19.03.2023
德國足球丙組聯賽 第 28 週
SV Elversberg - Hallescher FC
Waldstadion an der Kaiserlinde
賽果：1:1 (1:0)
入場人數： 5278 （約 200 名作客球迷）
門票：10€
更多相片

多得週中場波令到今個星期時間過得超快，就連星期六去買完餸同執下屋就已經完左，然後星期日既比賽又早一個鐘開波，一起身就要即刻出發。

呢排終於開始回暖，感受到春天既來臨，但去到莎蘭就變成多雲有雨。不過！ 我地看台而家有上蓋，落雪落雨都唔關我事～～ 點知反而好多人預早去球場想趁落雨前可以入場搵定位，我地已經超過一個鐘前到球場都要係門外排隊 （真心第一次要排隊入場）。

入場後就開始落大雨，對面黎左三架巴士但一直都無人入場，我估佢地想等到最後一刻先落車… 而 C1 看台就好早就企到好滿。 去到開波前大約十分鐘，作客看台終於開始多人。

來自東德既 Halle 現時排係中下游，又係一隊要每場出盡力搶分既球隊。 果然佢地由第一秒就下下搶盡，上半場有唔少時間都係我地眼前， 仲有好多超有威脅既埋門。 今日我地既正選龍門 Kristof 因傷缺陣，由我地既前正選現後備龍門 Lehmann 頂上，唔知點解我硬係覺得佢穩陣啲，到而家都唔明點解佢無啦啦失正選？

上半場我係看台頂睇波，附近好多阿叔勁多野講係咁批評啲球員好煩， 不過有一句佢地講得好岩。 有一下傳波比人截左，一個阿叔話「唔好彩姐，總會發生既」，另一個阿叔就話「但唔好彩左太多次呢！！」呢幾場波我地可能仍然可以保持今季一貫水準，但呢幾場波完全係順風順水既相反，所有時機都係錯既，連運都無埋。 我都真係唔明，點解普通傳波都可以無啦啦送左落人地腳下，或者起腳時永遠有人擋住。 到底點解？？ 點解之前可以比得通，今日唔得？ 點解之前接應個波嗰陣勁痴腳可以合埋眼都射入，今日個波好似有腳咁會自己彈走？ 點解呀！！

去到近完上半場前，終於有一次機會突到圍。 我地既神射手終於送到個波入網，領先一球。 我就係要呢啲，可以接應個波帶落地然後即刻起腳射個波入網！！ 客隊係中圈開波後即刻強攻，差啲又上演即刻比人追和既劇本，好好彩有神龍打救我地。

下半場 SVE 一如以往向我地呢邊攻，但場波又變左大部時間係對面…. 開波無耐對方就追和。 唉，人地當今場波係杯賽一場定生死咁踢，我地就個個係度發夢。 下半場大部時間真係要用差黎形容，去到尾段換入左好耐無見既 Koffi 入黎，大家突然好似見到有曙光咁祈求佢既神來之筆可以帶我地離開災難。

痴線，佢落左場之後成隊波真係醒神左，最後十分鐘係我地禁住黎攻。 Koffi 有兩腳必入球，一球踢側左一球中楣！！！ 其他球員都有超腳機會，又係最憎講嗰句：無運。 呢個時候又要問點解，點解咁遲先換入 Koffi，點解隊波去到臨完場先醒覺？

今日第一次覺得就算輸波都係抵輸，只係我地踢得麻麻地都仲可以守到一分都算係咁。今日拎埋呢一分我地今季就已經有 60 分，算係一個里程碑。 啲傳媒寫到我地世界末日咁，連續五場不勝唔會贏到冠軍，但其實我地唔係拜仁，贏唔到冠軍唔會地震的～ 雖然球場最近狀態低迷，真係估唔到都仲有超過五千人入場！唔好唔記得一開季既目標只係護級成功，無諗過竟然可以為失分而失去領先十分既優勢而失望。 我諗如果你問其他球迷佢地應該會寧願好似我地咁連續五場不勝但仲企穩係榜首，而唔係每場波都要怕贏到三分都未必夠護級！

黎緊兩場波都係作客，但對手係中游球場唔洗爭升班又唔洗搶分護級。 希望佢地保持呢種無欲無求既態度，失幾球波施捨三分比我地…