11.03.2023
德國足球丙組聯賽 第 26 週
SV Elversberg - SV Meppen
Waldstadion an der Kaiserlinde
賽果：2:2 (2:2)
入場人數： 4308 （約 100 名作客球迷）
門票： 10€
更多相片

今季我地未曾連續兩場不勝，希望返到主場迎戰榜尾既 Meppen 可以拎佢地黎出氣重拾信心。 不過而家踢一場少一場，要搶分護級既球場好多都會迴光反照係不可能既情況下贏波，所以大家既內心總係有一點不安。

早幾日終於定左四月賽程既日期，好好彩我地全部都係星期六出戰，只有一場係復活節既星期一。 對比起鄰市場場都係星期日… 睇黎成績好既球隊係有著數的 ^^

星期六一如往日十二點半左右去到球場～ 球迷組織 HF 整左條新既頸巾同同款貼紙，好多人圍住個檔口爭住買，所有收入都會拎黎製作打氣物資。 我就企係看台頂等球員入場一刻時影幾張相，可以係網頂影到去對面作客球迷區。

對方帶左接近 100 名球迷到場，以超過六個鐘既車程黎講真係算唔錯。 佢地係看台上舉起大字布話黎緊只需要平均贏到 1,82 分鐘可以護級成功。 佢地早兩日簽入新領隊 Ernst Middendorp，我唔識佢但睇新聞話佢有好豐厚既執教歷史，去 wikipedia 睇見到佢份水蛇春既 CV，原來仲曾經執教過長春亞泰。為左 Meppen 佢係南非搬返黎德國，希望可以幫到隊波護級。 返到黎第二日就要作客榜首既 SVE！

影夠相就落左去看台底，大約十分鐘後，我地就入波領先。 好似都有段時間無咁早就入波，睇黎我地真係可以借佢地黎出氣？ 但唔夠兩分鐘，對方由龍門大腳送個波去前面，好流暢咁一個頭鎚接應係禁區起腳靚射追和。然後再有一個禁區向既罰球，我地排左個兩人人牆，唔知點解嗰刻有種不安既感覺，果然比佢地直射中內柱入網。

到現時為止佢地有兩個機會就成功入到兩球波，我地既既組織同踢法無咩點變，但人地針對住我地既踢法有部署，唔比我地有太長既上腳機會去組織或者去諗點樣射波，好好彩係完半場前係龍門前混亂既情況下搵到機會射入追和。

下半場我地都開始上力，有好多唔錯既埋門機會，就係差咁啲運送唔到個波入網。 去到中後段就算踢少一個都仲可以保持控球權，反而對方開始唔敢再亂咁上前令到後面有空位比我地有機可乘。 去到尾段仲走去角球旗拉布，睇黎佢地寧願保守守住一分。

最後我地連續三場不勝，唔多唔少都有啲失望，甚至開始擔心我地係咪真係會臨尾香？我地成日都話隊波唔知點解天氣一凍就會跌 watt，總之係冬天總有幾場個個離哂魂咁，我估佢地正值呢個時期… 希望班球員可以盡快脫離呢個信心危機！