22.04.2023
南韓 K League 1 第 8 週
FC 首爾 對 水原藍翼
首爾世界盃競技場
賽果：3:1 (1:0)
入場人數： 30186 （約 5000 名作客球迷）
門票： 19,000W （約 12,90€）
更多相片

自 2019 年起因為武肺就無再踏足過亞洲，上年就連屋企人都搬走埋連返香港既原因都無埋。 本來一直都好想去日本，但就算武肺過後通關望下機票個價錢都買唔落手。 點知突然之間我上司叫我跟個客去首爾見識下，然後就好極速訂機票酒店兩星期後出發。 最好彩係呢個週末咁岩有國家打比睇～～～

今次既落腳地要近公司所以住係江南三成洞，訂酒店時一心只諗住住得近公司，但無諗過原來呢區交通勁唔方便。係有地鐵同巴士呀，但遊客區全部都係漢江既另一面，一係就係路面塞車向北，一係就要搭十幾個地鐵站轉車再搭十幾個站。

星期六食完早餐就搭地鐵過河，去弘大兜個圈然後就行去麻浦區，中間經過世界盃市集，食左幾串魚糕飲幾杯湯，仲有其他野好想食，啲刺身同海鮮勁平，仲有炸雞同甜品…. 但我地一心諗住兩場波中間要去食大餐所以要餓下先而家唔可以食太飽。行左大約九個字就到球場。

去到場外既售票處買飛後就入場，客隊水原係我地既左邊，主場 FC Seoul 就係我地既右邊，而我地下面仲有 V Girls 啦啦隊係度跳舞打氣 ._. 中場開波前同半場時仲有隊 band 走出黎唱歌…. 如果個球場細啲就好，今場波有三萬人入場已經係好多，不過個球場可以容納超過六萬六千人，咁大個球場令到個場睇落都仲係好吉咁。 如果可以有個滿座既感覺就好啦…

水原我地係五年前睇過主場， 一直都幾中意佢地，最主要係佢地唱歌打氣既文化係亞洲黎講幾特別，有啲偏南美風格。FC 首爾相對之下就無咩特別吸引力，呢隊波有兩個成立日期，一個係原生球隊既成立日，一個係轉生成FC 首爾既成立日。係韓國，有唔少球隊都係由財團成立。 FC 首爾原生球隊由 LG 創立，而水原就係由 Samsung 創立。 水原既球迷對三星極之不滿，今日開波前係看台前舉起好多大字報向球隊既管理層作出抗議。

今季踢左七場，水原一場都未贏過企係榜尾。 作為班霸，球迷們當然無諗過會有咁既一日。 佢地除左對隊波既管理層不滿，亦都唔滿意球隊既表現。 看台前既多枝球迷大旗都倒轉左黎掛，好彩既係佢地仍繼續全場出盡力唱歌打氣支持隊波。班球員真係要好好反醒下，點解可以踢得咁差。

仲記得上次去睇水原主場賽事時，見到有幾個熱水機比人整杯面，今日諗住可以再見識下。 但我地今日黎既係世界盃球場… 呢度既設備再次令我地大開眼界～～ 呢度無小食亭，有既係便市店 （我會叫佢做超市多啲！！！）啤酒仲可以成罐買走～ 如果唔係要留肚賽後食野我一定係間店入面掃哂啲野食佢。

好多人係一家大細入黎睇波，氣氛其實都幾融合～ 有樣野唔明既係，開左波十幾分鐘都仍然有人勁他條咁入場，就算當去睇波只係一場娛樂項目都唔洗遲到咁多卦？ 去到下半場中段又有一啲人走左上黎場，事關個太陽開始曬到下層座位…. 真係差啲唔得好多亞洲人係殭屍唔可以見太陽 -_-

話就話主隊無咩特別，但佢地球迷氣勢都唔算差，最起碼班核心球員都有打氣足入場。 佢地既主隊優勢係場內大電視會播放打氣歌既歌詞….例如： 「（拍），（拍），（拍）（拍）（拍），（拍）（拍）（拍）（拍），（拍）（拍） 首爾！ 」仲會用球場廣播開咪黎帶節奏，無啦啦叫人「拍手～～～」 有幾下真係忍唔住反白眼。 好在佢地入左三球推高場內氣氛，愈近完場氣氛就愈好。 臨完場前水原成功破蛋… 首爾球迷去到最尾開始舉大字報恥笑水原包尾， 其中一塊我地可以即時理解到既係：Suwon Bluewin0 – 恥笑佢地今季一場都 0 win!

完場後我地搭地鐵去返市中心，係球場門口唔洗幾步就到地鐵站口，站內好似水原球迷仲多過首爾球迷。 個個都好心平氣和咁離開，去到弘大就展現我地既尋餐廳之旅，然後要去睇下場波。