08.04.2023
比利時甲組聯賽 A 第 32 週
Oud-Heverlee Leuven - KV Mechelen
Stadion Den Dreef
賽果： 4:1 (2:0)
入場人數： 6287 （約 500 名作客球迷）
門票：25€
更多相片

雖然對於 SVE 被安排係復活節星期一夜晚出賽十分不滿，但我地反而可以好好利用個長週末出國睇波。星期五就攤係屋企，星期六日計劃左去比利時睇兩場波。 星期六就先去比利時布魯賽爾以東中部無咩人識既 Leuven （其實主要想睇 Mechelen）

由法蘭克福出發要大約三個半鐘車程，我地八點鐘出發，連埋休息大約十二點鐘到達～ 泊低架車就行去市中心參觀下。當地中意玩食字將 Leuv / Leuven 黎當 Love 咁用，例如麥當勞既 I’m lovin’ it 變成 I’m Leuven’ it 成為呢個成市獨有既廣告～

通常去呢啲小城市睇波都只會直去球場然後完場就去下個地方，不過係計劃行程時發現呢度有個好靚既舊城區，所以決定早啲黎到食午餐然後再去周圍行下。 比利時啲城市全部都係得市中心先人山人海，中心外一兩條街就即刻人影都無隻？？ 當我地由停車場行去市中心時好擔心呢度係一個死城，但一去到舊城區就即刻勁多人，完全唔知佢地係邊度彈出黎。。。

個城市係復活節週末準備左好多活動。 有好多唔同國家既人係唔同街道上唱歌跳舞巡遊表演，上網睇到佢地會係當日四點鐘有傳統劏羊儀式，然後會向市民派羊肉…. 如果唔係要去睇波我一定會去見識下同排隊拎免費羊肉做手信！！！ 行到大約三點鐘我地慢慢向球場方向出發，由舊城行去只需大約二十分鐘路程～ 難得天氣咁靚唔可以浪費個唔熱既太陽！！ 我地個位仲有大太陽曬住，好舒服～甚至開始有啲熱。

去比利時最開心係除左啲薯條好好食之外，佢地仲有好多唔同啤酒款式。 我本身就唔太好普通 Blonde 同 Double 既，嫌佢地酵味太重 (too yeasty)，但上到去 triple, quarttro 個味道反而有多啲層次我又幾中意。 另一款比利時出名既就車厘子啤酒 Kriek 同埋酸啤酒～ 本地人普遍對都各種啤酒好開放，市內有唔少 bottle shop 可以買左唔同既啤酒，平過係德國買好多！！

Leuven 既主場有主贊助商冠名：King Power。 有睇開波既你應該會即刻聯想到另一隊波，就係李斯特城。 兩隊細球會因為有同樣既贊助商而有一啲關係，球隊仲整左條 Leuven/李城既頸巾… 係作客看台上面仲有枝泰國旗，都幾神奇。 呢個球場係由舊球場塊地上重建而成，係場外會見到一啲舊球場既痕跡，例如有幾級階梯既彎看台～ 而家就只係一個四四方方既球場無咩特別。

㨂呢場波睇係想睇下 Mechelen，之前有幾次想去睇佢地主場都買唔到飛，佢地好中意要有購票史先可以買主場飛。 而佢地的確無令我地失望，一開波就放代表球隊主色既紅黃煙！ 佢地既旗色令我諗起屈福特，佢地好似直情有枝一模一樣既旗？

主隊既主色係黑綠紅白，即刻諗起阿富汗定唔知咩中東國家既國旗。 佢地其實無咩重要歷史，係近年有啲成績然後早幾年先第一次踢甲組，所以佢地既球迷組織唔算大，睇落應該有三四十人係度帶領打氣，而去到最後仲係度玩人浪唔知做乜9。 如果唔係佢地可以大炒四球都未必會有咁好氣氛？ 最好氣氛係每次入波後播 Sweet Caroline，啲後生仔好興奮咁跟住唱。 而作客球迷完全無視賽果，全場不斷咁足 90 分鐘。

唔知點解我地成日都唔記得左自己係比利時，或者應該咁講：唔記得左有「比利時人」呢樣野，成日當左佢地係荷蘭人就算。 例如我地會話荷蘭既球迷文化係偏英式，就連啲球迷都係英國球迷既改良版。 到佢地播啲 techno 歌時又話 wooow 一聽就知我地係荷蘭～～ 言談間完全無提過比利時 😀

完場後我地去 fan shop 買手信，然後就行返去停車場拎車繼續我地既比利時之旅～