27.01.2023
德國足球丙組聯賽 第 20 週
SV Elversberg - Rot-Weiss Essen
Waldstadion an der Kaiserlinde
賽果：3:0 (0:0)
入場人數： 5334 （約 900 名作客球迷）
門票： 10€
更多相片

話咁快就過左半季，雖然已經講左幾次，但要想再講今季既心路歷程（今季應該會間唔中再重覆下）。季前我地對德丙充滿期待同恐懼，期待同一大班人跟球隊一齊出戰德國各地既同時又怕好快就 gg 再一次做升降機… 然後係一開 league 就大炒另一隊升班馬，然後足總盃完勝本來今季被睇好既利華古遜… 一場一場咁贏落去連自己都覺得隊波痴左線，開心之餘又不斷提自己幻覺黎架姐，嚇我唔到既，千奇唔好贏幾場波就離地！ 去到冬天我地抱住各程紀錄去接受我地真係有能力可以挑戰升班，原本既恐懼慢慢消失，大家開始享受每一場波得來既興奮感，就算今年作客輸波大家都好開心，因為我地第一次有幾百人一齊去作客。 去到而家班球員既心態都慢慢改變，既然我地今日企得係榜首就要盡力既保住呢個位置。 （下年我地要去作客史浩克！！）

今個比賽週我次循環既第一場波，我地係星期五晚迎戰來自北威州既 RW Essen。 對方係季初比我地大炒之後身心受創大失信心，然後去到年尾先慢慢好返啲，去到賽前佢地九場不敗！呢個戰績聽落好似好勁咁，但呢九場波大部份都係和波收場。 而我地今年兩場波踢得麻麻地，上場唔係搏到兩個十二碼都未必贏到，黎到呢場波我地隨時會比對方報返開季之仇。

我地準時四點收工就即刻出發去莎蘭，上星期落完大雪後我地屋企附近既積雪已經去得七七八八，去到莎蘭見到仲係一片白雪地好驚訝，好似兩個世界咁！ 泊低架車就即刻行上球場，已經剩返大約九個字就開波… 好開心見到星期五晚既 C1 都企左好多人，仲有好多後生仔自己整左旗仔黎支持隊波。

RWE 係賽前賣左大約 800 張飛，等到接近開波班球迷就埋位，班球迷企滿哂兩個作客球迷區。會唱歌打氣既人無可否認多過主場球迷，氣勢上的確有啲蓋過我地。 但係企係 C1 既我地覺得自己既表現都唔錯～～ 我地同大球隊無得比，但淨係同上季相比我地已經進步左好多！！起碼真係可以唱足九十分鐘，仲要每首歌可以唱到最少五分鐘（甚至十分鐘） 先要換歌。

上半場如常係客隊先向我地呢面攻過黎，大部份時間佢地都係我地面前…. 有幾時起驚險既埋門機會唔知係我地好彩定佢地廢，有一下先中門角，然後算係半空門咁佢地都比我地既球員係底線救出！！有驚無險咁捱過左上半場，然後做好半場會失波既心理準備….

下半場我地企左係一班後生仔後面，本來覺得佢地好煩係咁係度傾計，但佢地又會係咁留意大家唱咩歌然後會跟住唱，只係唱唔夠幾句又分心係度傾計咁。 到我地係佢後面大聲叫「繼續！！」 「大聲啲！！！」 佢地又會比我地嚇一嚇然後即刻跟住唱，好似係課室見到老師經過要即刻扮留心上堂咁 😀

唔知點解啲時間過得好快，突然就過左十五分鐘…. 突然係右邊有個機會…入左禁區…. 入波！ 開左齋之後班球員終於回魂，同時班作客球員就散哂咁再無攻勢！十分鐘後，我地既不萊梅小腳國 NW 入波拉開成 2:0。 由佢季初只得後備上陣既機會，去到年尾開始有正選同隊波愈黎愈夾，入波之餘仲一直都助攻，去到而家愈黎愈受球迷歡迎真係好鄧佢開心～～～ 希望佢下季返去不萊梅時會受到重用，成為 SVE 之光！

賽後睇返啲作客球迷講，上半場佢地踢得好好，如果 keep 到既話係可以贏到波。 唔知點解下半場隊波散哂，而 SVE 球員又好似睇中左呢點開始食住黎上。 去到場波既尾聲，剛換落場既 Suero Fernandez 係禁區起腳射中對方球員改變方向入波。半場個個仲懷疑緊到底贏唔贏到，然後無啦啦嘭嘭嘭入左三球波再一次收 RWE 皮。 當我地仲慶祝緊個入球時，球證就吹雞完場。 我地完全唔知原來已經 90 分鐘!!! 又再袋穩三分，暫時以十分領先踢少一場既 Wiesbaden。

完場後，企係作客看台既球迷高舉頸巾唱歌鼓勵自己班球員， 佢地由賽前被稱為連續九場不敗，到賽後變成連續五場不勝… 唔知會唔會又比我地傷到佢地既自信心呢？ 我地都等到班球員黎到看台前一齊唱歌慶祝- Allez allez allez! 又一個完美既週末， 下星期我地又要到莎蘭… 今次係去同樣爭緊升班既 Saarbrücken。 我地被分到 1600 張作客門票，暫時已經賣左 1300 張飛！