有首閘要比佢地望下張飛先，行到上去又有一部機要嘟飛先再入得。 個看台又勁危險，無論你坐低定企係身都唔會夠位比人行過。 佢又得一個出入口，以為行到最高或者最低嗰行會有多啲行可以行，點知又無位既。 最後好多人都就咁企係近出入口既地方算，廢事迫黎迫去。

下層企位睇唔到波嗰個位反而係影上層既靚位，上半場我就企係下面睇波同影下相咁。 七百人一齊去客又係球隊其中一個歷史時刻～ 今年我地作客 Wiesbaden 有大約五百人，同州打比有超過千五人，然後星期一作客 Mannheim 又有三百人，今次要超過三個鐘車程既 Freiburg 有超過七百人！！！ 但其實睇波呢幾場既戰績…. 咁多人去撐場好似反而比左壓力班球員咁，除左打比戰之外佢地都踢得麻麻地仲要輸哂 ._.

今日我地希望可以動員全村集氣改寫命運！！ 弗賴堡既球迷組織通常如果係一隊無比賽既情況下佢地會入場去撐二隊， 好在今日佢地要作客柏林聯，場內就得啲小朋友係度帶動氣氛。 上半場兩邊互有攻守，但我地又硬係差咁啲咁…. 無咩有威脅既埋門。

去到下半場中段，球證判左個十二碼比對方。 雖然個波係球場既另一面，但嗰刻完全唔知咩事比十二碼？ 我地既球員係有伸左隻腳出黎，但對方球員跑左兩步先跌架喎？？？ 隊波本來已經唔係踢得好，失左呢球黑哨十二碼算係打沉左隊波…. 一球都仲有望追到既，和波我地都收貨。 可惜約十分鐘後人地入多球… 去到近完場前， Feil 同上場一樣黎個窩利追返一球，只係為時已晚… 完全睇唔出今場既水準會有能力扭轉局面。

同時，其他競爭對手個個都贏波就得我地輸波，爭升班既形勢即刻變到緊湊好多。 賽前啲媒體個個都話我地準備今日封王升班，到而家話我地好大機會臨尾香。 輸波的確係好失望，點解次次咁多人作客既時候都無好結果～ 季初無咩壓力既時候明明踢得好好架。

完場後，班球員慢慢咁行過黎作客看台，慶幸迎來既仍然係球迷既掌聲同鼓勵，有頸巾既就舉起頸巾，無頸巾就拍手等班球員唔好氣餒。下場就係今季最後一場主場賽事，主場區完全售罄，希望我地比到既係額外既能量，唔係壓力….

弗賴堡雖然無得升班，但佢地仍然可以成為丙組冠軍。 賽後佢地落後我地三分排第二，另外兩隊就落後四分排第三同四。 下場對手就係排第四既 Wiesbaden。 大家計完數之後，就係下場只要和波然後靠得失球差都可以直接升班。 但我唔想計數，最清楚既結果就係：贏波！！向好方面睇，返到主場同所有村友一齊慶祝一定會更加難忘！！！！！