30.04.2023 波蘭足球甲組聯賽 第 30 週 KKS Lech Poznań - KS Górnik Zabrze Stadion Miejski Poznań 賽果：0:1 (0:1) 入場人數： 28112 （1218 名作客球迷） 門票： 70PLN （約 15€） 更多相片
我地決定左去波蘭既時候諗住如果賽程同時間許可既話，就會去睇普度斯基。 當賽程出左之後，見到 Zabrze 雖然作客，但佢地會作客 Poznan，賽場同 Wroclaw 場波又有幾個鐘時間，可以一搏。
細個迷過好多唔同既球員，特別中意嗰啲我諗得出既都已經入場睇過哂，唯一剩返既就好似真係得返傻仔 Poldi! 諗返起細個好迷佢同小豬既基情，後來佢轉會去拜仁之後以為可以係香港一次過見哂兩個，點知兩個同傷左黎唔到 ._. 又唔知點解一直都無諗過要去德國睇拜仁或者科隆，到佢轉會去阿仙奴就更加無興趣（加買唔起波飛），又繼續唔知點解佢會㨂去土耳其同日本…. 最後返去佢鄉下旁邊既 Zabrze 上神枱，去到而家原來佢就黎 38 歲差唔多退休，同自己講今次唔去可能再無機會…..
佢係我開始學德文既原因， 細個同啲德國人講我好中意普度斯基，個個都話佢好蠢，問佢地點解要話佢蠢佢地又講唔出，淨係話佢淨係識踢波唔識用腦。 為左追求到底點解佢會比人話蠢，我決定要學德文聽佢講乜。 原來佢既蠢係真係形容唔到，其實應該話佢頭腦太簡單，係好多訪問中佢既答案係出乎意料之外但你又唔可以話佢錯！
我中意佢係佢對足球既執著， 佢細個就係係踢街場大，屋企亦都唔係咩有錢人，所以佢後來創立既服裝品牌個名都係同街場有關，又開左賣 Döner Kebap 同雪糕既店。 去到職業生涯尾聲㨂左返去鄉下，但又成日返佢長大既科隆打理下生意咁。 係波蘭其實好多人都對佢無咩興趣，始終佢最後係㨂左代表德國唔係波蘭，但係 Zabrze 就極受歡迎。最主要既原因係佢極之親民，上季季尾仲同班球迷一齊搭火車去作客。
今次終於唔再比自己搵藉口，買定波飛同停車位去Poznan 睇 Zabrze 作客。 出發去波蘭之前一直有留意佢有無份踢，唔知佢係咪只係比人當吉祥物架嘛，又或者傷左咁點算？ 去到對上一場主場賽事佢都仲有踢，睇完 Wroclaw 就好安心咁出發。 係大約兩個鐘既車程我就睇下啲比賽資料，發現 Zabrze 有一個球員因為食左五張黃牌而要停賽一場，嗰個就係普度斯基！！！！！！ 呢一刻我真心想喊出黎，係咪真係無緣到咁？！
唉，唔怪之得佢早一日仲返左科隆睇青訓比賽，佢一定知佢自己大把時間今個星期唔洗踢波。見佢下一個 Story 係一張影住火車站既相然後 tag 左 Zabrze 火車站，有啲球迷同佢影左相又 tag 返佢咁。 呢個時候我都有少少接受左現實，見佢咁好無得踢都去火車站同啲球迷打下氣咁，因為隊波而家都搶分護級。 突然間我有個奇想，佢會唔會又再一次踢班球迷一齊搭火車去作客呢？？？
到左 Poznan 入城之後越黎越多車，花左差唔多廿分鐘塞係紅綠燈，最後係開波前大約九個字係球場外泊得低架車。 場外個停車場仲爛過香港啲爛地停車場…. 這就是波蘭。 落車後要兜去球場另一邊入場，勁多人排隊…. 因為要對身份證所以條隊勁龜速，然後啲人又成日借啲意插隊，我都唔再禮貌搵位攝去前面… 終於入到閘之後要行幾層樓上山頂，坐低之後終於可以鬆一口氣既同時望下個球場。
Poznan 既主場亦都係 2012 年歐國盃球場，佢地將原有只用左幾年既球場三邊翻新擴建，作客看台嗰邊就係原有部份會見到好多鐵通枝柱咁，班球迷企緊既看台成座僭建物咁，睇落勁唔安全囉！！球場可以容納超過四萬二千人，今日有大約二萬八千人到場，但氣氛超好。 球場內完全無任何廣告或者歌曲既廣播，一直都只係聽到兩邊球迷間唔中互唱互鬧咁。
主隊既球迷企係我地既左邊龍門後面， 分布係下層同中層看台。 佢地係賽前準備左一塊覆蓋下層看台既藍白大海報，上面寫住 Kolejorz Lifestyle，等到球員入場就拉起各地既朋友 logo，再係中層看台一字排開放煙，簡單又好睇～ 然後就開始唱歌同體力勞動咁打氣。 Kolejorz 係當地方言，意指「鐵路人」，源自球隊既歷史同鐵路有好大關係，就連球場外都有一座火車頭放係度用黎紀念球隊既歷史。 Poznan 其中一樣出名既就係佢地既 Poznan dance，一大班球迷一齊背向草地搭膊頭跳住唱歌，可惜今日無緣親眼見原裝既 Poznan。
佢地同上兩場波既球迷一樣，有大喇叭帶領球迷打氣，坐係主看台近另一邊龍門既我地聽得亦都一清二楚，只係唔明佢地 up 乜。 坐係我地附近既普通球迷都比其他兩隊波熱情，會跟住一齊叫又會舉下頸巾咁。Poznan 話哂都係波蘭其中一個最重要既城市，又有深遠既歷史，儲落左唔少球迷。
不過得罪講句，我今日黎到其實唔係為左睇 Poznan….. 睇完佢地開場既表演之後， 我就開始用相機 zoom 去作客球迷區睇下搵唔搵到普度斯基 ._. 感覺好似係度玩緊 Where’s Wally 咁，問題係連佢到底係咪係區入面都唔知？？？！ 我用部相機逐區逐區咁影都係搵唔到，搵左廿分鐘開始想放棄，專心睇波睇球迷算。 Zabrze 今日帶左四幫朋友到場，佢地各自著住代表自己球隊既衫黎打氣。 係度數下班球迷既時候，讚嘆佢地全個區個個都好落力咁打氣，眼利既我發現有一條友成碌木咁企係角落頭乜都唔做……… 終於比我搵到佢啦！！！！！
其實佢係咪真係大傻仔黎？ 堂堂一個國家級球員，竟然同班球迷一齊搭火車去作客。 作客球迷好容易成為主隊球迷攻擊既對象，例如人地會知道你架火車會經邊條路線，幾時到站然後比人埋伏…. 所以當地既警察對球迷既態度完全唔可以講笑，而球場亦都做好哂準備分隔好主客隊球迷。 Poznan 既作客區外有條幾乎密封哂既長走廊，出到去停車場仲有條圍欄包圍既路行到老遠先可以上巴士接載佢地去安全地方…. 即係我無可能可以完場後係場外等佢出黎然後鬧9佢做乜上場食黃牌搞到今日無得踢！！！
後來成場波我都一路睇波一路用眼尾 sau 住作客看台既角落想知佢做緊乜 T_T 雖然無得睇佢踢波，但我地總算係同一個空門共存睇同一場波。 上半場完全前客隊仲入埋波，用肉眼都見到普度斯基既傻仔靚笑拍手慶祝～ 去到下半場中段，班球迷係看台上拉起海報隱身搵衫，唔知點解佢地好中意下半場先無啦啦搞 choreo 放煙。 突然間成個看台變成紅白煙海！ 佢地放完煙之後成個看台無啦啦變左色，全部人除哂衫！！！！ 早兩場波啲球迷都有除衫，但今次真係一片肉海。。。。 當中得一兩條友無除衫，唔知係女人定怕醜，但其中一個就係個傻仔繼續企定定係角落頭睇波。
完場後，普度斯基好快消失左，以為佢有人護送佢離開，如果唔係可能要被困係作客區直至所有主隊球迷離開球場範圍為止。 我知我地等黎都無用，慢慢離場等啲車龍走咁啲先開車走。 後來發現佢原來消失左係走左落去同班 Ultras 一齊慶祝， 佢今日跟黎作客都係班 Ultras 邀請佢一齊黎，話佢既然唔可以係場上出力，咁不如一齊係看台打氣。 最後佢同班球迷一齊搭火車同一齊困係球場個幾鐘先走，佢身邊睇落無保鏢（我估保鏢唔會跟住一齊除衫打氣卦？），比賽期間完全無人騷擾佢個個都專心睇波打氣，只係半場時有人走去搵佢影相。 我都好想入作客區呀 T_T
兩星期後球隊宣布佢再續多兩年約至 2025 年，我要係佢 40 歲前搵個週末去 Zabrze 追星完夢！