26.02.2023 德國足球丙組聯賽 第 24 週 SV Elversberg - Dynamo Dresden Waldstadion an der Kaiserlinde 賽果：1:1 (0:1) 入場人數： 7219 （1110 名作客球迷） 門票：10€ 更多相片
八月作客 Dresden 時撞正朋友結婚而未能隨行，等左半年終於可以係主場迎接佢地！ 咁既戲碼我地一直以為只有係盃賽先會上演，無諗過而家係普通聯賽就可以遇到我地一直都好仰慕既 Dynamo Dresden。
以成績黎講，呢隊波平平無奇不值一提；但以球迷同文化黎講… 可以話無人能夠同佢地相比。 係德國個個都好怕佢地既球迷，覺得佢地同恐怖份子差唔多，唔小心同佢地對望就可能會打你一身；但同時又會覺得佢地嗰種執著、創意同講得出做得到既態度好值得尊敬。 幾年前佢地向足總「宣戰」之後嚇到足總即刻改變態度話願意同球迷坐低傾下；球隊同組織週年紀念又會有全城響應放煙花慶祝；去到場內又有各種打氣方式… 今日佢地第一次黎到 Kaiserlinde 作客，好慶幸佢地只係視呢場波係普通賽事，相對地平和好多。 佢地每季都會決定邊幾場波要大搞，邊場波要係賽前造勢，邊場波要去搞事等等。。。而班球迷通常都好聽話，無咩特別行動就唔會主動去搞事。
今場波係星期日一點開波，我地星期六就已經去左莎蘭睇左場低組別波，天朗氣清雖然得幾度，但只要係太陽底下就即刻暖好多，拎住枝啤酒係手都唔會覺得凍。 黎到星期日氣溫明明只係低多兩度，但體感突然變到係 -7 度仲要超大風…
去到球場我先係看台頂霸位等開波可以影下作客看台… 個 view 係靚但要硬食西北風。入場時只係十二點，雖然好凍但望住 C1 看台慢慢愈黎愈多人個感覺好正； 特別係開波前半個鐘已經差唔多企到滿哂。 賽前幾日，主看台既門票已經賣哂，而 C1 就只賣剩大約 300 張！！ 而相隔 600 公里既 Dresden 就帶左 1200 個球迷到場，唔係癲係咩？
等到球員入場，我地準備左一個小型 choreo。 係看台前有十幾個人舉起門旗砌成 SV 07 Elversberg，看台上就向上拋起黑白捲紙！ 仲有多得球迷既捐款，球迷組織買左一套擴音系統。 得到球隊既批準安裝係看台上令所有球迷都可以聽到 Capo 既指令去跟住一齊唱歌打氣！ 但佢地仲要學下應該點樣善用…. 上半場佢地唔夠兩三句就揸咪大叫，例如唱一首歌去到其中一句中間幾個字就對住枝咪唱。 平時用開大聲公無咩問題，但係喇叭出黎既聲太勁太嘈。我見到企係喇叭前面既球迷好似覺得好煩咁，連我都覺得有啲太多…
本來我諗住企係後面可以享受下客隊既打氣聲勢，點知我地呢面既氣氛唔錯，借住主場人多既優勢可以同 Dresden 鬥過，要專心先聽到對面唱咩歌然後配合返佢地身體上既節奏。我最中意既其中一首係超簡單既 Dy dy dy dy dy – na na na na na – mo mo mo mo mo， 睇住全個作客看台上面既人由左跳到右，由右跳到左，然後又分隔紅海兩邊互相對唱， 一邊用頸巾一邊用手… 而佢地唱近比較出名既係全個看台一邊左右步操一邊叫 東東東德～ 今日佢地無玩呢首，如果唔係我地一定要用 東東東法 黎回應佢地～
Dresden 個 30 號前鋒勁高大成架坦克咁，一開波佢地已經搶住黎攻有好多有威脅既埋門，最後果然比佢地靠罰球比個 30 號搶位成功破網。 我地隊波今日就甩皮甩骨，一兩個傷左上唔到場，然後又幾個球員一齊病咁， Woltemade 要用紙巾塞住個鼻肯鼻水。 上場波一個救全家既 Mustafa 踢左廿分鐘主動話要換出然後衝入更衣室… 佢既手勢係佢想嘔，但我地估佢肚痛要衝入廁所。 總之個個都無咩精神咁呆下呆下，真係好在個個都仲出盡力捱到半場只係落後一球。
半場時我頂唔順西北風走返去看台底，底到連底線都見唔到，但起碼可以食哂我身後既打氣聲，覺得今日既氣氛真係特別唔同。 無諗過以戲碼黎講對方只係 Dresden 都可以有超過七千人入場，每場都愈黎愈多後生仔想企係中間打氣！！ 每場波都希望大家可以一齊慢慢咁成長，吸納多啲死忠！
今場波既控球時間大部份都係我地腳下，就係搵唔到機會起腳，好似病左個腦轉唔到咁。 下半場我地攻勢多左好多都係送唔到個波入網，但客隊都守得好好唔比我地係禁區內有機會起腳。 去到近完場又係靠 Woltemade 搏到十二碼，再靠剛換入既 Dacaj 射入追和！ 今場波主客兩邊都覺得和波先係最公平既結果，只係客隊覺得佢地未能夠趁我地病攞命覺得有啲唔抵。
黎緊幾場波都唔易踢，下場要去作客 Mannheim － 佢地今季係主場打遍天下無敵手，而我咁耐都未試過作客佢地贏波。 今年我地既強勢會唔會又寫下新一頁呢～？