06.03.2023
德國足球丙組聯賽 第 25 週
SV Waldhof Mannheim - SV Elversberg
Carl-Benz-Stadion
賽果： 2:1 (0:1)
入場人數： 11680 （約 550 名作客球迷）
門票： 11€
更多相片

最討厭既星期一要去作客老對手 Waldhof Mannheim，人地曾經風光一時，去到 2000 年頭因為財困而被迫要踢落低組別比賽，後來同一齊被困係地區聯賽，無論當季成績有幾好，入到升班附加賽失手就白費全季既功夫。 早幾年見住佢地連續三季升班失敗，親眼睇住佢地嬲到想攬炒，超級同情佢地。後來賽制改革冠軍直接升班，佢地隨即甩難成為第一隊直接升班既西南地區冠軍。

我對呢隊波又愛又恨，係德國去食花生既比賽應該佢地係排第一位，最主要係佢地既球迷有氣氛既保證。 恨又唔係話恨，但好怕佢地囉… 特別係作客，唔好話贏波，我地連一個入球都從來未見過。 而佢地今季主場又幾乎不敗，我地完全唔敢有太大期望。

星期一準時四點收工就立即出發南下，希望可以避開繁忙時間。 好好彩一路暢通五點半左右就到達球場附近既停車場。入到場就先買晚餐～ 其中一個中意佢地既原因係佢地既小食有好多選擇！！ 有腸仔有豬扒又有咖哩腸同薯條，仲要係炭火現場燒！我地個個都㨂左食豬扒包～

今日平日夜波，好在 Mannheim 離 Elversberg 只係大約個半鐘車程，最後又有超過 500 名球迷到場！ 好多球迷一入到場都嘩一聲～ 佢地可能第一次跟 SVE 作客，第一次見到一個比較有規模既球場！

講起球場， 原來 SVW 主場同樣都係唔符合德乙標準…. 我地個球場就因為太細，Saarbrücken 個球場就因為其中一個看台個上蓋唔夠長，而 SVW 球場就因為射燈唔夠猛 -_- 球場既擁有人係市政府，佢地研究過翻新球場既洗費會貴過起一個新球場，所以佢地而家考慮緊搵地起新球場。 起新球場都算，但佢地竟然提議起一個比現時更細既球場，另加一大個區做貴賓席，令到啲球迷開始準備投訴爭取一個屬於人人既球場。

返黎今場波， 對面既主場球迷係球員進場前係看台底拉開左幾場布，係底下笠頭套…. 等到球員進場時，佢地先舉起寫住看台名既門旗，然後向住球場大放煙花！！ 唔係平時淨係噴煙嗰啲，而係真係向左噴既煙花。 只可惜我地係正對面睇落麻麻地，係主看台睇落更加震撼！

一開波我地盡顯最強升班馬既姿態搶住黎攻，有唔少有威脅既埋門，而係差咁啲運～ 去到 12 分鐘，我地終於入波啦！！！！ 我地作客既第一個入球呀～～ 上半場時間過得好快，兩邊互有攻守咁好快完。 去到下半場，唔知點解感覺開始唔係好對路，覺得下下都差咁啲，成日比埋啲醫院波比對手偷到雞。 去到 71 分鐘，對方終於搵到機會破網… 我既感覺就愈黎愈差，直覺話我知我地應該打破唔到宿命。

話口未完，我地失波後係中場開波，第二腳就交失左。 對方搶到波後傳入禁區…一分鐘內連入兩球收我地皮。 雖然班球員好似開始醒覺咁，但我地知唔會追得返，認命好過。 但係呢～ 輸左波我地都仲係企係榜首喎！ 向好方面諗：送三分比對方可以令 FCS 再跌一位～～ 所以作客看台上既我地繼續出盡力唱歌為球隊打氣直到完場！返到去睇重播先知原來我地球波係烏龍球 -_- 即係我地仍然未係度贏過波未入過波…. 就好似拜仁無論幾強勢都贏唔到慕遜加柏咁 😀

完場後班球員好唔開心咁走到看台前， 我住佢地都好自責，兩次幾百人去作客，兩次都要大家失望而回。好多球迷走到看台底去鼓勵班球員集中去下一場，輸波是正常的！！星期六返到主場我地要搵榜尾球隊黎出氣！！