11.02.2023
德國足球丙組聯賽 第 22 週
SV Elversberg - VfB Oldenburg
Waldstadion an der Kaiserlinde
賽果：3:0 (2:0)
入場人數： 4082（約 100 名作客球迷）
門票： 10€
更多相片

上星期係不是打比戰大勝後，今日我地又再返到莎蘭主場迎戰北部升班馬 Oldenburg。唔知點解有一種鬆一口氣既感覺，好似終於可以有一場普通波睇下咁。

今日對手係邊個都唔重要，重要既係球會又寫下歷史新一頁。 龍門後既 C1 看台係今日終於正式有上蓋，我地終於唔洗再日曬雨淋咁睇波！ SVE 既主場本來只係一個好 up dup 既森林球場，唔係 13 年踢丙組被迫要擴建球場都未必有今日咁既面貌。 今季再次升班，球隊都遵守承諾即刻起上蓋。 暑假嗰陣佢地好大口氣咁話德丙開季前會搞掂，點知遇上運輸問題話要延遲，當時話會趕係雨季前完工。 講下講下我地都無左件事。

去到兩星期前星期五晚主場贏左 Essen 之後，第二朝有人發現 C1 看台上面人係度開工！ 自始就日日有人去散步監工，然後影相放同大家分享進度，首先係起哂地面既階磚，然後就係啲工字鐵到場，一條一條咁棟起…. 突然間，只要你電話入面有 C1 地盤相既話就可以證明你係 Elversberger。 當時有內部消息指，間建築公司同球隊傾好左兩個星期內可以完工。 就係咁，去到今個星期四個上蓋就完成左！

大家好早就去左球場一睹看台既新面貌，個個一到場就即刻影相，同埋係咁有人係度 9 叫測試下看台入面既回音。 有左上蓋之後，我地唔洗再日曬雨淋之外，打氣聲仲會即刻大聲左。 突然之間，企係 C1 看台上面好似去左作客咁，又或者好似岩岩搬入新屋所有野突然都唔同左咁。

有啲本來為左有瓦遮頭寧願比雙倍價錢坐係主看台而家都走返過黎 C1 度企， 當中應該仲有唔少人見新屎坑所以要入場睇下～ 無論點都好，完全無諗過今日一場咁普通既戲碼，C1 看台都可以有咁多人入場！！！ 最後竟然仲有超過 4000 人入場？ 呢個數字以前只會係大戰先會有，仲要係過半來自作客球迷….

講起作客球迷， Oldenburg 雖然唔知咩大城市，但佢地都有好多球迷追隨佢地～ 今日佢地要花最少五個鐘車程黎到作客都有近一百人到場，真心要 Respect! 首循環我地無人去作客…. 當時只係開季第三場波，仲要係週中，即日來回既話應該要請兩日假。

客隊現時場場出力搶分護級， 近幾場佢地都踢得唔錯。 尤其係上場波對住 1860 先落後兩場，最後近完場連入兩球追和搶到一分，絕對唔可以睇少佢地。 而今場波佢地的確係踢得唔錯，有攻有守，只係我地踢得更好， 上半場靠住 Woltemade 領先兩球。 就連不萊梅既球迷都好鄧我地開心，幫佢地調教青訓～ 佢去到上年年尾先第一次正選上陣同入到波，然後信心大增今年四場入四球有多次助攻，已經威脅到 Koffi 係球迷心目中既球王地位！ 下半場有 Rochelt 埋齋輕鬆贏三分～

完場後對面啲球迷走到看台前鼓勵自己班球員，睇得出佢地對啲球員仲係好有信心，要繼續落力搶分護級～ 而我地就當然要同我地既球員一齊慶祝暫時以十一分距離企係榜首！

係網上面有好多人討論 C1 既新上蓋，好多坐係主看台既球迷話氣氛即刻好左好多。 有啲坐得比較遠既仲話平時唔係好聽到打氣聲，但今日聽得好清楚～～ 本來我地覺得今日少左人一齊打氣，但睇黎上蓋真係幫左好多！下場我地要去到東德作客，唔知到時會有幾多人去呢？