18.02.2023
德國足球丙組聯賽 第 23 週
FSV Zwickau - SV Elversberg
Stadion Zwickau
賽果：0:2 (0:0)
入場人數： 3,396 （50 名作客球迷）
門票： 13€ （另加 2€ 手續費）
更多相片

作客 Zwickau 對 SVE 球迷黎講係一個唔想諗返起既惡夢。 係 2016 年曾經有機會進入升班附加賽再次挑戰升班，當時既對手就係來自東德既 Zwickau。 首回合以一比一完場，去到次回合作客輸一球飲恨無緣升班。 最慘係回程時遇上大雨高速公路水浸，然後巴士司機又要依法例休息，最後花左十幾個鐘係巴士上面先返到屋企。

不過今時唔同往日，我地今季已經係丙組企穩陣腳，可以用平常心去迎接呢場波，驚既唔係我地而係要搶分護級既對手。Zwickau 講出黎應該無咩人識，以城市黎講要去旅行點㨂都唔會㨂去呢個鬼地方；但以足球黎講隊波係東德既規模算係大型。

星期六一早由法蘭克福出發，車程預三個鐘多啲。 開車後見到個預計時間一路增加… 一個鐘後塞左係公路，係塞到可以熄匙嗰隻！！睇住個到達時間由本來十二點到十二點半，最後去到一點半….. 唔係每次作客 Zwickau 都要出事嘛？ 停左大半個鐘終於通車…. 好在係德國揸車，到達時間好多時候都可以自己控制，係無限速既情況下追返啲時間返黎！ 最後我地只係比原定時間遲左半個鐘左右。

大家今日都係第一次黎到 Zwickau 球場，上次作客時呢個球場未起好要去到鄰市借球場。 新球場有四個分隔開既球場，如果有幸新班佢地就會擴建角落位置連接四個看台，應該好輕鬆就可以滿足到足總既要求。

Zwickau 同 Elversberg 相隔超過 500 公里， 最後只有一架唔滿座既球迷巴士開出，加加埋埋有五十人到場支持。好多人即刻指住我地黎笑鄉下隊無球迷～ 呢樣我地一早預左亦都唔怪人。 今年我地既主場入場人數上升左兩至三倍，本來有千五人入場已經算多人到而家場場有三至四千人入場。 而作客人數多既有接近一百人，少既就十隻手指數得哂。 今日有幾十人山長水遠黎到支持我地都已經好感動，人少都有人少既好處，傾計方便好多～

值得一提既係，今日突然有個好熟口面既人入場… 我望住佢佢又同我打招呼但我叫唔出佢個名…. 後來偷聽先認得佢曾經效力過 SVE 既球員 Mike Eglseder，而家係效力東北地區聯賽既火車頭！ 「嗰個間唔中好似唔願踢咁然後賽後會同我地鬧交條友呀」。佢話見近近地所以想黎 say 個 hi 睇下大家點，又話見到隊波踢得咁好好開心～ 佢雖然無跟大家一齊唱歌，但都有一齊拍下手（就連最後同球員慶祝佢都有一齊舉手）， 即刻原諒佢～～

主隊現時係降班區掙扎緊，好多球迷都愈睇愈無癮。 佢地既球迷組織 Red Kaos 整左一支新既旗同口號無論點都會繼續支持隊波。 為左鼓勵下啲普通球迷，佢地有部份人走左去主看台帶領氣氛，希望大家可以一齊激勵班球員。

一開始好似有啲作用， Zwickau 好主動咁搶攻，但埋門一腳始終都係差啲。 而我地踢得都算唔錯，只係啲攻勢一直都唔入肉。 今日我地雖然人少，但個個都好有動力去唱歌打氣，仲係下半場創作左一首新歌。 一開始細細聲唱等大家熟習下歌詞，練左大約十分鐘就一齊唱到完場～ 下半場尾段由剛被換入既Mustafa 連入兩球幫我地拉開榜首優勢！！ 成場波雖然一直攻唔入，但班球員都係沉得住氣慢慢再搵機會，令我地可以係呢場本來應該 0:0 悶和，甚至係比對方負碌入波既劇本改寫為屬於我地既勝利！

同時間其他主要競爭對手都失分…. 癲到我地而家領先第二位 12 分， （弗賴堡二隊可以無視，因為二隊唔可以升班），領先附加賽位置 17 分。 望住個聯賽榜既積分其實好緊湊…. 只係無啦啦有一隊叫 SV Elversberg 既奇芭係榜首玩串個 party。 個感覺好似係得我地係度認真踢波想升班，其他球隊只係黎 hea 咁。

睇波咁耐有咩（輸波）大場面未見過，就係從來未有過呢種遇敵殺敵既感覺…. 老實講，我地真係好享受今季既每一刻，亦都要趁可以享受既時候好好享受。