30.04.2023
波蘭足球甲組聯賽 第 30 週
WKS Śląsk Wrocław - RKS Radomiak Radom
Wroclaw Stadium
賽果：0:1 (0:1)
入場人數： 10478 （100 名作客球迷）
門票：45PLN (10€)
更多相片

星期日一早食完早餐先係酒店附近散步，感受下由今日開始會長期出現既大太陽，然後就揸車去市外既球場，㨂得黎 Wroclaw 無理由唔係度睇返場波卦～ Wroclaw 既主場係 2012 年波蘭同烏克蘭會辦既歐國盃球場之一，附近既設備都做得好完善。 通常為左大型賽事項目而興建既球場都有一定既配套，呢個球場附近做左好多綠化設施同埋有多休憩用地。 球場兩邊都有車站用黎疏導人流， 好多球迷都係由 fanshop 嗰面入場。我地係場外泊低左架車之後就經過車站行到去球場外， 係外圍首先會有人做安檢同對身份證，然後就去搵 fanshop 買手信。

買完頸巾就去搵自己個閘口入場。 我地㨂左高層想可以有個靚啲既 view～ 呢個球場能夠容納 45000 人，係波蘭好少可會有咁多人入場，今場咁既普通比賽連半滿都無可能。 我地好早就入場所以個場仲係好吉，所以入到去都行左個圈先。 係外面睇呢個球場好似好簡單就咁一個圓型無咩設計咁，原來要近睇或者係入面望返出去先發現細節。

例如個球場原來唔係密封，反而係勁通風。 入到場後我地係內部可以望返出去睇風景。 入到看台又有另一種感覺，個看台做到好似無分層數咁， 你想既話可以由最底嗰行行到最頂，坐得滿既話睇落應該會好震撼。 來自 Radom 既客隊唔算出名，卻意外地有近一百個球迷到場。

波蘭啲球迷組織唔係用大聲公黎帶唱，而係用咪同巨型喇叭，連個 capo 台同鼓都巨型過人。 個喇叭我見唔到，但枝咪把聲有時仲大聲過球場廣播。 可能係因為球場唔滿所以迴音再勁啲？ 有時以為佢自己係度獨自唱k， 啲人通常係開咪帶頭幾個字，最多一兩句就等啲球迷唱落去。 Wroclow 既 capo 唔知做乜自己唱足全首，仲要唱兩三次先比其他人唱？ 可能係佢地獨有既文化？ 無論點都好，班球迷全場不停咁打氣，唔只係出聲同拍手，間唔中仲坐低跳起，完全係 90 分鐘既運動！！

全場波無咩幾可聽到作客球迷既打氣聲，一來人少二來太遠。 但竟然比佢地入到一球贏波，隱約聽到佢地既慶祝聲，同埋之後一段時間佢地都好落力咁唱歌。成場波最正係啲人最尾剝哂衫，好多肉睇 😛 波蘭球迷文化特別之處係好少會有大旗，就連看台前後既橫旗都唔會太多，通常都係得幾塊大型橫旗，其餘就係用身體黎打氣。

今日對我黎講呢場波唔係重點，下一場波先係…. 完場後我地好快就返去架車度向下場出發。

後來我地係星期一五一勞動節先有時間係 Wroclaw 市內觀光，一早沿住舊時既護城河散步，然後慢慢向市中心方向行。 沿路見到唔少人揹住結他，心諗波蘭既音樂文化都幾勁… 愈近市中心就愈多結他友，最後見到有個小型舞台有人係度 jam 歌， 我地又以為係 Wroclaw 文化，個台可以比人排隊上去表演下咁。 行多幾步見到個大型舞台，勁多結他友行黎行去，即刻上網睇下到底發生緊咩事？？ 原來每年四月尾五月頭會有搖滾節，而每年既五月一月有個節目就係聚集結他同好同一時間彈一首叫 Hey Joe 既歌！！！有興趣參加既話就要當日去報名，因為個名會落入健力士世界紀錄（破到上次既參加人數的話）！ 係市內見到年少老幼係度彈結他，最莫名感動既係見到啲阿叔阿嬸彈結他，好似見到佢地既青春咁。 好開心比我地意外地有花生食！