29.04.2023
波蘭足球甲組聯賽 第 30 週
Zagłębie Lubin - RTS Widzew Łódź
Stadion Zagłębia Lubin
賽果：2:0 (1:0)
入場人數：8.011 (1.000 名作客球迷)
門票：45 PLN （約 10€）
更多相片
由首爾返黎之後唔夠 12 個鐘又要出發去下一個旅行～ 年頭一早決定左四月尾想去波蘭睇波，好在公司都肯比我早走等我可以照原定計劃去玩。 星期五一早開車向東出發，當時預計要大約七個半個鐘車程，連埋休息同午餐當八個半鐘，最後係邊境塞左好耐車，總共要十二個鐘先到達 Wraclaw….
我地經 Expedia 訂左一間當地既酒店叫 The Granary，睇相幾特別又近市中心，價錢又同其他連鎖酒店差唔多。 今次想特別提下因為要警世唔好好似我地咁以為有著數就 lur 飯應！！ 係 Expedia 我地有集團優惠可以有九折，住四晚大約 520€。 後來酒店聯絡叫我地填問卷，想知我地有無咩特別需求。 覆左之後佢地就有個 Offer 話成為會員既話可以每晚平多 50PLN (約 11€）、免費升級上間房同泊車可以平啲。 後來佢 send d 條款黎叫我地 confirm，咁我地睇完都唔覺有咩問題就 ok jor。 然後佢就係 Expedia 取消左我地既 booking， 變左我地係直接同酒店訂房咁。
到埗後 Check in 都好順利無咩問題，只係比錢時我地要比 2840PLN （約630€），比錢嗰刻無留意，上到房計下數就覺得唔對路，明明記得酒店係五百幾歐唔係六百幾架？ 睇返 E-mail，原來佢地將原價減 50PLN 唔係將我地係 Expedia 個價減……. 佢其實有將個新房價寫出黎， 760 -> 710 咁，只係我地無將佢計返做歐元然後就中左伏！！！最嬲係只可以嬲自己唔可以怪人 T_T 不過間酒店係靚既，同埋個早餐好好食，個地點又係正市中心。
星期六朝早係全日唯一有太陽既時候，我地就去左附近既商場行街同去超市買當地既零食～ 行左大約一個鐘返酒店放低啲野就揸車出發去 Lubin。 由 Wraclaw 出發到 Lubin 要大約一個鐘車程。 我地㨂去 Lubin 係為左去睇客隊 Lodz，因為佢地既球迷文化係緊貼 Legia Warsaw 之後….
當我地差唔多到 Lubin 時已經見到有警車係公路上封路，然後見到一架球迷巴士… 轉個彎後見到多兩架，然後再見到多幾架，完全數唔完！ 每架巴士中間都有一架警察護送… 出左公路後我地要跟警察既指示行，例如紅燈我地停車，佢勁激動咁用手勢叫我地繼續行。 去到球場附近時，我地前面有架私家車，啲防暴拎住枝槍指住佢叫佢停埋一邊，另一個防暴又指住我地唔比我地向前行。 拎槍嗰條友望一望我地之後又好激動咁叫我地走… 雖然知道我地唔係班警察既目標，但見到佢地咁激動令到我地都緊張埋一份。
半個鐘後終於去到停車場泊低架車，然後去買波飛。 係波蘭買波飛係要實名制，仲要入埋你既身份證號碼同國藉。輪到我地買飛時佢搞左好耐，我懷疑係因為佢地搵唔到香港（我張居留證既國藉係寫香港 HKG 唔係寫中国 CHN 的～～） 然後佢地想入波蘭就算但個身份證號碼又唔岩，後面啲人排到 jip jip 聲… 我都好嬲囉好無，本來到達後嗰廿分鐘停左雨，我就企係度等到開始落雨都未有飛。 我估係國籍問題係因為當我地入場時…. 一個嘟完飛之後部機會用德文講「請進入～」，到我嘟完之後佢講用波蘭文講請進入…
話說今日隊其實有 1€ 波飛吸引球迷入場支持球隊護級，但一歐波飛只限其中一個望唔到作客區既看台。 而我地黎係想睇客隊球迷，唯有要比原價去主看台～ 行低左一陣就去小食亭買野食… 個個都好慌張咁搵個識講英文既後生仔黎應付我，買左兩條 Kielbasa 腸同一杯可樂。 拎住野食返座位就等開波。
波蘭既球迷文化好特別，每一場波兩隊波既球迷關係唔係盟友就係死敵。 如果 A 隊係同 BC 隊係朋友，然後 B 隊又同 D 隊係朋友，係 B 隊要求之下 A 隊就算同 D 隊無咩瓜葛既情況下都會走去幫手助陣，而成為敵人既情況亦如下，去睇一場波蘭波當中可以會有幾隊唔同既球迷在場。
而波蘭球迷嗰種霸氣對比起西歐真係完全另一種 Level，佢地既身材比例嗰啲已經唔洗多講，最吸引既其實係佢地把雄厚既聲勢。同埋我好想見到佢地既手掌到底有幾厚？ 佢地可以成場波都 keep 住拍手，啲掌聲又係勁厚實… 所以好多時候佢地在場可能得一千人左甚至得幾百人，但佢地既氣勢仍然可以超強。
主隊 Lubin 成立係 1945 年，球隊最初多次改名黎搵自己城市既特色，後來因為係城市附近發銅礦發展成市礦場城市，後來得到採礦公司注資而開發成功之路，成為兩次頂級聯賽冠軍同間唔中可以參戰歐洲賽事。
而客隊係主隊既其中一個死敵，今日佢地帶左近一千人到場助陣。 比賽期間有唔少隔空對罵， 球隊仲要開咪要啲球迷小心字眼，唔好教壞細路。聽落好似好好笑咁，我地聽唔明但聽人講佢地既用字的確係好有攻擊性… 班作客球迷就好似著左制服咁，有分紅白衫同分唔同區企，無人會企錯位令到分色唔岩。 區內所有人都會一齊做手勢打氣…. 真係好吸引！！！去到下半場，佢地係看台拉開一塊大旗變裝，然後就放煙打氣，突然之間成個看台都煙霧瀰漫，不過波蘭啲煙著火既時間好短，應該大約 30 秒左右就燒完…
賽前睇積分榜既形勢， 完全無諗過要護級既主隊可以贏波仲要贏得咁輕鬆。 班作客球迷全場波專心打氣，無論隊波失波定有靚傳，佢地都專注於打氣，好似活係唔同世界咁！
完場後，我地行幾步路就返到停車場，以為可以好快離開。 但… 我地唔記得左自己係波蘭。 就算係德國，係多人地區要離開時都係一片混亂，係波蘭就係亂上加亂。 係停車場入面完全無隊形可以跟，一開始我地諗住等一陣先郁可能會好啲，點知係出口啲車塞死哂完全無郁過。 後來見到有人開發左條新路離開，但停車場同條路之間相隔有啲高度，有啲怕架車會long 住左…. 見到幾架差唔多size 既車都走得甩我地就跟住走，最後成功脫離呢片混亂返去 Wraclaw! 明天仲有兩場波等我地～～