04.03.2023
瑞士足球超級聯賽 第 23 週
FC Luzern - FC Basel
Swissporarena
賽果： 0:1 (0:1)
入場人數： 13248 （約 1200 名作客球迷）
門票： 34,40 CHF
更多相片

上年年尾因為要穿過瑞士去法國上山過聖誕所以買左瑞士既公路路票，大部份國家如果收費既話主要分兩種，一種係好似香港啲隧道咁有閘口收錢，另一種就係要買一塊貼紙，有唔同日數或者可以買年票。 瑞士就係要買貼紙，但佢地只有一款，就係年票！ 咁買左年票就無理由只用一次咁蝕，一早睇中今個週末 SVE 無波踢就決定黎個 weekend getaway。

時隔超過十二年後重回舊地，不過我已經對呢個城市無咩印象 lu，記得座水塔，條河同條橋～ 星期六一早出發南下，中途係麥記食左 brunch 就繼續出發，最後大約十二點左右到達泊低架車就行去舊城觀光。 今次黎瑞士迎接我地既竟然係一個大太陽，氣溫高達九度！！ 我仲驚會凍所以著左厚既 heattech 打底，最後一落車就碌左件褸…. 仲要食雪糕降下溫。 大約五點鐘就去市外既酒店 check-in 休息下再出發去球場～

由酒店行去球場只需大約十五分鐘路程，去到球場門口先買條頸巾做手信，撞正作客球迷岩岩到場。 話說佢地今日係搭火車由市中心行去球場，有架超舊款既水炮車跟住佢地黎行。 無留意開既話未必會知瑞士球迷其實都好癲下，巴素球迷上次同樣想由市中心行去球場，但唔知咩原因比警察禁止左，後來就出現左一輪騷亂。今次啲警察就話你地咁中意行就行飽佢啦～

我地呢啲窮人買左係作客區旁邊最平既波飛，好在場波賣唔哂我地可以自己升級搵個靚啲既位坐，由角球旗位去到龍門後面，可以更加清楚望到作客區。 入場時仲有九個字先開波，而對面龍門後面既主場球迷區已經企到滿哂，佢地好忙咁準備緊 choreo。

雖然我地幾個字前見到班作客球迷到場，但佢地去到開波前十分鐘先有人入場去到看台前準備。有三條友係度綁長繩用黎掛開球迷組織既橫額，幾分鐘後就一大班人一齊擁入場隨即開始唱歌。 由於我地坐得好近作客球迷，所以都無咩機會聽到主場球迷既打氣聲 （好在都仲可以用眼睇下～）

球員入場時，主場球迷就展開佢地準備左既橫額，見到佢地拉開左一半又收返起然後再拉開。 看台前既大字布係用瑞士德文…. 估左陣先知佢地想話「由第一分鐘到九十分鐘只有一個目標」食左球隊創會年份 1.90.1. 既字～ 不過佢地個 9 字爛左，變左 1.00.1. 所以係現場睇既時候完全估唔到佢地想 up 乜。 同時佢地開始放黃白煙之餘，場外仲有人放煙花！！！ 作客球迷都唔輸蝕，係看台上開左十幾廿枝煙，開波頭十分鐘啲煙焗住左係看台被逼食「二手煙」， 唔同既係呢陣味好香好正！！

主隊 FCL 最近問題多多，第一係同大股東 Bernhard Alpstaeg 有關； 場內有好多 Alsptaeg out 既抗議橫額。 呢個大股東原先擁有 52％ 既股份多年，最近佢突然話想做主席，話佢持股最多所以佢可以踢人走然後捧自己上位，點知佢比人搵到黑材料發現原來佢多年前從其他人買入既股份全部都係唔合法既，最後仲輸埋官司變成而家只持有 27％ 既股份，即係無得再話事～ 佢嬲嬲豬之後就開始玩野，由於佢同時擁有球場部份持有權，佢話唔會簽名比球隊用個球場去申請踢聯賽既牌照… 球會而家拎左份去到 2028 年既球場租約出黎比足總睇希望可以過到關。

老實講場波超悶，唔係 Basel 搏到個十二碼的話呢場波就算無入球完全都唔值得有一分囉，完全無組織無策略又無技術…. 唯一亮點係…. 半場時係場上有個考球迷記憶既遊戲，規則係大電視上有十一張球員既相，要記住佢地既位置然後有 20 秒時間係塊白板度拼返出黎。個遊戲唔係重點… 重點係個獎品！主持人先 check 第一個人既結果，然後話你放塊左五張相，每張二百法郎，你贏左一千法郎！（實際幾多張相同幾錢我唔記得，但最後一定係過千） 瑞士德文我要好專心先聽得明，呢一刻我即刻醒左又以為自己聽錯！！！ 然後佢再數下一個參賽者，最後係有成千五法郎！ 係德國呢啲遊戲獎品最多比你贏張波飛或者幾十歐禮卷，但瑞士係閒閒地就派成千歐出黎，果然係有錢人….

下半場場波更加悶，雖然作客球迷好好睇，佢地係度練新歌 （一開始細聲唱左五分鐘），然後唱足成個下半場，都幾佩服佢地每年要對同一對手四次都仲可以咁多活力。 入夜又愈黎愈凍坐得好唔舒服… 等到球證吹完場後個感覺係鬆一口氣終於可以郁下～～好在酒店就係附近，好快可以返去暖身，今朝起身到而家已經過左十八個鐘，終於可以攤下抖下！