04.02.2023 德國足球丙組聯賽 第 21 週 1.FC Saarbrücken - SV Elversberg Ludwigsparkstadion 賽果：0:4 (0:3) 入場人數： 15,154 （約 1700 名作客球迷） 門票： 12.5€ 更多相片
呢個戲碼一直都有好多人叫做莎蘭打比 Saarland-Derby ，而有啲 FCS 既球迷一直都好唔中意啲人咁叫，因為佢地只認另一隊莎蘭球隊（唔想提佢地個名），或者鄰州既凱莎羅頓先係佢地既宿敵。 而我地呢隊鄉下波無歷史又無球迷根本不值一提，完全唔配做佢地既打比戰對手。 由 SVE 既角落睇就當然係重頭戲啦，話哂 FCS 係莎蘭勁旅，可以係佢地身上搶到三分絕對係要大肆慶祝！
雖然人地唔中意叫呢場波做打比戰，但又唔知點解好著緊呢場波，又話要比啲顏色我地睇等大家知道邊個先係莎蘭一哥。 我地當然好想贏波，但今場就算輸左我地都繼續企穩係榜首，所以大家都係以平常心既期待呢場波。 咁既然人地唔中意叫打比戰，咁我地只好叫佢做「鄰居對戰」～
賽前我地被分到 1900 張作客門票，球隊就先開放比會員同埋季票持有人買飛，每人可以買最多十張。 係呢一個階段已經賣左近千張飛…. 最後去到賽前幾日總共賣左 1600 張左右，剩返 300 張飛比主隊等佢地可以係比賽當日係門口賣。 呢個時候 d FCS 球迷又揶揄我地作為德丙榜首踢得咁好，場波又咁近都賣唔哂啲作客飛係足球界既恥辱～ 但有 1600 球迷去作客係歷史紀錄！！ 過去咁多年就算係州內出戰最多都係得幾百人… 所以我地對今場波既作客球迷數字非常滿意。 主隊升左上德丙三季，平均入場人數有八千人左右，但去到今場不值一提既「鄰居對戰」竟然售罄，佢地一定起級睇唔起我地要入場睇我地點樣被收皮啦～
比賽當日唔知點解我心情大好，一啲緊張既心情都無。 而路上我 spotify 播起一首叫佢 Sollbruchstelle 既歌…. 呢首歌係早兩個月作客 Aue 時係球場聽到時已經即刻比佢洗左腦。 黎到呢刻我就覺得今日一定係屬於我地既。 呢首歌入面有一句歌詞係： Der Leuchturm steht im Flammen （火燒燈塔）。 本來就無咩特別，但 FCS 球迷一直都自稱為莎蘭燈塔。 呢首歌話我知今日佢地會被燒毀～～～
今日係我地係 Ludswigpark 重建後第一次企係作客看台， 上季既莎蘭打比戰我地已經黎過打卡，但當時我地係用主場看台，對手亦都唔係 FCS。 所以今次係我地第一次係聯賽到訪～ 賽前 FCS 排係第三，其實大家見到有兩隊莎蘭球隊有好表現都好開心，隨時仲會一齊升班一齊成為莎蘭之光。 願望成真當然係好，但大家一直都關心一個問題： 兩隊波既球場都唔符合德乙資格。 足總規定德乙球場要可以容納最少 15000 人，而四個看台都要有瓦遮頭。 我地個森林球場就當然唔合資格，但球隊已經睇緊合適方案去擴建球場。 而 Ludwigspark 就岩岩先花左四年重建，仲要年年超資最後唔夠錢完工，所以佢地其中一個看台有兩大塊黑色空位，就無因為無錢無時間去跟上原本既計劃。 最好少係，你就咁睇佢地個球場四面都有上蓋，容納人數又夠大。 但佢地其中一邊既上蓋唔夠長…. 蓋唔過下層既座位，所以被視為唔合資格。 而呢個球場既擁有人係市政府，肯唔肯花錢再去維修要等政府同納稅人去決定…. 完全係一大笑話！
球迷組織 Horda 就係賽前準備左 Choreo， 亦都係球隊第一次既作客 choreo～ 將看台飛開上下兩區一黑一白，然後係中間打起三角旗。場波兩點開波，我地十二點就到左球場， 大家都忙住準備 Choreo 既野。 有幾個人負責企係門口派傳單，上面講解今場 choreo 既程序，叫大家開波前半個鐘會派發 choreo 用既膠袋，拎左之後要將佢入氣（類似巨型 boom boom 棒咁）然後聽看台底指示幾時要舉起同埋點樣拉起塊三角旗；有幾個人就要將看台前貼黑膠布，然後又要分工點樣派膠袋等等。
我一開始走左去看台最頂度食下花生，個 view 超 perfect，望到下面自己既球迷，又可以飽覽全個球場。 本來諗住接近開波時會走返落去，最後個作客看台企到好滿我就廢事攝黎攝去… 留返係山頂影相算，順便又可以借勢帶動附近既人一齊唱歌 （最後我旁邊既阿婆都有跟住一齊唱啲簡單既 Schalala 歌，好開心）
等到球員進場，我地既看台變成黑白色。 主隊球迷亦都準備左一個全場 Choreo，將球場變成藍黑色，係佢地既球迷看台前掛上「全個莎蘭都係藍黑色」 既大字報… Errr. 好可惜～ 黑白色而家開始慢慢冒起。後來睇返相，見到我地既 Choreo 超級成功，黑白分明，個個都好開心！！！
開波後， FCS 搶住黎攻，頭十五分鐘真心覺得有可能會輸波。 佢地向住我地呢邊黎攻，場波一開始就大部份時間都見到佢地係我地面前。 去到 26 分鐘我地角球開出，遠柱有人接應中楣，然後我地見到有個白衫人準備執雞起腳射波，但個波竟然彈返出黎！ 呢個時候已經 dum 哂心口，但幾秒之後球證竟然吹十二碼！！雖然唔知咩事但我地準備好哂心情要慶祝… 一如以往由 Jacobsen 操刀，點知佢射得勁正中，對面個pk龍企定定接實哂，變左係主隊球迷係度慶祝。 好驚會咁樣比佢地食住黎上….
但我地唔係靠呃飯食先成為榜首的。 幾分鐘後，我地又有一大班人係對面，見到個波慢慢碌向龍門方向然後班球員係度慶祝，今次真係入波啦！！！ 呢一刻我地完全唔知邊個入波… 淨係知領先緊。 然後唔知我係度講咩，然後前面有人話我知踢少一個應該係我地可以食住上。 我話，下？？ 做咩踢少個？？ 原來我地搏到十二碼時對面有人被罰直紅出場，但我太開心完全無留意場上面發生緊咩事… 如果係禁區內直紅得就通常都係蓄意手球 （果然係咁，對方後衛龍門上身係底線雙鎚打出）
唔夠幾分鐘，我地左邊有個機會上去傳中， 有個白衫人好輕鬆咁將個波頂左入網，兩粒！！！ 我地又係唔知邊個入波，主場勁小氣咁好細聲宣布比數，完全聽唔到。 即時上網睇返先知兩隊都係神射手 Schnellbacher 入波，唔知佢戴唔戴到帽呢？ 上半場完場前我地又再搏到多個十二碼，由借將 Woltemade 操刀射入～ 領先三球完場！ 啲 FCS 球迷本來仲話兩球十二碼都有爭議性，但後來睇返重播明明就勁明顯犯規，我地應該仲有多一個十二碼添， Woltemade 係龍門前比人勾腳拉跌，仲比pk龍話佢插水。
下半場開波前作出左兩個換人調動，換走左有黃牌在身既球員，同埋換走我地既射手，應該係驚會食多張黃牌同埋減少受傷機會… 我地估應該可以係下半場由黎試陣練波。 雖然我地多左啲甩碌場面，但整體黎講都仲係壓住對方黎踢。 主隊球迷雖然人多聲勢浩大，但當我地看台大部份人一齊唱啲簡單歌既時候，聲勢成功短暫蓋過主隊，後來睇返就連係電視都踢得出！！
80 分鐘左右，球證又吹多個十二碼.. 不過今次係比對面既。 我附近既人好失望咁話，唉保持唔到不失球添。 我話波都未射，Kristof 一定救到囉。 果然比我開口中，佢真係捉到路撲出再接實，好癲，今場波三個十二碼得一球破到網，仲要三球都比龍門捉到路！！
去到近完場時，我地係冬季轉會窗關閉前成功係緬恩斯借到多一個後生仔，佢已經有幾場德甲上陣機會，係被球迷睇好可以上位既球員。 果然佢一落場就已經造到幾下有威脅既攻勢。 去到最後一分鐘，佢係右路回返個波比 Koffi 踢入第四球埋齋！ 哈哈哈哈哈哈哈哈， 我地係「鄰居對戰」 「不是打比戰」 既贏家～
最開心送左四蛋比 FCS 塞住佢地把口咩都講唔出。 （只係針對啲 on9 仔，我地有好多 FCS 好朋友的佢地都好鄧我地開心） 但 FCS 賽會真係好小氣，完場後將對住作客看台既喇叭播歌播到勁大聲想蓋過我地既歡呼聲。 我地既球員黎到看台前，睇得出佢地唔係好似我地唱緊咩，但佢地睇手勢跟動作，照樣同我地一齊跳住慶祝！
賽後德國各地球迷向我地發送賀電恭喜我地升班上乙組，哈哈。 雖然我地都真係忍唔住去諗下出年作客史浩克或者奧林匹克球場既情境，但始終未完季唔好慶祝住，it ain’t over till it’s over～ 如果二三月我地都仲保持到水準，咁我地就真係可以安心慶祝！
除左保持水準之外，希望我地既球迷入場人數都可以穩定咁增加～ 最主要係可以吸納新一代年輕球迷，要靠佢地先可以將而家慢慢建立緊既文化傳承落去！