22.04.2023
南韓足球聯賽 K League 2 第 9 週
首爾衣戀 對 金泉尚武
木洞綜合運動場
賽果：0:1 (0:0)
入場人數：2000（150 名作客球迷）
門票： 10,000W （約7€）
更多相片

一早計劃好係首爾既星期六會連睇兩場波，呢兩隊波我其實完全唔識，只係去個見下個球場。 兩隊波個名都係係 wikipedia 搵返黎，覺得幾型所以㨂左用中文黎寫 xD 主隊本來係用首爾奧運運動場做主場，最近因為維修所以暫時搬左去西邊既木桐運動場。 木桐離麻浦話近唔近話遠唔遠，好在兩場波中間有近兩個半鐘時間，應該可以比我地食埋野先再去下一場。

離開世界盃球場之後，我地搭地鐵去弘大諗住搵返上次去過既餐廳食辣炒年糕，點知係條街來回行左兩次都搵唔到，以為自己記錯左地址。 最後行左半個鐘都係搵唔到…. 又係一間執左笠既餐廳 🙁 唯有改變主意去食橋村炸雞，當時離開波仲有個半鐘時間應該仲趕得切既…. 落單之後就好不安咁等，希望佢可以快啲上菜然後拿拿聲食落肚就埋單走人。

等左超過十五分鐘連野飲都未上，我地兩個既心情就越黎越差。 一路係咁 refresh 個地圖睇下最遲可以搭邊班車可以點去。咁我以為佢炸雞要即炸之類所以要耐少少，但無理由兩杯啤酒都要等咁耐架？ 望下其他枱，啲人枱面有本簿仔就係得我地無。 後來有新一枱客落單，個職單就印左張單出黎放係佢地枱面。 呢個時候我就知道佢地根本無落我地張單！！！ 我即刻按鐘仔問佢地到底有無落單，佢篤下部機之後問我落左單未…. 然後我即刻話我地趕時間唔洗落單啦， 再執野走人。

好在轉個彎行幾步已經係大馬路巴士站，搭左幾個站之後要轉車，但地圖話要搭既下架巴士已經走左，下一班要廿分鐘後先到。 好在仲有另一架都可以去到球場附近…. 個心勁不安咁希望唔會塞車，因為地圖話到達時間係開波前一分鐘。 落車後我地要行大約 15 分鐘先到球場，要過幾次馬路… 每次離遠見到綠燈都即刻狂奔趕燈，最後係急步既情況下經過溜冰場同棒球場，然後終於到運動場既門口。

點知門口有條勁張既龍，唔知佢地排緊隊買飛定入場都即刻衝去排隊先，即碼可以慳返啲時間。買飛原來無人排，然後入口就係另一邊都係可以直入。 我條隊應該係啲家屬定唔知 VIP 入去主看台嗰面。 好好彩入場都好迅速，最後成功見證到球場吹雞開波一刻！

一入場就見到幾架熱食檔，有燒腸仔，有炸雞，有 corndog 仲有炒麵… 我地餓住個肚黎但因為已經遲左入場就想拿拿聲搵位先然後半場先去買野食。 個球場好宏偉，嗰四枝七角形既大射燈堅型。 當時已經接近日落，望住太陽係球場旁邊既大廈後面落山，個天一直變色，好靚～～～

老實講，入場後唔知有無專心留意睇過場波，場邊既野太吸引。 淨係影下球場同太陽落山都用左啲時間。 我地係準時入場，之後一直都仲有人入場，個看台越黎越滿。 看台中間有一個 MC 拎住枝咪同舉牌帶氣氛，仲有幾個鼓手（其中一個仲係要黑人黎），係看台前仲有幾個女仔係度叫人舉手拍手咁。 最好笑係有個大喇叭係度播啲罐頭打氣歌，完全顛倒我地對打氣團既認知。 而作客區有大約五十個球迷，又真係估唔到，間唔中隱約聽到佢地既打氣聲。

衣戀係一間韓國零售公司，佢地係 2014 年組成第二隊首爾足球隊。 而金泉尚武就有段比較複雜既歷史，係 wikipedia 睇左幾次先睇得明。 首先，尚武既球員全部都係正在服兵役既年輕球員。（唔怪之得佢地都有咁多人黎支持） 隊波過去多年係以唔同城市為家，曾經更因為無通知韓國足協就搬屋而被足協處罰禁賽。 又因為不滿亞洲足協針對韓國足球假波事件作出既指引而杯葛參加聯賽兩季。 成件事勁兒嬉囉？？

去到近上半場完，我地就慢慢行去排隊買野食。 諗住排炸雞，離遠見到有條友擔遮排隊，心諗條友係咪有病，天都黑埋仲擔遮？ 原來把遮上面寫住 SOLD OUT… 係檔主叫佢擔住等啲人唔好再排隊。 好失望咁走去排 Corndog， 排左成個中場都未到我地，然後望住把遮無啦啦變左其他人擔… 睇黎佢地計錯數原來仲有雞淨可以賣。 排左半個鐘終於買到 corndog，走返上看台睇住波咁食完再落去買炸雞。

呢個時候好口渴，呢幾檔野其中一檔係賣咖啡… 但我想飲可樂或者啤酒。 心諗點解可以無野飲買？？？ 原來係啦啦隊下面有得入去，入到去有間迷你便利店有野飲同零食買！即刻隊返一罐啤酒然後就等完場。 越夜越大風，所以等到佢一完場我地都急急腳走人，行去搭近 45 分鐘地鐵返到酒店，上網睇 SVE 主場輸波 ._. 到底點解佢地近況可以咁差？？會唔會一沉不起架？