14.03.2023 德國足球丙組聯賽 第 27 週 TSV 1860 München - SV Elversberg Stadion an der Grünwalder Straße 賽果： 1:1 (1:1) 入場人數： 15,000 （250 名作客球迷） 門票： 17,5€ 更多相片
德丙榜首又和一場！已經連續四場不勝，睇黎隊波氣數已盡，再無招數可以洗出，唔係真係諗住一隊鄉下隊可以咁容易有童話式結局直升德乙嘛？繼續發夢啦！
眾多球迷一定會有人咁講，但慶幸既係絕大部人都仍然好正面咁支持球隊，輸波和波狀態低迷係必然會發生既事，唔和都和左，只好收拾心情為下場波做好準備！
今個星期係德國俗稱「英式賽程」 Englische Woche，即係週中既比賽日，頂級組別球隊要出戰歐洲賽，而丙組就係星期二三有比賽。 我地最唔好彩既係今季所有賽中比賽都係長途作客，今次就要穿梭最少 400 公里去到慕尼黑。 好在慕尼黑係一個好受歡迎既旅遊景點，好多人請多幾日假去慕尼黑玩多幾日順便睇埋波，最後賣出左近 250 張作客門票！
普通球迷想要去 1860 既綠森林球場唔係一件容易既事，睇相你可以見個球場係好滿以為好容易買到飛？咁你就錯了。 1860 之前一直同拜仁共用球場，直到 2017 年係德乙降班唔再受德乙球場規定限制，佢地可以重返自己屋企出賽，就係位於慕尼黑市中心既市立綠森林路球場。 呢個球場本來可以容納近三萬人，但受德丙規例限制要安裝座位降低容納人數，而市政府亦因安全理由限制球隊只能開放比最多 15000 人入場，所以唔係會員或者識人都唔會買到飛。
仲有另一個方法既，就係去作客！ 由於 1860 主場門票供不應求，佢地會先視乎對手預留作客門票數量，我地應該分左大約 500 張飛，只限係 SVE 既 fanshop 出售。 如果作客門票賣唔哂， 1860 就會開放剩左既入場名額放去主場看台，等更多主場球迷可以入場。 係呢個球場無論係主場定作客球迷都可以話只有自己友先可以入場，我地應該要覺得好榮幸！！！
1860 一直都有意同市政府申請擴建球場，不過市政府一直都以唔同原因係度拖拖拉拉，之前又話佢地可以借安聯球場咪幾好，後來降左班又話佢地有排都未升返上乙組唔洗咁快傾定，又話個球場係正市中心好難搞；曾經佢地建議過搵另一塊個地方起新球場，但球迷話除非塊地係返同一個地區，如果要跨區既話佢地唔會接受。 後來又有計劃話可以將球場擴建至可以容納 18000 人，球隊話你講笑呀？ 我地最少要 21000 － 24000 人喎。 最近雙方終於達成共識，但工程最快只會係 2028 年先動工…. 所有 project 只要涉及到政府就只能龜速進行…好在 SVE 球場係私人擁有，同政府相關既限制相對地少好多！
呢兩個星期過得超快，上星期一先作客完 Mannheim，週末又睇左場主場，三日後就要去慕尼黑。 我地一早請左星期二下午半日同星期三上午半日假，星期二超準時十二點出發，預計五點左右可以到達慕尼黑泊低架車。 好好彩路上無塞車，只係超大雨同好多修路工程要渣得慢啲，最後五點前就到達～～ 我地由慕尼黑既北部到達，經過安聯球場唔洗幾分鐘車程就有一個係正 U6 Studentenstadt 地鐵站旁邊既 P+R 停車場，1,5€ 可以泊足 24 個鐘！ 如果要去睇拜仁既話可以轉搭 U6 去到安聯球場，去市中心就搭另一方向都係幾個站就到。 我地就要轉車搭 U1 去綠森林街。
一出站行唔夠兩分鐘就已經到達球場門外，好快就入到去 Block Q。 我地嗰五個鐘既車程全程都係落超大雨，黎到慕尼黑佢唔只停左雨，仲出埋太陽，睇住西看台後面既晚霞到入黑好靚！無諗過我地竟然可以置身係綠森林球場～ 作客球迷慢慢入場，同時西看台都愈黎愈滿，終於等到開波。
我地企係看台底比個圍欄遮住啲視線超難睇到遠處嗰邊發生緊咩事，而 SVE 上半場又先攻向西看台，係上半場佢地長期都係對面，睇到條腰同條頸好攰。 唔夠 20 分鐘我地就入波領先，去到呢一刻大家都仲幾有信心，雖然睇唔清但有唔少射門機會，只要把握好少少應該好快可以拉開比數。
1860 係季初一度被睇好係升班熱門，去到季中到而家瘋狂失分跌到落中游位置。黎到今日對住榜首球隊佢地要更加上力去證明自己仲有去爭升班既能力。由我地既現場既角度睇，我地班球員個個都硬係差咁啲野，唔知點解佢地好多奇怪既失誤，帶波甩腳、後面有鬼無人提比人輕鬆偷到波、傳波傳左比對面球員… 廿分鐘後，對方靠我地一個失誤搏到角球，角球開出頂入追和…. 如果我地班球員集中到精神唔犯下啲無壓力失誤的話… 人地就唔會企係度都可以執到機會囉！！！
上半場總括黎講都仲 ok 既，諗住下半場佢地會向我地呢邊半場攻，我地既視線終於會好啲。 只不過人地係下半場踢得更加落力，我地又係要長時間望向西看台…. 主場球迷係下半場掛上 Power muss weg 既大字報，向球隊管理層抗議要求 Anthony Power 落台。開波後，西看台既旗幟全部靜哂落黎，一開始我地以為佢地無聲抗議。 我地慢慢開始覺得有啲奇怪，佢地抗議異常地長？有人見到西看台上有幾個著住螢光反光衣既保安/救護員，頓時意識到西看台靜落黎唔係抗議，而係有球迷受傷。 我地隨即都靜落黎… 即刻好似去左英國睇波咁，間唔中有啲人會係主看台帶起啲個個都識唱既 Lalala 歌… 但又唔明點解佢地會自發打氣，無理由發現唔到個球場靜左落黎？ 再過多大約十五分鐘見到班救護員起行， 雙方球迷互相鼓勵希望受傷球迷早日康復，隨即各自各繼續為自己既球隊打氣。
最後嗰十分鐘 60 完全㩒住我地黎攻，如果唔係有門柱頂住我地就連一分都無。 作客看台有啲球迷都開始不滿，唔明點解策略唔 work 都仲唔換人，去到最尾幾分鐘先換中場？大家都只希望快啲完場，執到一分得一分。
當然我地對班球員既表現唔太滿意，但完場後我地仍然以掌聲迎接佢地，希望佢地可以快啲回魂踢好啲。最近排第二既弗賴堡二隊愈追愈近，隨時可以爭做冠軍。 好在佢地唔可以升班，我地離第四位都仲有超過十分既距離，有人講笑咁話就算剩返十一場波都追哂我地都仲升到班～ 暫時唯咁樣去安慰自己…
後來睇返各方球迷既評論，1860 球迷好多都話今場係近幾個月踢得最似樣既波，係 SVE 強攻下佢地係上半場只失一球都偷笑… 而 SVE 球迷就話今場其實班球員踢得好好。 上帝視覺同現場睇既真係有咁大分別？ 過左大半季，個個一開始只係當 SVE 係黑馬，贏波只係神來之筆，去到倒數階段佢地目標要場場出盡200％ 去搶分， 而家睇黎我地只係仲係出緊 100％…. 好似一直以黎我都只希望佢地保持水準，而家目標由護級變爭升班，睇黎我地要改變下心態，唔好持住有積分優勢就放慢腳步，下場要繼續去搶分！！！
係慕尼黑逗留左大約五個鐘…. 搭地鐵返到去停車場就直奔法蘭克福返屋企訓覺。