25.03.2023 德國足球丙組聯賽 第 29 週 SC Verl - SV Elversberg Stadion Paderborn 賽果： 1:2 (0:1) 入場人數： 900 （80 名作客球迷） 門票： 12€ 更多相片
最近個個輪住病，上星期主場已經有幾個因病缺席，今個星期就到我地…. 好在去到星期六朝早感覺好左少少就決定病發前要去作客。
今場波主隊係比我地更加鄉下既鄉下隊，早兩年升班上德丙後要擴建只能容納五千人既球場仔。 翻新期間佢地要借用鄰市 Paderborn 主場去出賽，本來今年有望重返自己既球場，後來因為各種延遲搞到最快來季先完工。 呢隊波亦都無咩野心，球隊講明就算合資格都唔會申請德乙牌照，亦都唔會再出錢去擴建球場。
Ok… 變左要去 Paderborn 睇波，由法蘭克福出發需時大約三個鐘。 我地好準備球場開門前就到左， 唔知係病到懵左定咩，去到場外見到好多 Paderborn 既廣告我就話：嗯 佢地係場外周圍放咁多廣告，應該係比賽日先係咁架？ 答：下 今日都唔係佢地既比賽日。 我完全係黑人問號，仲問我地黎 Paderborn 睇波唔係比賽日係咩？ 然後突然醒覺，我地係黎睇對 Verl 既比賽 sosad 後來不斷提醒自己今日唔係黎睇 PB -_-
首回合 Verl 黎莎蘭作客時我地去左米蘭旅行所以無睇到我地點樣慘敗，今日除左要打破連續 n 場不勝紀錄之外，亦都希望可以為上次輸波出返啖氣。
係德國有好多個奇醜既球場，例如 Wiesbaden 既鐵通爛地球場… 但人地始終都只係德乙丙既球場就算。 但呢個球場係曾經出戰過德甲既「頂級球場」，係電視上見過好多次都不禁問點解可以咁醜？ 最好笑係係波蘭有隊波既主席唔知做乜好中意呢個球場，搵人係波蘭起左個一模一樣既球場？？
入到球場之後真係有好多問號，個看台結構有啲似旺角場咁，入場時係同草皮同水平，要係場邊行樓梯上去看台，呢樣都仲接受到。 上到去看台望下後面既鐵板，我以為係可以拉開既鐵窗簾 -_- 又唔明點解個球場上蓋要起到咁高？ 仲有每幾半有條超幼既鐵枝用黎支撐住個上蓋個用途又係咩？ 個上蓋又勁斜，有蓋同無蓋根本無分別。 比賽當日既天氣變幻莫測，一時藍天出太陽，一時就暴雨。 而係 Paderborn 附近地區都係平原，就算平時都係超大風啲雨係打橫飛過黎。 唔知點解成場波一直都有暴風係身後吹黎，企係看台最後差唔多背貼牆都仲要比雨淋濕，到底呢個咩球場黎？？？
好在佢地有美食可以降下火， 有燒腸、咖喱腸、薯條同豬扒包～ 有咖喱腸配薯條 （當地叫 Manta Platte）既話我通常都會二話不說即落 order～ 份量超足同個汁都好重口味好正，好多人都讚不絕口，仲有通常係薯條或者麵包二㨂一，呢度就兩樣比哂你，只需 6.5€!
食飽就等開波，今日有一種好既預感，覺得我地可以踢場好波拎三分走！ 果然，一開波我地就搶住向對面攻過去，兩個前鋒既合作交波比係右後標上黎既 Fellhauer 起腳破網。 我就係要呢啲，一個 work 既策略！ 以上半場既形勢黎睇係可以入到多幾球波，下半場我地應該可以係我地半場睇到多啲場波…
下半場開波後就愈黎愈唔對路，場波依然長期係另一邊半場進行….. 係主隊既死纏爛打下終於比佢地靠角球門前混亂下頂入追和。 唔係又要和 1-1 卦，到底呢個係乜9魔咒？ 其實諗返起今季咁多場波，每場我地都有呢啲失誤，只係我地前面入到波夠後面輸，而家前面入唔到波好容易就將後防既犯錯放大哂。 而呢幾場波其實我地都只係失一球波，但人地入波既機會通常都係我地送比人既。 例如如果我地唔係後防玩短傳或者係後面發夢無啦啦甩波比人偷到雞，然後搞到自己要雞手鴨腳求奇踢個波出界送角球比人，人地就唔會有呢個角球埋門機會。
唉，算，去到補時階段我都放棄，心諗一分都係分，和波到完季都應該可以升到班既。仲要我地既神射手唔知做咩直紅被罰離場，後來睇返重播的確佢係從後踢腳係要罰，但唔洗直紅嘛？ 講真個女球證真心廢，已經唔係話偏幫定乜，但佢既準則不一又成日發雞盲，求下佢返去吹女足算，唔好黎呢啲高質比賽搞事ok??
我地班球員又係度趕頭趕命咁造攻勢… 估計應該係最後一個機會，係左路落底線傳中，個波省中對方球員比龍門接實。 呢個時候我地既球員個個舉手投訴，個球證吹雞之後直指十二碼。 嘩！！！ 估唔到呢啲負碌機會都可以發生到係我地身上！ 十二碼由防中 Jacobsen 操刀，本來企係我前面既師奶擰轉背唔敢睇，我都超驚… 唔入既話我估今季應該可以 gg…. 不過我地成功入波以 2:1 完場～～～～ 係後備席既球員都衝哂出黎慶祝，可想而知呢個球、呢三分對球隊所有人有幾重要。 我地終於可以笑住走 TvT
後來睇返重播，我又有好多問號，例如個十二碼到底應唔應該比？ 個球員已經擰轉左身，同埋球證個角度應該睇唔到對方係咪真係用手掂到個波？ 後來到射十二碼嗰陣， Koffi 又唔知做乜9 未起腳嗰陣已經衝左入禁區，好在個球證淨係望住個龍門，唔係又要重射搞一大輪….
呢三分其實贏得勁唔光彩，但有人話要贏冠軍就總要贏到幾場唔光彩既比賽。 去到季尾，如果我地回顧返今季既賽事， 隨時可能會話： 今場既十二碼就係我地升班既轉捩點，就係呢球波燃燒返起班球員團火。 （而家我都唔敢講得太實，仲有十場波仍然可以臨尾香的….）
下場又會黎到西北部作客我地領隊既故鄉，希望有佢全家總動員 Steffen Supporters 加持下可以幫我地輕鬆贏波唔洗食救心！