06.05.2023 德國足球丙組聯賽 第 35 週 SV Elversberg - SpVgg Bayreuth Waldstadion an der Kaiserlinde 賽果：5:2 (4:2) 入場人數：5643（80 名作客球迷） 門票： 10€ 更多相片
過去兩個月話係 SVE 今季既低潮，而四月更加係低潮中既低潮，過去四場波只得一分，令人開始懷疑到底我地係咪真係只係曇花一現，根本唔夠班談升班？ 聽講上星期作客多蒙特輸波之後甚至有係賽後噓班球員… 今場波賽前有報導指出 SVE 過去十一場波中只贏到兩場波，淨係睇下半季既成績我地只係排第八，睇完即刻笑左出黎。 唔知啲人係咪唔記得我地今季本來既目標只係護級成功，次回合和波多過贏波既情況下我地仲係第八，到底有咩好投訴？
當然係呢個低潮時間我地不禁會問，點解同一班人馬上半季踢到水銀瀉地咁，黎到下半季好似完全唔同左咁？ 睇返隊波整體既踢法同水準又完全唔覺得有咩大分別，每場都仲有好多流暢既組織埋門，大部份既機會真係只係差咁一啲運。 黎到今季我地既目標由護級變成爭升班，班球員突然之間多左啲前所未有既壓力仲要揹住球迷既各種期望…. 真心覺得唔可以完全怪哂佢地。 但係我地今季既佳績唔係只靠一兩場波踢出名堂，所以大家對隊波仍然有信心可以反彈踢返 2022 年既準出黎， Kämpfen bis zum Ende – 一齊作戰到最少一秒。
唔知好彩定唔好彩，四月尾因為唔同原因而錯過左三場波，無親眼睇隊波失分係無咁激氣既，換一個角度睇就係隊波等緊我地回歸先升班，等埋我地返黎先一齊慶祝～ 今個星期我地返到莎蘭主場迎戰要搶分升班既 Bayreuth， 佢地同我地一樣今季係升班馬。 老實講我地本來預期係會同佢地差唔多情況，或者只係好少少… 佢地連續輸左幾場波，但唔代表我地可以放鬆，因為要搶分護級既球隊先係最危險！
今日入場時有球隊既職員係入口派海報，每次紙背後都印左一段話係球隊想多謝球迷今季既支持，同時希望球迷可以繼續支持球隊，叫大家係球員入場時一齊舉起印有球會 logo 既海報，幫班球員加油。 等到球員入場時，主看台同 C1 看台變成一片黑白海，簡簡單單但義意重大，希望今場波可以贏三分！
Bayreuth 今日帶左大約 80 名球迷到場，隊波近況麻麻地隨時升班，咁既情況下以兩個城市既距離黎講算係唔錯。佢地隊波係開波無耐有兩個機會就造就左兩個入波…. 班球迷開心到除哂衫慶祝，諗住見到護級既柱光。 而我地都反哂白眼問到底 SVE 想點…. 到底仲想唔想爭升班？ 雖然我地同附加賽席位仲有七分距離，但我地由原本十幾分輸到得返七分，呢個感覺唔係幾好受囉！！！失左兩球波之後，C1 看台上既球迷雖然有不滿，但仍然舉起雙手向鼓勵班球員唔好放棄，仲有差唔多 80 分鐘可以追返返黎！
雖然有啲馬後炮，但比賽當日我既心情好靚，天氣又開始回暖入到球場仲熱到淨係著 t-shirt 都 ok。 連失兩球之後反而覺得早失波係好事，同對 Viktoria Köln 一樣覺得咁先令到班球員醒覺要識入波先可以贏到波。估唔到三分鐘之後， Feil 係禁區頂接應窩利勁抽破網追返一球。 十分鐘後到 Sahin 借對方後防跣腳了到個波即刻轉身射入追和。 好，重新黎過～ 始終我地都係唔相信自己隊波真係咁差。
臨近完場，Dürholtz 終於射入今季第一球為球隊反超前。 呢個時候個個都問到底發生緊咩事？？當我地慶祝完氣都未回，係補時階段最後一個角球開出， 我地既神射手 Schnellbacher 頭鎚一頂 4:2!!! 三十分鐘內我地連入四球，分別由四個不同球員射入。 呢隊就係我地季初令人大跌眼鏡既 SVE!
如果今場波放係四月黎踢，場波最後應該就係比對方嗰兩球收皮，然後今日入到波既機會全部都唔知點解有隻腳伸出黎擋住左… 下半場我地放慢左啲但仍然保持優勢，睇得出係榜首對榜尾既分別。 同時其他要搶分護級既球隊都領先緊， Bayreuth 即時跌落榜尾…. 佢地既球迷仍然不停打氣。 雖然我聽唔到佢地唱咩，但睇到佢地既身體動作仍然為球隊出緊 100%.
去到 64 分鐘 Rochelt 入波埋齋 5:2～ 由五十幾分鐘，C1 看台上既球迷一齊唱同一首歌唱左近二十分鐘。 呢首歌上季季尾我地都有一齊唱，意思係大約： 我地一齊為升班上乙組作戰到最後，你地將會成為傳奇！ 去到 80 分鐘就轉唱今季球迷既最愛： Allez allez allez。 估唔到係主看台好多球迷都一齊企起身跟住拍手！！ 呢個時候班作客球迷都心灰意冷開始執野…. 完場後極速離開。
我地就等到班球員黎到看台前一齊唱歌慶祝～ 黎緊只係淨返三場波，下場作客排第二既弗賴堡 U21…. 我地現時領先佢地六分，只要贏波我地就提早封王升班創造歷史！！！